ფორმულა 1-ის სიახლეები ნახეთ საიტ ავტო პანორამა/ავტო მოტორზე

ფორმულა 1-ის სიახლეები ნახეთ საიტ ავტო პანორამა/ავტო მოტორზე
ფორმულა 1-ის სიახლეები ნახეთ საიტ ავტო პანორამა/ავტო მოტორზე

Friday, December 31, 2010

”ფერარის” ახალმა ბოლიდმა ქრეშ ტესტი გაიარა

Ferrari 2011 Chassis Passes FIA Crash Tests

31 დეკემბერი

”ფერარი” ერთ-ერთი პირველი გუნდია, რომელმაც თავისი ახალი შასის მონოკოკის ქრეშ ტესტი წარმატებით გაიარა, რის შემდეგაც, ბოლიდის სრულყოფის გაგრძელების საშუალება მიეცა. ქრეშ ტესტის გავლა იმას ნიშნავს, რომ მონოკოკი უსაფრთხოების ნორმებს შეესაბამება და მისი გადაკეთება საჭირო აღარ იქნება.

ამ ტესტის წარმატებით გავლას დიდი მნიშვნელობა იმიტომაც აქვს, რომ იტალიურმა გუნდმა მნიშვნელოვნად შეცვალა შასის კონსტრუქცია და მასში ახალი, იტალიური პრესის ინფორმაციით, უფრო ”ექსტრემალური” კომპოზიციური მასალები გამოიყენა. მოკლედ, მარანელოელებს ყველა წინაპირობა აქვთ იმისათვის, რომ ახალი სეზონი თავიდანვე მოწინავეთა რანგში დაიწყონ.

”გუნდის ქრეშ ტესტის შეფმა დავიდე ტერლეტიმ, ტესტის შემდგომ, მონოკოკზე წარმოქმნილი ბზარი აღმოაჩინა. მისმა გამოკვლევამ აჩვენა, რომ ამ ბზარს, მონოკოკის სიმტკიცის გაუარესება არ შეუძლია, რადგან ის მეორეხარისხოვანი დეტალის ზედაპირზე წარმოიქმნა”, - ნათქვამია ახალი ამბების სააგენტო ჯიემემის მიერ გავრცელებულ ინფორმაციაში.

როგორც წესი, ქრეშ ტესტებს საერთაშორისო საავტომობილო ფედერაციის (FIA) დელეგატები ესწრებიან და ისინი ადასტურებენ მონოკოკის ვარგისიანობას. ”ფერარის” შასის ქრეშ ტესტები ბოლატეში, მილანის მახლობლად ჩატარდა. მართალია, ახალ მანქანას დაჯახებაზე გამოცდები კიდევ ჩაუტარდება, თუმცა ამჯერად, ისინი საბაზო შასის აღარ შეეხება.

”ფერარი” თავისი ახალი ბოლიდის ოფიციალურ პრეზენტაციას წინასასეზონო ტესტების დაწყებამდე რამდენიმე დღით ადრე ჩაატარებს. ტესტები კი სტარტს ვალენსიაში, 1 თებერვალს აიღებს.

Wednesday, December 29, 2010

რედ ბული” შეიძლება ”ფოლკსვაგენის” ძრავებზე გადავიდეს

Red Bull Hint at Future VW Engine F1 Deal

29 დეკემბერი

”რედ ბულ რეისინგი” ”რენოს” ძრავების გამოყენებას მანამ გააგრძელებს, სანამ ფორმულა ერთში ძრავების ახალი რეგლამენტი ამოქმედდება. 2013 წლიდან კი, როცა რეგლამენტი ისევ დაუშვებს ტურბოძრავების გამოყენებას, ავსტრიული გუნდი ფრანგულ კომპანიასთან კონტრაქტს ალბათ აღარ გააგრძელებს.

ამის მიზეზი კი შეიძლება ის გარემოება გახდეს, რომ ფ1-ით დაინტერესებას გერმანული კომპანია ”ფოლკსვაგენი” იჩენს. და თუ ევროპის უდიდესი ავტომწარმოებელი დიდი პრიზების ცირკში შესვლის გადაწყვეტილებას მიიღებს, მის ძრავებს პირველ რიგში, ”რედ ბულ რეისინგი” მიიღებს.

ორ კომპანიას შორის, ავტო სპორტში ისედაც მჭიდრო ურთიერთობაა. კერძოდ, ენერგტიკული სასმელების მწარმოებელი ავსტრიული კომპანია ”ფოლკსვაგენის” საქარხნო გუნდის სპონსორია დაკარის რალი მარათონზე, რომელზეც ორი წელია, ისინი პირველობას არავის უთმობენ. თანაც, ახლახანს ”რედ ბულის” დამაარსებელმა და მფლობელმა დიტრიხ მატეშიცმა განაცხადა, რომ მალე მისი კომპანია ”საინტერესო” პარტნიორობას ელის. ვისგან და როდის იქნება ეს ”მალე” არ დაუკონკრეტებია.

”ფორმულა 1-ში მალე საინტერესო პარტნიორობას დავიწყებთ. თუ არა, მაშინ არც ისაა გამორიცხული, რომ საკუთარ ძრავებს დავამზადებთ. ვფიქრობ, ეს აბსურდულ იდეად არ მოგეჩვენებათ”, - ამბობს მატეშიცი.

რა თქმა უნდა, საკუთარი ძრავის შექმნა და წარმოება ბევრ სირთულესთან იქნება დაკავშირებული. გუნდში უნდა ჩამოყალიბდეს ცალკე ძრავების დეპარტამენტი, სადაც გამოცდილი სპეციალისტების მიწვევა იქნება საჭირო. ყველაფერს კი იმდენად დიდი კაპიტალდაბანდება დასჭირდება, რომ სავარაუდოდ, ”რედ ბული” ამას მოერიდება და ძრავების ”ფოლკსვაგენისგან” მიღებას ამჯობინებს.

”ახლა მთავარია, რომ ყველა შემოთავაზება ღიად დავტოვოთ. ამ საქმეში მისტერ მატეშიცს დიდი გამოცდილება აქვს. ის კი ამბობს, რომ ყველაფერი შესაძლებელია”, - ამბობს ”რედ ბულ რეისინგის” შეფი ქრისტიან ჰორნერი. ამ სიტყვებში კი ყველაზე მთავარი ისაა, რომ ავსტრიული კომპანია ერთჯერად ტრიუმფს არ სჯერდება და ფ1-ში დიდი ხნით დარჩენას აპირებს.

მონტოია ფ1-ში დაბრუნებას აღარ აპირებს

Montoya Doesn't Consider F1 Return

29 დეკემბერი

ამას წინათ, ინტერნეტით გავრცელდა ინფორმაცია, რომლის მიხედვითაც, კოლუმბიელი მრბოლი ხუან პაბლო მონტოია ფორმულა ერთში დაბრუნებას აპირებს. მაგრამ მალევე თავად მონტოიამ უარყო ეს ინფორმაცია და განაცხადა, რომ მართალია, ბევრი მეგობარი დაბრუნებას ურჩევს, მაგრამ ამას არასდროს იზამს.

”ბევრი მირჩევს, რომ ფორმულა 1-ში უნდა დავბრუნდე. მაგრამ მე ტავს კარგად ვგრძნობ და ეს არაფერში მჭირდება. ვფიქრობ, იმის ილუზია არ უნდა მქონდეს, რომ ჩემთვის ახლა ეს შესაძლებელია”, - ამბობს ”უილიამსის” და ”მაკლარენის” ყოფილი პილოტი, ვისაც ფ1-ში სულ 7 რბოლა აქვს მოგებული.

მონტოია ფ1-დან 2006 წელს წავიდა ისე, რომ სეზონი არც დაუმთავრებია. მან გამოაცხადა, რომ კარიერას ნასქარ-ის სერიაში გააგრძელებდა. როგორც ახალბედამ, ამერიკის ყველაზე პოპულარული სერიის მეორე და მესამე სერიებში რბოლებით დაიწყო, შარშან კი სპრინტის სერიაში გადავიდა და მაშინვე ტიტულის მოპოვების შანსი ჰქონდა.

გასული სეზონი მისთვის არც ისე წარმატებული გამოდგა, მაგრამ კოლუმბიელი ამბობს, რომ ნასქარ-ში გაცილებით უკეთ გრძნობს თავს, ვიდრე მოსაბეზრებელ ფორმულა 1-ში. ამერიკაში ის ჩიპ განასის გუნდში ასპარეზობს, ადამიანისა, რომელმაც ჩემპ ქარ-ის და ინდიქარ-ის მწვერვალები დააპყრობინა.

”ამჟამად მეც კმაყოფილი ვარ, ჩემი სპონსორიც და ჩიპ განასიც. მეტი არც არაფერი მინდა. აბუ დაბის რბოლას ვუყურე და როგორც ჩანს, ფ1-ში არაფერი შეცვლილა - ერთი მანქანა მეორეზე წამით სწრაფია, მაგრამ მისი გასწრება მაინც არ შეუძლია. ამბობენ, გასწრების პრობლემას ტრასის კონფიგურაცია განაპირობებს, მაგრამ რაც მახსოვს, ამაზე ლაპარაკობენ და ალბათ სულ ასე იქნება”, - ამბობს მონტოია.

კოლუმბიელმა ფ1-ის ჩემპიონის მიმართ ქება არ დაიშურა, თუმცა ისიც აღნიშნა, რომ სებასტიან ფეტელმა ბევრი შეცდომა დაუშვა: ”ის ძალიან ნიჭიერია, თუმცა ყველაფერი გააკეთა იმისათვის, რომ ჩემპიონი არ გამხდარიყო. მან და მისმა გუნდმა ძალიან ბევრი შეცდომა დაუშვეს, რამაც საქმე გაურთულა, მაგრამ ვფიქრობ, რომ საბოლოოდ, უსწრაფესმა მრბოლმა და მანქანამ გაიმარჯვეს”.

Tuesday, December 28, 2010

ჰამილტონმა ტიტულისთვის პირადი პრობლემების გამო ვერ იბრძოლა

Hamilton Blames Personal Problems for 2011 Title Failure

28 დეკემბერი

ლუის და ენტონი ჰამილტონები

..............................

ლუის ჰამილტონი ამბობს, რომ გასული სეზონის განმავლობაში, მას მუდმივად პირად პრობლემებთან გამკლავება უწევდა, რამაც ტიტულისთვის ბრძოლაში ხელი შეუშალა. მანვე დასძინა, რომ პრობლემები მარტო თავის შეყვარებულს, პოპ მომღერალ ნიკოლ შერცინგერს არ ეხება.

მართალია, ბიბისისთან საუბრისას, სხვა პრობლემები არ დაუკონკრეტებია, მაგრამ ყველამ იცის, რომ მას საკუთარ მამასთან გაურთულდა ურთიერთობა. იმდენად, რომ სეზონის დაწყებამდე, მასთან სამენეჯერო ურიერთობა გაწყვიტა და თავისი საქმეები მთლიანად ”მაკლარენს” მიანდო. არადა, მამამისი, ენტონი ჰამილტონი ის კაცია, ვინც ავტოსპორტის უმაღლესი საფეხურებისკენ გზის გაკაფვაში მუდამ გვერდით ედგა და მის გარეშე, ადრე ერთი ნაბიჯიც არ გადაუდგამს.

”პირად ცხოვრებას დიდი მნიშვნელობა აქვს. ახლა ჩემი ცხოვრება ისეთი მშვიდი არაა, როგორიც ადრე იყო. ახლა ჩემს ცხოვრებაში ბევრი ისეთი რამ ხდება, რაც ჩემზე დიდ გავლენას ახდენს. ისე მარტივად არაა საქმე, როგორც შეიძლება გარედან ჩანს - მივალ ტრასაზე და ვირბოლებ. რა თქმა უნდა, ჩემზეც, როგორც სხვებზე, გარემო პირობები მოქმედებს, ის ხალხი, ვინც ჩემს გარშემო ტრიალებს - ოჯახი, მეგობრები. ამ ურთიერთობებს დიდი მნიშვნელობა აქვს.

ამას მიჩვეული ვარ და როცა ამ ჯავს ერთი რგოლი მოაკლდება, ყველაფერი შეიძლება აირიოს. ყოველ შემთხვევაში, საქმეს ისე ვეღარ აკეთებ, როგორც ადრე. ემოციური ფონი ყოველტვის დიდ გავლენას ახდენს ჩემზე და მტავარია, რომ ყველა რგოლი ისევ თავის ადგილზე დაბრუნდეს”, - ყვება მსოფლიოს 2008 წლის ჩემპიონი.

საცოლესთან და მამასთან ურთიერთობის გართულების გარდა, ჰამილტონს სხვა პრობლემებიც ჰქონდა. მაგალითად, სეზონის დასაწყისში, ავსტრალიის დიდი პრიზის დღეებში, მან მელბურნის ქუჩებში მანქანით რვიანები ხაზა, რის გამოც, პოლიციამ დააჯარიმა და შემდეგ, ავსტრალიელების წინაშე ბოდიშის მოხდაც მოუწია. ყოველივემ, ავსტრალიაში ჰამილტონის იმიჯი შელახა.

ახლა კი ჰამილტონს ერთი მთავარი მიზანი აქვს - როგორმე ყურადღების რბოლებზე კონცენტრირება უნდა შეძლოს, რათა სხვა რამეებმა მის კარიერაზე უარყოფითად არ იმოქმედოს. ის ამბობს, რომ მაგალითად სხვა სპორტსმენის კარიერა გამოადგება. ეს სხვა სპორტსმენი გოლფის სუპერვარსკვლავი ტაიგერ ვუდსია, რომელის ცხოვრებაშიც, გასულ სეზონში უამრავი არასასურველი რამ მოხდა, თუმცა ამას მის შედეგებზე არანაირად არ უმოქმედია.

Monday, December 27, 2010

საახალწლო მისალოცი ჩემპიონისგან

Red Bull Christmas Card Mocks Ferrari

27 დეკემბერი

შობის ყოველ დღესასწაულზე, ფორმულა ერთის კომერციულ უფლებათა გამგებელი ბერნი ეკლსტოუნი მკაცრად იცავს ტრადიციას და საშობაო შარჟ-მისალოც ბარათებს აქვეყნებს. წელს კი მას მიმბაძველი გამოუჩნდა ფორმულა 1-ის ახალი ჩემპიონის, ”რედ ბულ რეისინგის” სახით.

საშობაო მისალოცი ბარათი ავსტრიულმა გუნდმაც გამოაქვეყნა და საყოველთაო აღიარებით, ბერნის ბარათი აშკარად დაჩრდილა. თანაც, მასზე აშკარად გაწკეპლილია კონკურენტი გუნდის, კერძოდ კი ”ფერარის” გუნდური მითითებები, რომელთა შედეგადაც, გერმანიის დიდ პრიზზე, ბრაზილიელ ფელიპე მასას, თანაგუნდელ ფერნანდო ალონსოსთვის ლიდერობის დათმობამ მოუწია.

ბარათის წინა პლანზე ჩანს ახალი ჩემპიონის, გერმანელი სებასტიან ფეტელის ბოლიდი, მას კი უკან ”ფერარი” და ირემშებმულ მარხილზე ამხედრებული სანტა კლაუსი მიჰყვებიან. ამ დროს, ფეტელი ღებულობს რადიო შეტყობინებას - ”სანტა შენზე სწრაფია. გთხოვთ, დაგვიდასტურო, რომ ამ მესიჯის არსი გაიგე”.

სანტა ფერნანდოთი რომ შევცვალოთ, სიტყვასიტყვით მივიღებთ იმ შეტყობინებას, რომელიც მასამ გერმანიაში რბოლისას მიიღო. ბრაზილიელს დიდი ხანი არ დასჭირვებია იმისათვის, რომ მითითება ”სწორად გაეგო” და გზა თანაგუნდელისთვის დაეთმო, რომელმაც ამ გამარჯვებით, ლამის მესამე ტიტულიც მოიპოვა.

მართალია, მომავალი სეზონიდან, გუნდურ მითითებებზე აკრძალვა უქმდება, მაგრამ ფაქტია, რომ გერმანული რბოლის ინციდენტი, რომელიც იტალიურ გუნდს 100 000 დოლარის ჯარიმად დაუჯდა, ”რედ ბულის” ხელმძღვანელობას მწარედ ახსოვს.

რაც შეეხება ეკლსტოუნის საშობაო შარჟ-ბარათს, მის ცენტრშიც ”რედ ბულ რეისინგი”, უფრო კი მისი ბოქსია მოქცეული, რომლის წინაც, გუნდის შეფი ქრისტიან ჰორნერი კენჭს ყრის. ბარათს კი შემდეგი მინაწერი აქვს: ”ჟეტონი ყოველთვის იმ გვერდზე არ ეცემა, რომელსაც ვისურვებდით”.

პრინციპში, აქაც გუნდის მიერ ორ პილოტს შორის გაკეთებული არჩევანია გაშარჟებული. სეზონის განმავლობაში რამდენიმე შემთხვევა დაფიქსირდა, როცა გუნდი აშკარად ფეტელის მხარეს იჭერდა. არადა, ოფიციალურ განცხადებებში, მისი ხელმძღვანელობა ყოველთვის აცხადებდა, რომ მისთვის ფავორიტიზმი მიუღებელია...

Sunday, December 26, 2010

ნიუი პროგნოზებისგან თავს იკავებს

Newey: 2011 form impossible to predict

26 დეკემბერი

”რედ ბულ რეისინგის” ტექნიკური დირექტორი ედრიან ნიუი ამბობს, რომ ჯერ ნაადრევია ლაპარაკი იმაზე, თუ რამდენად შეძლებს მისი გუნდი მომავალ სეზონშიც დომინირებას.

მილტონ კეინსში (ინგლისი) ბაზირებულმა ავსტრიულმა გუნდმა გასულ სეზონში ორივე ტიტული მოიპოვა. ნიუის ხელმძღვანელობით შემუშავებული ავტომობილი RB6 საუკეთესო იყო კონსტრუქტორთა პირველობაზე, პირად კლასიფიკაციაში კი ჩემპიონი გერმანელი სებასტიან ფეტელი გახდა.

მიუხედავად ამისა, ნიუი ამბობს, რომ მის გუნდს გარანტირებული არაფერი აქვს, რადგან ფორმულა ერთში ყველაფერი ძალიან სწრაფად იცვლება და ერთი მცდარი ნაბიჯი საკმარისია იმისათვის, რომ ლიდერმა პელოტონის შუაში ამოყოს თავი. ამიტომ, ის პროგნოზებისგან თავს იკავებს.

”ამ ეტაპზე, რაიმეს წინსწარმეტყველება შეუძლებელია. ავტოსპორტში ერთი ჭეშმარიტება არსებობს - აქ ყველაფერი შეიძლება ძალიან სწრაფად შეიცვალოს. შეიძლება სეზონებს შორის სხვებმა უკეთ იმუშაონ, უკეთეს ტექნიკურ გადაწყვეტებს მიაგნონ და მაშინ ყველაფერი შეიცვლება. ჩვენ მუდმივად ძიების პროცესში ვართ და წინასწარ ძნელია იმის თქმა, თუ რა შედეგს გამოიღებს ჩვენი შრომა”, - ამბობს ნიუი და დასძენს, რომ თუნდაც მისმა გუნდმა წინა ორ სეზონში საუკეთესო მანქანა მოამზადა, ეს მაინც არ ნიშნავს, რიმ მომავალ სეზონშიც ასე იქნება.

”პირადად ჩემთვის, ის ფაქტი არაფერს ნიშნავს, რომ წინა ორ სეზონში საუკეთესო მანქანა შევქმენით. თუმცა, ამაში ერთი კარგი რამ არის - ჩვენ მანქანის კონსტრუირების დასაწყისშივე, ამ პროცესის სწორი მიმართულებით წაყვანის გამოცდილება შევიძინეთ და ეს ბევრს ნიშნავს. თუ ამჯერადაც იმავე კურსით ვივლით, შესაძლებელია, რომ კვლავ საუკეთესო მანქანა შევქმნათ. იმის თქმაც მინდა, რომ როცა რეგლამენტი სტაბილურია, სულ უფრო მეტი უჩვეულო გადაწყვეტილების მიღება გვიწევს და მანქანის სრულყოფის პროცესიც რთულდება. რა შედეგი გვექნება ჩვენ და სხვა ძლიერ გუნდებს, ამას სეზონის დასაწყისში დავინახავთ”.

ნიუი დასძენს, რომ გასული სეზონის დაწყებამდე, წარმოდგენა არ ჰქონდა, რამდენად კარგი მანქანა გამოუვიდა. ამის მიზეზი კი რეგლამენტში შეტანილი არაერთი ცვლილება იყო, რომლებმაც საქმე მეტისმეტად გაართულა. სეზონის წინა ტესტების დროს კი მანქანის სრულყოფის პროგრამა გაგრძელდა და მას ყურადღება არ მიუქცევია იმისთვის, თუ რა სიახლეებს ამზადებდნენ კონკურენტი გუნდები.

ნიუი ამბობს, რომ სეზონის განმავლობაში, ძალიან დაღალა იმან, რომ კონკურენტები ”რედ ბულის” ბოლიდის კონსტრუქციაში არალეგალურ ელემენტებს ეძებდნენ. თუმცა, საბოლოოდ RB6-მა ყველანაირ შემოწმებას გაუძლო, რითაც კიდევ ერთხელ დამტკიცდა, რომ ”რედ ბულ რეისინგს” ფორმულა ერთის საუკეთესო ტვინი ემსახურება...

Saturday, December 25, 2010

ბელგიის დიდი პრიზი ისევ საფრთხის ქვეშაა

25 დეკემბერი

ფორმულა ერთის მსოფლიო ჩემპიონატის კალენდარი თითქმის ყოველწლიურად ახალი ეტაპებით ივსება. მალე მასში ინდოეთის, აშშ-ის და რუსეთის დიდი პრიზები გამოჩნდება. და არაა გამორიცხული, რომ ამის გამო, ზოგიერთმა ძველმა რბოლამ, კალენდარში ადგილი დაკარგოს. მათ შორის კი ყველაზე არამყარი მდგომარეობა ბელგიურ დიდ პრიზს აქვს, რომელსაც ფორმულა ერთის მენეჯმენტთან კონტრაქტი მომავალი სეზონის ბოლოს უმთავრდება.

ბელგიის დიდი პრიზის ორგანიზატორები ყოველწლიურად ზარალს განიცდიან. გასულ სეზონში მათ 4.5 მილიონი ევრო იზარალეს. არის ვარაუდი, რომ ჩემპიონატში ბელგიელი ჟერომ დ’ამბროზიოს გამოჩენა, ბელგიური რბოლისადმი ადგილობრივი მაყურებლის ინტერესს გაზრდის. თუმცა, ამაში ეჭვი ეპარება სპას რბოლის შეფ ანდრე მაესს.

”რა თქმა უნდა, ფ1-ში მისი მოსვლა დადებითი სიახლეა. მაგრამ საეჭვოა, ამან ბილეთების გაყიდვას შეუწყოს ხელი. თავის დროზე, ”ლოტუსში” მყოფი ფილიპ ადამსის სანახავად ბევრი მაყურებელი არ მოდიოდა. მაყურებლის რიცხვი არც მაშინ გაზრდილა, როცა 2004 წელს, თავისუფალ პრაქტიკებზე, ”მინარდის” ბოლიდით ტრასაზე ბას ლაინდერსი გამოდიოდა.

ვფიქრობ, დ’ამბროზიოს ჩვენს რბოლაზე ბილეთების გაყიდვის გაზრდა მხოლოდ იმ შემთხვევაში შეუძლია, თუ სეზონის დასაწყისიდანვე კარგი შედეგები ექნება. ამჟამად ის ეროვნული დონის ვარსკვლავიც კი არაა - დარწმუნებული ვარ, ბელგიელ ტელემაყურებელთა უმეტესობას, მის შესახებ ერთხელაც არ სმენია”, - ამბობს მაესი.

წამგებიანი ბიზნესი იმას ნიშნავს, რომ ბელგიური რბოლა გულზე არ ეხატება ფ1-ის კომერციულ უფლებათა გამგებელ ბერნი ეკლსტოუნს, ვისაც ურჩევნია, ამ ადგილზე სხვა ისეთი ქვეყნის ეტაპი გამოჩნდეს, რომელიც რბოლის ჩატარების უფლებაში გაცილებით მეტ თანხას გადაიხდის.

სხვათა შორის, მომავალი სეზონის შემდეგ, კონტრაქტები ჩინეთის, თურქეთისა და იაპონიის დიდ პრიზებსაც უმთავრდბათ. ამათგან ყველაზე მყარი პოზიცია იაპონელებს უკავიათ, რომელთა რბოლასაც ყოვლთვის უამრავი მაყურებელი ესწრება. სამაგიეროდ, წაგებაზე მუშაობენ თურქეთისა და ჩინეთის დიდი პრიზების ორგანიზატორები.

Thursday, December 23, 2010

შვეიცარული სარბოლი ელექტროპროტოტიპი

Green GT Unveils Prototype Electric Racer

21 დეკემბერი

408 ცხენის ძალა პიკური სიმძლავრე და 290 კმ/სთ მაქსიმალური სიჩქარე - ასეთი ტექნიკური მონაცემები აშკარად სარბოლ ავტომობილს უნდა ეკუთვნოდეს და ასეცაა. ოღონდ, ავტომობილი, რომლის შესახებაც ვლაპარაკობთ, მბიძგველ ძალას შიდაწვის ძრავისგან კი არა, ელექტროძრავისგან ღებულობს.

შვეიცარული ჯგუფი ”გრინ GT” არის ავტორი სარბოლი ავტომობილისა, რომლის შესახებაც გიყვებით. ეს არის ლე მანის პროტოტიპის სტილში შესრულებული ბოლიდი, რომლის პრეზენტაციასაც, ლოზანაში მდებარე შვეიცარიის ტექნოლოგიების ფედერალური ინსტიტუტში თვით საერთაშორისო საავტომობილო ფედერაციის პრეზიდენტი ჟან ტოდტი დაესწრო.

სარბოლი ელექტრომობილის პრეზენტაციას ჟან ტოდტი დაესწრო
..............................
”გრინ GT-ს” სარბოლი ელექტრომობილი ორი ელექტროძრავითაა აღჭურვილი, რომლებიც ავტომობილის უკანაა დამონტაჟებული. სხვათა შორის, მათი სიმძლავრე, წინა მოდელის ძრავებისასთან შედარებით, 50 პროცენტითაა გაზრდილი. ბორბლებს შორის მაბრუნი მომენტის ოპტიმალურ განაწილებას სპეციალური ელექტრონული სისტემა უზრუნველყოფს, რისი წყალობითაც, ავტომობილი მოსახვევებს უფრო უკეთ და მაღალი სიჩქარით გადის.

გაუმჯობესებულია ენრგიის შენხვის ბლოკიც. ასეთი სარბოლ ავტომობილს ორი აქვს და ისინი ლითიუმ-იონური ელემენტებისგან შედგება. აკუმულატორები სპეციალურ ყუთებშია მოთავსებული, რომლებიც ისეთი კომპოზიტისგან დამზადდა, რომელიც აეროკოსმოსურ მრეწველობაში გამოიყენება. ეს ყუთები ცეცხლგამძლეცაა და დარტყმისადმი მედეგიც. აკუმულატორების ოპტიმალური მუშაობისთვის, ისინი გრილდება, რისთვისაც გაგრილების თხევადი სისტემაა გამოყენებული.ამასთან, სითხე დენგაუმტარია.

რა თქმა უნდა, ”გრინ GT-ს” სარბოლი ელექტრომობილი ლე მანის რბოლაში მონაწილე შიდაწვისძრავიან მონსტრებს მეტოქეობას ვერ გაუწევს, თუმცა აშკარაა, რომ ადრე თუ გვიან, რბოლებში ელექტრომობილების მონაწილეობაც ისეთივე ჩვეულებრივი მოვლენა გახდება, როგორიც თუნდაც ის ფაქტია, რომ უკვე დიდი ხანია, ლე მანის რბოლას დზელისძრავიანი ავტომობილებით იგებენ.

ოღონდ, სანამ ელექტრული სარბოლი პროტოტიპი რბოლებში მონაწილეობას მიიღებს, მას სერიოზული ტესტები აქვს გასავლელი, რომლებზეც თავისი რეალური შესაძლებლობების და გამძლეობის გამოვლენა მოუწევს.

დამცავი საქარე მინები ფ1-ის ბოლიდებისთვის

FIA to Introduce Protective Windshields on F1 Cars

21 დეკემბერი

საერთაშორისო საავტომობილო ფედერაცია (FIA) პილოტების უსაფრთხოებაზე ზრუნვას აგრძელებს და ამ მიზნით, მანქანებზე გამჭვირვალე დამცავი საქარე შუშების დაყენებას სავალდებულოს გახდის. ასეთმა, დარტყმისადმი მედეგმა შუშამ, პილოტის თავი მძიმე ტრავმებისგან უნდა დაიცვას.

იტალიურმა ჟურნალმა ”აუტოსპრინტმა”, ”ფერარის” ფოტოშოპში დამუშავებული სურათიც კი გამოაქვეყნა, რომელზეც კარგად ჩანს, თუ როგორი გარეგნობა ექნება ახალი რეგლამენტის შესაბამისად მომზადებულ ბოლიდებს.

ჯერჯერობით უცნობია, თუ როდის იგეგმება ამ სიახლის დანერგვა. სამაგიეროდ, გარანტირებულად შეიძლება იმის თქმა, რომ ახალი სტრუქტურა არანაირად არ შეამცირებს პილოტის მხედველობის არეს, რადგან ის მთლიანად გამჭვირვალე იქნება. სამაგიეროდ, მან უნდა გაუძლოს სხვა მანქანისგან მოგლეჯილი ბორბლის, ან მთლიანად მანქანის (რომელიც მინიმუმ 640 კილოგრამს იწონის) დაჯახებას. სამაგიეროდ, საქარე შუშა რადიკალურად შეცვლის ავტომობილის აეროდინამიკას. ამიტომ, გუნდებს ბევრი მუშაობა მოუწევთ იმისათვის, რომ ახალი სტრუქტურა მაქსიმალურად მოერგოს მათი მანქანების კონსტრუქციას.

FIA-მ უსაფრთხოების ახალი სტრუქტურის დაწესებაზე ფიქრი მას შემდგ დაიწყო, რაც უნგრეთის 2009 წლის დიდი პრიზის კვალიფიკაციაზე მომხდარმა ინციდნტმა ”ფერარის” ბრაზილიელ ფელიპე მასას მძიმე ტრავმა გამოიწვია. მაშინ მასას, თავისი თანამემამულე რუბენს ბარიკელოს მანქანიდან მოგლეჯილი ზამბარა თავში მოხვდა. მასა სასწაულებრივად გადარჩა. სამაგიეროდ, ორი დღით ადრე, ინგლისის ბრენდს ჰეჩზე, ფორმულა 2-ის რბოლისას, თავში საბურავის მოხვედრამ იმსხვერპლა მსოფლიოს 1964 წლის ჩემპიონის, ინგლისელი ჯონ სარტიზის შვილი ჰენრი სარტიზი.

მას შემდგ, რაც თავის ქალის მძიმე ტრავმა მოირჩინა, მასამ განაცხადა, რომ კარგი იქნება, თუ პილოტის თავი მეტად იქნება დაცული: ”მე არ ვამბობ, რომ კოკპიტი მთლიანად უნდა დავხუროთ, მაგრამ ალბათ არსებობს საშუალებები, რომლებიც რბოლისას ჩვენი თავები მეტად დაცული იქნება.

ბოლო ინციდენტი, რომელიც შეიძლებოდა პილოტის თავის მძიმე ტრავმით დასრულებულიყო, გასული სეზონის ბოლო რბოლისას, მსოფლიოს შვიდგზის ჩემპიონ მიხაელ შუმახერს შეემთხვა. ამ ინციდენტის დროს, იტალიელი ვიტანტონიო ლიუცის ”ფორს ინდია” შუმის ”მერსედესს” ზემოდან დაეცა და ცოტა დააკლდა, გერმანელი პილოტის თავსაც მისწვდომოდა...

”ფერარის” პრეზიდენტს ალონსო-ფეტელის წყვილი ხიბლავს

Ferrari President Fancies Alonso-Vettel Lineup

21 დეკემბერი

ალბათ გახსოვთ, მას შემდეგ, რაც მსოფლიო ჩემპიონი გახდა, სებასტიან ფეტელმა განცხადა, რომ ოდესმე ”ფერარიში” გადასვლას ისურვებდა. რა თქმა უნდა, მისი ნათქვამი არ გამოპარვია იტალიური საჯინიბოს პრეზიდენტ ლუკა დი მონტეძემოლოს, რომელმაც თქვა, რომ დიდი სიამოვნებით გაუფორმებდა კონტრაქტს ახალ ჩემპიონს.

”სებასტიანი ძალიან სწრაფი, ინტელიგენტი და ახალგაზრდა პილოტია, ვისაც დიდი მომავალი აქვს. და დარწმუნებული ვარ, ადრე თუ გვიან, ის წითელი ბოლიდის საჭეს მიუჯდება”, - კიოლნურ ტაბლოიდ ”ექსპრესთან” საუბრისას ამბობს 63 წლის დი მონტეძემოლო.

ფეტელს ”რედ ბულ რეისინგთან” კონტრაქტი მომავალი სეზონის ბოლომდე აკავშირებს, თუმცა ავსტრიულ გუნდს, მისი კიდევ ერთი სეზონით გაგრძელების უფლება აქვს. სხვათა შორის, მსოფლიოს ახალ ჩემპიონს კონტრაქტი რომ დაუმთავრდება, ზუსტად მაშინ, ბრაზილიელი ფელიპე მასასა და ”ფერარის” ხელშეკრულებაც ამოიწურება. ასე რომ, გამორიცხული არაა, რომ მალე ფეტელისა და ფერნანდო ალონსოს ”ფერარისეული” დუეტი ვიხილოთ.

უნდა ითქვას, რომ ფეტელის ”ფერარიში” შესაძლო გადასვლასთან დაკავშირებით, თავისი აზრი გამოთქვა ”რედ ბულ რეისინგის” კონსულტანტმა, წარსულში ფ1-ის ავსტრიელმა პილოტმა ჰელმუტ მარკომ, ვისი თქმითაც: ”სებს ოდესმე ”ფერარიში” გადასვლის სურვილი აქვს, თუმცა ჩვენ ყველაფერს ვეცდებით, რომ ამ სურვილის ასრულება მაქსიმალურად გავურთულოთ”.

იმავე გამოცემის ინფორმაციით, ფეტელი ”რედ ბულ რეისინგის” ერთადერთი წევრი არაა, რომლის გადაბირებაც ”ფერარის” სურს. მარანელოელების შეფს, ავსტრიული გუნდის მთავარი ტვინის, ედრიან ნიუისთვის ზღაპრული თანხა შეუთავაზებია, თუმცა პასუხად უარი მიუღია...

Wednesday, December 22, 2010

რომაელები ფორმულა 1-ის წინააღმდეგ

Rome Residents Oppose F1 Grand Prix

21 დეკემბერი

რომის დიდი პრიზის ჩატარებას მარტო იტალიის ჩრდილოეთის რეგიონები როდი ეწინააღმდეგებიან. როგორც ირკვევა, ეს იდეა არც თავად რომაელებს მოსწონთ. უფრო კონკრეტულად კი, ქალაქის იმ უბნის (ევროს დასახლება) მაცხოვრებლებს, სადაც ტრასის გაყვანა იგეგმება.

იტალიის დემოკრატიულმა პარტიამ (პარტიტო დემოკრატიკო) ჩაატარა გამოკითხვა, რომელმაც აჩვენა, რომ ევროს დასახლების დიდ უმრავლესობას, მათს უბანში სარბოლი მანქანების ხმაურის პერსპექტივა არ ხიბლავს. სულ 2138 ადამიანი გამოიკითხა, რომელთაგან 1750 თვლის, რომ რბოლა ქალაქს უფრო მეტ პრობლემას შეუქმნის, ვიდრე მოგებას მოუტანს. უფრო მეტიც, გამოკითხულთა 93 პროცენტი დარწმუნებულია, რომ რბოლის დღეებში, ქალაქში საცობების რაოდენობა გაიზრდება, გაუარესდება ჰაერი და ქალაქში გამონაბოლქვის სუნი დადგება.

მაგრამ რომის დიდი პრიზის პრომოუტერი მაურიციო ფლამინი ამბობს, რომ გამოკითხვის შედეგები ევროს დასახლების ყველა მაცხოვრებლის აზრს არ გამოხატავს, რადგან მასში მინიმალური მაცხოვრებელი გამოიკითხა. ამასთან, მისივე აზრით, რბოლის ჩატარების მოწინააღმდეგეთა არგუმენტების უმეტესობა უსაფუძვლოა.

სხვათა შორის, უფრო ადრე, ”ფერარის” ფორმულა 1-ის გუნდის შეფმა სტეფანო დომენიკალიმ განაცხადა, რომ რომში ფორმულა 1-ის ეტაპის ჩატარებას მარანელოელები მხარს არ დაუჭერენ. მისი არგუმენტი უფრო ზოგადია - დომენიკალის თქმით, ყველა ქვეყანას მხოლოდ ერთი ეტაპის ჩატარების უფლება უნდა ჰქონდეს.

რომაულ დიდ პრიზს ძლიერი წინააღმდეგობა ჩრდილოეთის ლიგის (ლეგა ნორდ) მხრიდანაც შეხვდა. ამ გართიანბის აზრით, რომს ქალაქ მონცასთვის, იტალიის დიდი პრიზის მოპარვა სურს.

რომის ხელისუფლებასა და ფორმულა ერთის კომერციულ უფლებათა მმართველ ბერნი ეკლსტოუნს შორის არსებობს წინასწარი შეთანხმება, რომელიც 2012 ან 2013 წელს რომში რბოლის ჩატარებას ითვალისწინებს. თუმცა, საბოლოო ხელშეკრულება ჯერ არ გაფორმებულა. დაკიდევ, ხელშეკრულება რომც გაფორმდეს, რომაული რბოლის კალენდარში მოხვედრა მაინც ერთჯერადი იქნება.

Tuesday, December 21, 2010

ელექტრონული ფორმულა რბოლებისთვის ემზადება

U.N. Climate Change Conference announces electric racing series

21 დეკემბერი

მექსიკის ქალაქ კანკუნში გაერთიანებული ერების კლიმატის ცვლილების კონფერენციაზე, რომელსაც საქართველოს პრეზიდენტი მიხეილ სააკაშვილი დაესწრო, გამოცხადდა, რომ ყალიბდება საერთაშორისო სარბოლო სერია ფორმულეკ EF01, რომელშიც მრბოლები სხვადასხვა მწარმოებლების მიერ შექმნილ ერთადგილიან შასიზე აგებული მანქანბით იასპარეზებენ.
ახალი ჩემპიონატი პირველად 2013 წელს უნდა ჩატარდეს. მის ორგანიზატორთა ჩანფიქრით, ახალი ელექტრონული სერიის მანქანები, თავისი ტექნიკურ-დინამიკური მახასიათებლებით, ფორმულეკ 3-ის ბოლიდების დონეზე უნდა იყოს, რომლებიც 2.0-ლიტრიანი ატმოსფერული შიდაწვის ძრავების ძალას იყენებს.

ახალი ბოლიდი, რომელიც ელექტროძრავითაა აღჭურვილი, ფრანგულმა კომპანია ”სეგულა მატრა ტექნოლოჯიზმა” მოამზადა, რომელსაც ამისათვის ორწელიწადნახევარი დასჭირდა. ავტომობილი ”სიმენსის” წარმოების ორი ელექტროძრავითაა აღჭურვილი, რომლებიც ”ჰიულენდის” მიერ სპეციალურად შექმნილ ორსაფეხურიან ტრანსმისიასთანაა შეწყვილებული.

სარბოლი ავტომობილის მონოკოკი და ძარა ფორმულა 1-ის გუნდ ”მერსედეს GP-ს” სპეციალისტებმა შეიმუშავეს, რისთვისაც მათ თავიანთი ბრეკლის ბაზის აეროდინამიკური მილი გამოიყენეს. მილში ჩასაბერად, მათ 1:5-ზე მასშტაბის მოდელი შექმნეს, როგორც ფოერმულა 1-ის ბოლიდის შემუშავებისას ხდება ხოლმე.

პროექტში მონაწილეობა საბურავების მწარმოებელმა ფრანგულმა კომპანია ”მიშლენმაც” მიიღო, რომელიც თავისი რადიკალური სიახლეებითაა ცნობილი. ამჯერად ”ბიბენდუმმა” (მიშლენს ხშირად მისი ლოგოს სახელითაც მოიხსენიებენ) ისეთი საბურავები შეიმუშავა, რომლებიც ენერგიის დაზოგვას უწყობს ხელს.

სარბოლი ელექტრომობილისთვის აკუმულატორები სამხრეთ აფრიკულმა კომპანია SAFT-მა მოამზადა. მისი ზომიდან გამომდინარე, აკუმულატორის ტევადობა დიდი არაა - ის საკმარისია მხოლოდ იმისათვის, რომ ძრავები ენერგიით 20-25 წუთის განმავლობაში უზრუნველყოს. ამასთან, მათ დასამუხტად 60-90 წუთია საჭირო. რა თქმა უნდა, ასეთი მცირე ტევადობის გამო, ამ მანქანით ხაგრძლივი რბოლების ჩატარება შეუძლებელი იქნება. თუმცა, არაა გამორიცხული, რომ აკუმულატორის ბლოკის სწრაფად შეცვლის სისტემა შემუშავდეს, რომელიც გუნდბს აკუმულატორის ბლოკის რბოლის დროს, პიტ-სტოპზე სწრაფად შეცვლის საშუალებას მისცემს.

”სეგულა მატრა ტექნოლოჯიზის” მიერ სხვა კომპანიებთან თანამშრომლობით შექმნილი ბოლიდი ადგილიდან 100 კმ/სთ სიჩქარის აკრეფას 3 წამში ასწრებს, მაქსიმალური სიჩქარე კი 250 კმ/სთ-ია. ავტომობილმა უკვე რამდენიმე ტესტ-სესია ჩაატარა. ჯერ ის გამოსაცდელად ავტოდრომ მანი კურზე გაიყვანეს, სადაც საჭეს ჯიულ ბიანკი მართავდა, შემდეგ კი ტესტები ლე მანის ”ბუგატის” ტრეკზე ჩატარდა და ამ დროს საჭესთან ალექსანდრ პრემა იჯდა.

ჯერჯერობით, ახალი სერიის რეგლამენტი და წესები არ გამოქვეყნებულა, თუმცა მისი ორგანიზატორები აცხადებენ, რომ მათ ათეტაპიანი ჩემპიონატის ჩატარება სურთ. ამასთან, ჩემპიონტში ხუთივე კონტინენტის ტრასებს გამოიყენებენ.

როსბერგი უკეთესი სეზონის მოლოდინშია

Rosberg confident of stronger 2011

21 დეკემბერი

ნიკო როსბერგი დარწმუნებულია, რომ ”მერსედეს GP-ს” მოწინავეთა შორის დაბრუნების უნარი შესწევს და მისი დახმარებით, ახალ სეზონში, რბოლებში გამარჯვებებისთვის ბრძოლის საშუალება მიეცემა. გერმანული გუნდი, რომელიც ინგლისის ბრეკლიშია ბაზირებული, გასული სეზონის დასაწყისში ლიდერთა შორის მოიაზრებოდა, თუმცა მეტად სუსტი სეზონი ჩაატარა.

”მერსედესმა” სულ რამდნჯერმე მოახერხა კვარცხლბეკზე ასვლა (სამივეჯერ როსბერგმა მესამე ადგილი დაიკავა), მის მიერ უხეიროდ მომზადებულმა მანქანამ კი სეზონი ჩაუფლავა დიდი პრიზების ცირკში დაბრუნებულ მიხაელ შუმახერს, რომელიც პირწმინდად დაჩრდლა მისმა ახალგაზრდა თანსმემამულემ.

ბევრის აზრით, წარუმატებლობის მთავარი მიზეზი ის იყო, რომ გუნდმა გვიან დაიწყო ახალი მანქანის მზადება, რადგან უფრო ადრე, ჩემპიონობისთვის იბრძოდა (ბრაუნის სახელით). მაგრამ როსბერგის აზრით, საქმეს საორგანიზაციო ცვლილებებიც უშველის და მანქანის შემუშავებისას რესურსების ნაკლებობა არაფერ შუაშია.

”გასულ სეზონში საუკეთესო გუნდი არ ვყოფილვართ, თუმცა მჯერა, რომ ერთ-ერთი საუკეთესო ტექნიკური პერსონალი გვყავს, რაც მომავალი სეზონისადმი ოპტიმიზმით აღმავსებს. როს ბრაუნი ძალიან გამოცდილი ხელმძღვანელია, თუმცა დროგამოშვებით, სწავლა მასაც უწევს და ვფიქრობ, გასულმა სეზონმა ბევრი რამ ასწავლა, ახლა მან იცის, რა სისუსტე გამოავლინა ჩვენმა გუნდმა და როგორ უნდა გაძლიერდეს, რომ პირველობისთვის ვიბრძოლოთ. მას ჯერ გუნდის ფორმირება არ დაუსრულებია და როცა ეს მოხდება, ყველა ჩვენგანის შესაძლებლობები მაქსიმალურად იქნება გამოყენებული”, - ამბობს როსბერგი.

მართალია, მას სჯერა, რომ მერსედესი” ახალ სეზონში უფრო ძლიერი გუნდი იქნება, თუმცა არ შეუძლია იმის თქმა, თუ რამდენად სწრაფად მოხდება ეს: ”მთელი ამ დროის განმავლობაში, როსი გუნდის რეორგანიზაციითაა დაკავებული. ჩემთვის ამ ეტაპზე ძნელი სათქმელია, თუ რამდენად ეფექტური და სწრაფი შედეგის მომტანი იქნება ეს ცვლილებები. და მაინც, ახალ სეზონს მოუთმენლად ველი, რადგან ვიცი, რომ ამჯერად გაცილებით უკეთესი მანქანით ასპარეზობის საშუალება გვექნება. მჯერა ჩვენი გუნდის, ბრეკლიში მომუშავე ადამიანების და იმის, რომ როცა მოწინავეთა რიგებს დავუბრუნდებით, იქ დიდხანს დავრჩებით”.

Monday, December 20, 2010

მონტეძემოლო: სპორტს არ სჭირდება სახელი ფორმულა 1

Sport Doesn't Need F1 Name – Ferrari

20 დეკემბერი

ბოლო ათი დღის განმავლობაში, ფორმულა 1-ის პერსონათაგან ყველაზე აქტიური და მისი გამონათქვამებიდან გამომდინარე, ყველაზე აქტუალური პიროვნება, ”ფერარის” შეფი ლუკა დი მონტეძემოლოა, რომელმაც ამჯერად გერმანულ გამოცემა ”აუტო მოტორ უნდ შპორტთან” საუბრით მიიქცია მსოფლიო მედიის ყურადღება.

ამ ინტერვიუს დროს, მან განვრცო ამას წინათ მის მიერვე ნათქვამი იმის შესახებ, რომ თუ ფორმულა 1-ის მსოფლიო ჩემპიონატის მონაწილეებს, რეკლამის გაყიდვიდან მიღებულ შემოსავალში მეტი წილი არ ექნებათ, ”ფერარი” ალტერნატიული ჩემპიონატის ჩამოყალიბებას ეცდება.

მსგავსი მუქარით, ”ფერარიმ” და სხვა გუნდებმა, საერთაშორისო საავტომობილო ფედერაციის (FIA) მაშინდელ პრეზიდენტ მაქს მოსლის დათმობაზე წასვლა 2009 წელს აიძულეს. მაშინაც, ფული განდგომის ერთ-ერთი ძირითადი მიზეზი იყო. თუმცა, თანხმობის ახალი ხელშეკრულების გაფორმების შემდეგ, შემოსავლების გადანაწილებაზე ლაპარაკი შეწყდა. ახლა კი, როგორც ჩანს, ეს თემა კიდევ ერთხელ, ახალ სიმწვავით წამოიჭრება და სავარაუდოდ, ის უფრო მწვავედ დადგება.

დი მონტეძემოლო ამბობს, რომ ჩემპიონატის მონაწილე გუნდები შემოსავლის მინიმალურ ნაწილს ღებულობენ. და ეს მაშინ, როცა ისინი დიდი პრიზების შოუს მთავარი შემოქმედები არიან და მათ გარეშე საქმე ჩაფლავდება. ამიტომ, ის სამართლიანად მიიჩნევს სპორტის ამ სახეობის მართვის ახალი პრინციპის ჩამოყალიბებას, რომელშიც მთავარ როლს გუნდები შეასრულებენ.

სხვათა შორის, ლუკა თვლის, რომ სერიის მართვის საუკეთესო მოდელი ამერიკის ეროვნული საკალათბურთო ასოციაციაა (NBA), რომელშიც მართვის სადავეები გუნდების ხელშია და საქმეს მათ მიერ არჩეული მენეჯერი (კომისიონერი) უძღვება. უფრო მეტიც, ის დარწმუნებულია, რომ სპორტს სრულებით არ სჭირდება სახელი ”ფორმულა ერთი”. მისი აზრით, თანხმობის ახალი ხელშეკრულების გაფორმების შემდეგ, მისი ფინანსური პირობები, ახლანდელისგან სრულიად განსხვავებული იქნება.

”ახლა იმაზე უნდა ვიფიქროთ, თუ როგორ მოვიქცეთ. ასე გაგრძელება აღარ შეიძლება. გვჭირდება სახელი ფორმულა ერთი? ვფიქრობ, ჩემპიონატის სხვა სახელით ჩატარებაც შეგვიძლია. რა თქმა უნდა, შეგვიძლია, ფ1-ის ახლანდელ მფლობელებთან ურთიერთობა გავაგრძელოთ, მაგრამ მხოლოდ იმ შემთხვევაში, თუ ფინანსური პირობები უკეთესი იქნება. თუ არა, მაშინ გუნდებმა ახალი კომპანია უნდა ჩამოაყალიბონ, რომელსაც სათავეში ბერნის ჩავუყენებთ. მარკეტინგის ახალ მეთოდებზე უნდა ვიფიქროთ და კარგი იქნება, თუ NBA-ს მოდელს გამოვიყენებთ”, - ამბობს დი მონტეძემოლო, ვინც ბერნი ეკლსტოუნს უპირატესობას იმის გამო ანიჭებს, რომ ის რბოლებითაა გატაცებული და სისხლხორცეულადაა დაინტერესებული ფ1-ის განვითარებით და მარტო ფული არ ამოძრავებს.

Friday, December 17, 2010

”ფერარი” ისევ ფორმულა 1-დან გასვლით იმუქრება

Ferrari Issues Breakaway Threat to the FIA

17 დეკემბერი

ამ დღეებში ყველა ელოდა, რომ იტალიის პრემიერ მინისტრი სილვიო ბერლუსკონი ნდობის ვოტუმს ვერ მიიღებდა და მისი სავარძლისთვის ახალი ბრძოლა დაიწყებოდა. ამ ბრძოლაში კი ”ფერარის” პრეზიდენტ ლუკა დი მონტეძემოლოს (ფოტოზე) ჩაბმა სრულიად რეალური იყო. მითუმეტეს, ორი კვირით ადრე, მან გამოაცხადა, რომ 16 დეკემბერს მნიშვნელოვან განცხადებას გამოაქვეყნებდა. ამ განცხადებასთან ერთად, პრესა პრემიერის პოსტისთვის ბრძოლაში მის ჩაბმას ელოდა...

მაგრამ ბერლუსკონის ნდობა გამოუცხადეს, დი მონტეძემოლოს კი შეპირებული პრესკონფერენცია უნდა ჩაეტარებინა. არადა, ორი დღით ადრე, იტალიურ მედიას სპეციალურად გამართულ ვახშამზე შეხვდა და თითქოს, რაც უნდა ეთქვა, ყველაფერი თქვა.

მაგრამ მალე გაირკვა, რომ ყველაფერი არ უთქვამს და მორიგ პრესკონფერენციაზე, საერთაშორისო საავტომობილო ფედერაციის (FIA) კრიტიკას მიჰყო ხელი. კერძოდ, მან განაცხადა, რომ ტექნიკური რეგლამენტის ხშირი ცვლილებით, ფედერაცია ფორმულა 1-ის გაძვირებას უწყობს ხელს. არადა, არაერთხელ გამოუცხადებია, რომ მის მიზანს, სპორტის ამ სახეობის გაიაფება წარმოადგენს.

”ფერარის” შეფი მართალია - ძრავებზე შემოღებული ახალი რეგლამენტი, გუნდებს და მათს პარტნიორებს, რომლებიც ძრავებს აწარმოებენ, უზარმაზარი ინვესტიციების გაღებას აიძულებენ, რადგან ახალი ძრავის შექმნას, ერთი და ორი ათეული მილიონი დოლარიც არ ეყოფა.

მეორეც, ძრავების გაძვირება აუცილებლად პრობლემებს შეუქმნის ახალ გუნდებს (და არამხოლოდ მათ), რომლებისთვისაც დამატებითი მილიონების შოვნა დიდ სირთულეს წარმოადგენს. ჰოდა, არაა გამორიცხული, რომ ზოგიერთმა მათგანმა, დიდი პრიზების ცირკი ფინანსური პრობლემების გამო დატოვოს.

აქ დი მონტეძემოლო ისაევ იმ საკითხს წამოჭრის, რომელზეც უკვე რამდენიმე წელია, ლაპარაკობს, თუმცა ამაოდ: ის კვლავ აცხადებს, რომ ძლიერი გუნდებისთვის მესამე მანქანის გამოყვანის უფლების მინიჭება, ბევრ პრობლემას გადაჭრის.

და, ყველაზე მთავარი, რაც ”ფერარის” ძრავების ახალ რეგლამენტში არ მოსწონს, არის აგრეგატის ცილინდრების რაოდენობა და ლიტრაჟი - ასეთ მცირელიტრაჟიან და ოთხცილინდრიან ძრავებს მარანელოელები არ აწარმოებენ. ამიტომ, მათთვის ამ არქიტექტურის მქონე ძრავების შექმნა უფრო მეტ სირთულეს წარმოადგენს, ვიდრე მრავალცილინდრიან ძრავებზე მუშაობა.

დი მონტეძემოლო სარეკლამო და სატელევიზიო ჩვენებიდან მიღებული შემოსავლების განაწილებითაა კმაყოფილი და აქ ისევ სამი მანქანის თემას წამოჭრის. ის თვლის, რომ ასე მოგებული ის გუნდები დარჩებიან, რომლებიც ფ1-ში ამინდს ქმნიან. დანარჩენები კი საჭირონი არ არიან...

დი მონტეძემოლო არ მალავს, რომ მას კალათბურთის ეროვნული ასოციაციის მოდელი მოსწონს, რომლის მიხედვითაც, პროფესიულ ლიგას თავად გუნდები განკარგავენ. ”ჩემთვის უმჯობესია, რომ კომერციულ საქმეებს ბერნი უძღვება. ის გამოცდილი და საქმის კარგად მცოდნეა. მაგრამ თუ საჭირო გახდა, სხვა პრომოუტერსაც მოვძებნით, ვინც ამ საქმეს არანაკლებ კარგად გააკეთებს. რაც უნდა იყოს, ეს ბიზნესი არც ისე რთულია”, - ამბობს ლუკა.

Wednesday, December 15, 2010

”ფერარი” ისევ სამი მანქანის გამოყვანას მოითხოვს

Ferrari still pushing for three-car teams

15 დეკემბერი

”ფერარის” პრეზიდენტი ლუკა დი მონტეძემოლო (ფოტოზე) აცხადებს, რომ ის კვლავაც გააგრძელებს ბრძოლას იმისათვის, რომ ფორმულა 1-ის მსოფლო ჩემპიონატის მონაწილე გუნდებს, სამ-სამი მანქანის გამოყვანის უფლება მიეცეს და შერბილდეს ტესტებზე მოქმედი შეზღუდვები.

იტალიურ პრესასთან საუბრისას, დი მონტეძემოლომ კიდევ ერთხელ აღნიშნა, რომ არ ეთანხმება წესს, რომელიც გუნდებს მესამე მანქანის გამოყვანის უფლებას უკრძალავს და დასძინა, რომ მსოფლიო ჩემპიონატის მონაწილეთა სიის გაზრდას, ძლიერი და პოპულარული საჯინიბოებისთვის ორზე მეტი მანქანით ასპარეზობის უფლების მიცემა სჯობდა. ასე რბოლები უფრო დაძაბულიც იქნებოდა და საინტერესო საცქერიც.

”პატარა გუნდები? არაერთხელ მითქვამს და ისევ ამ აზრზე ვდგავარ, რომ უკეთესი იქნებოდა, ძლიერი გუნდებისთვის მესამე მანქანის გამოყვანის უფლება მიგვეცა. ეს ახალი გუნდბის დაშვებაზე გაცილებით უკეთესი იქნებოდა. ზოგი მათგანი ხომ გრანპრი2-ის რბოლებშიც მაჩანჩალა იქნებოდა”, - ამბობს დი მონტეძემოლო.

გარდა ამისა, იტალიური საჯინიბოს შეფი თვლის, რომ სეზონის მსვლელობისას ტესტების აკრძალვა, საქმისადმი არაჯანაღი მიდგომაა და სასწრაფოდ შეცვლას მოითხოვს: ”ამ აბსურდული შეზღუდვის გაუქმება აუცილებელია. ფორმულა 1 სპორტის ერთადერთი სახეობაა, სადაც სპორტსმენებს ვარჯიშის შანსი არ აქვთ. ეს იგივეა, რომ ”მილანის”, ”რეალის” ან ”ინტერის” ფეხბურთელები, წვიმაში გლუვძირიანი ბუცებით ავარჯიშო, ჩემპიონთა ლიგის შეხვედრების წინ კი გახურების საშუალება არ მისცე”, - ამბობს ლუკა.

მას არც ახალი ტრასების კონფიგურაცია მოსწონს, რადგან იქ გასწრება ძალიან გართულებულია. ის სრულად იზიარებს FIA-ს პრეზიდენტ ჟან ტოდტის მოსაზრებას, ვისაც მიაჩნია, რომ ახალი ტრასების მშენებლობისას, პრიორიტეტი გასწრების შესაძლებლობა უნდა იყოს. სამაგიეროდ, მოსწონს გუნდურ მითითებებზე აკრძალვის გაუქმება და ამბობს, რომ ამ ნაბიჯით, FIA-მ სწორი გეზი აიღო.

Friday, December 10, 2010

ფორმულა 1-ში ტურბო ძრავები ბრუნდება

FIA Confirms Turbo Engines for 2013

10 დეკემბერი

მონაკოში ჩატარდა საერთაშორისო საავტომობილო ფედერაციის (FIA) ავტოსპორტის მსოფლიო საბჭოს სხდომა, რომელზეც ფორმულა 1-ის ტექნიკურ რეგლამენტში რამდენიმე მნიშვნელოვანი ცვლილება შევიდა. მთავარი ცვლილება კი ძრავებს ეხება და ის ძალაში 2013 წლის სეზონიდან ამოქმედდება.

ახალი რეგლამენტით, ფ1-ში სავალდებულო გახდება ოთხცილინდრიანი, 1.6-ლიტრიანი ტურბოძრავების გამოყენება. ტურბოდამჭირხნებში დასაშვები მაქსიმალური წნევა 500 ბარი იქნება, ძრავის ბრუნთა მაქსიმალური რიცხვი კი - 12 000. წინასწარი ვარაუდთ, ამ ძრავების დახმარებით, საწვავის ხარჯი დაახლოებით 35 პროცენტით შემცირდება.

ავტომობილები ასევე საწვავის ხარჯის კონტროლისა და კინეტიკური ენერგიის რეკუპერაციის სისტემებითაც აღიჭურვება. რაც მთავარია, ძრავების სიმძლავრე პრაქტიკულად არ შემცირდება (ახლანდელ ძრავებთან შედარებით). სამაგიეროდ, (სავარაუდოდ) შეიცვლება გუნდებს შორის ამჟამად დამყარებული ძალთა ბალანსი და ჩამორჩენილ ”რენოს” ”მერსედესისა” და ”ფერარის” დაწევის საშუალება მიეცემა.

2013 წლის სეზონში, ყოველი პილოტის განკარგულებაში მხოლოდ ხუთი ძრავი იქნება, თუმცა შემდეგში მათი რიცხვი ოთხამდე შემცირდება. რაც შეეხება გადაცემათა კოლოფებს, მომავალი სეზონიდან, მათი შეცვლა ზედიზედ ხუთი რბოლის განმავლობაში აკრძალულია. ამ წესის დარღვევის შემთხვევაში, პილოტი სტარტზე ხუთი ადგილით დაჯარიმდება.

იცვლება შასისთან დაკავშირებული რეგლამენტიც. ახალი განსაზღვრება მიეცა ეგრეთ წოდებულ საბაზო სიბრტყეს (ავტომობილის ძირს). ასევე უფრო მკაცრი ნორმები წესდება უსაფრთხოების ელემენტებზე. დასაშვები გახდა ისეთი პანელების გამოყენება, რომელთა დანიშნულებაც პილოტების ფეხების დაცვაა.

რიგი ცვლილებები შევიდა იმ პუნქტებში, რომლებშიც რბოლებიც რბოლების ორგანიზატორების და მსაჯების შესასრულებელია. რეგლამენტით დასაშვები გახდა ეგრეთ წოდებული საშუალედო საბურავების გამოყენება. დაკიდევ, ამირიდან აღარ იკრძალება გუნდური მითითებები.

Wednesday, December 8, 2010

ნამდვილი ”ლოტუსი” დაბრუნდა

Lotus Returns to F1

8 დეკემბერი

როგორც მოსალოდნელი იყო, მომავალ სეზონში ”რენო” თავისი გუნდით აღარ იასპარეზებს. მის გუნდს სახელად ”ლოტუს რენო GP” დაერქვა და ის შავ-ყვითელ ფერებში გამოეწყობა. ამგვარად, ფორმულა ერთში მეორე გუნდი გამოჩნდა, რომელსაც სახელად ”ლოტუსი” ჰქვია. თანაც, ორივე მალაიზიურ კომპანიებს ეკუთვნის და ორივე შავად გაფორმდება.

”რენომ” თავისი საჯინიბოს აქციები შვეიცარულ საინვესტიციო კომპანია ”ჯენიი კეპიტალს” მიჰყიდა. პარალელურად, გუნდის თანამეპატრონე გახდა მალაიზიურ საავტომობილო ჯგუფ პროტონში შემავალი ინგლისური კომპანია ”ლოტუსი”, რომელიც ლეგენდარული კოლინ ჩეპმენის მიერაა ჩამოყალიბებული, იმ ჩეპმენისა, რომელმაც ”ლოტუსის” ფორმულა 1-ის ლეგენდას დაუდო სათავე.

რაც შეეხება მეორე ”ლოტუსს” (მისი სრული სახელია ტიმ ლოტუს), ის მალაიზიურ ავიაკომპანია ”ეარ აზიას” კუთვნილებაა. ამ გუნდსაც მომავალი სეზონიდან ძრავებით ”რენო” მოამარაგებს. რაც შეეხება შავ-ყვითელ ფერებს, ესეც ძველი ”ლოტუსის” საფირმო ფერებია.

როგორც ჩანს, ახალი სეზონის დასაწყისში, ჩემპიონატში ორი ”ლოტუსი” მიიღებს მონაწილეობას. ”ტიმ ლოტუსს”, რომელმაც გასული სეზონი ”ლოტუს რეისინგის” სახელით დაიწყო, სახელთან დაკავშირებით, ”ლოტუს გრუპი” სასამართლოში უჩივის. საქმეს ლონდონის უმაღლესი სასამართლო განიხილავს, თუმცა მოსმენები რომ დაიწყება, ჩემპიონტი კარგა ხნის დაწყებული იქნბა.

სხვათა შორის, ორივე ”ლოტუსს” საფუძვლიანი პრეტენზია გააჩნია. ”ტიმ ლოტუსის” პატრონმა, მალაიზიელმა ბიზნესმენმა ტონი ფერნანდესმა, ამ სახელის გამოყენების უფლება თავის დროზე, დევიდ ჰანტისგან - მსოფლიოს 1976 წლის ჩემპიონ ჯეიმს ჰანტის ძმისგან გამოისყიდა. სწორედ ის იყო ფ1-ის ლეგენდარული საჯინიბოს სახელის კომერციულ უფლებათა პატრონი.

”ლოტუს რენო” კი საავტომობილო კომპანია ”ლოტუს ქარზის” ხელშია. ბედის ირონიაა, რომ ორივე ”ლოტუსი” ერთ დროს მისი დამაარსებლის, კოლინ ჩეპმენის საკუთრება იყო, მაგრამ მისი სიკვდილის შემდეგ, კომპანია ნაწილებად დაიშალა. ამის შემდეგ, ფ1-ის ”ლოტუსს” ჰანტი დაეუფლა, სპორტული ავტომობილების მწარმოებელი კომპანია კი მალაიზიურმა ავტო კომპანია ”პროტონმა” შეისყიდა.

ახლავე შეიძლება იმის თქმა, რომ ”ლოტუს რენო GP” ფორმულა ერთში 2017 წლამდე დარჩება და ამ პერიოდში, მისი ტექნოლოგიური პარტნიორი ფრანგული კომპანია იქნება, რომელიც ძრავების მიწოდების გარდა, საჯინიბოს ტექნოლოგიურ უზრუნველყოფასაც კისრულობს.

Monday, December 6, 2010

რედ ბულ RB7” ვალენსიურ ტესტებამდე მზად იქნება

Red Bull to Launch RB7 Before Valencia Test

6 დეკემბერი

ფორმულა 1-ის ახალი ჩემპიონის, ”რედ ბულ რეისინგის” ახალი სარბოლი ბოლიდი - RB7, სეზონისწინა ტესტებამდე მზად იქნება. ამის თაობაზე, გერმანულ გამოცემა ”ჰამბურგერ აბენდბლატთან” საუბრისას განაცხადა მსოფლიოს ახალმა ჩემპიონმა, გერმანელმა სებასტიან ფეტელმა. თუმცა, ეს გუნდის ოფიციალური განცხადება არაა. ”როგორც ჩანს, ჩვენი მანქანა დროულად იქნება მზად და ჩვენ ვალენსიაში პირველივე ტესტებზე გამოვალთ”, - ამბობს ჩემპიონი.

უნდა ითქვას, რომ რამდენადაც ”რედ ბული” ორივე ტიტულისთვის იბრძოდა, მის ტექნიკურ დირექტორ ედრიან ნიუის ახალი მანქანისთვის არ ეცალა. გუნდმა მიზანს მიაღწია - ორივე ტიტულს დაეუფლა, მაგრამ მომავალი სეზონის მანქანის მზადება გვიან დაიწყო. ამის გამო, არსებობს საფუძვლიანი ვარაუდი, რომ ვალენსიური ტესტებისთვის მისი მომზადება ვერ მოესწრება.

დაახლოებით ასევე იყო 2009 წლის სეზონის შემდეგაც, როცა ”რედ ბული” ასევე პირველობისთვის იბრძოდა და ამის გამო, შემდეგი სეზონის მანქანისთვის არ ეცალა. ამასთან, ნიუის უბრალო დეტალებზე კირკიტიც სჩვევია, რამაც საქმე გააჭიანურა. ყოველივეს გამო, გუნდს წლევანდელი სეზონისთვის მანქანის მომზადება დაუგვიანდა და ხერესული ტესტები გამოტოვა. თუმცა ნიუის სასახელოდ უნდა ითქვას, რომ მან საჩემპიონო ბოლიდის შექმნა მაინც შეძლო.

ჯერჯერობით, ოფიციალურად მხოლოდ ორ გუნდს აქვს გამოცხადებული თავისი ახალი მანქანის პრეზენტაციის თარიღი. ესენია ”ტორო როსო” და ”ზაუბერი”. პირველის STR6 მზად ვალენსიური ტესტების წინ, თებერვლის დასაწყისში იქნება, მეორეს (C30) პრეზენტაცია კი ასევე ვალენსიაში, 31 იანვარს გაიმართება.

უებერმა სეზონი ტრავმირებული მხრით დაასრულა

Webber Raced with Broken Shoulder in Last 4 Races

6 დეკემბერი

ავსტრალიელი მარკ უებერისთვის გასული სეზონი საუკეთესო იყო კარიერაში. მას ჩემპიონობის რეალური შანსი ჰქონდა და ჩემპიონატის დასრულებამდე 4 ეტაპით ადრე, სოლიდური უპირატესობით ლიდერობდა, თავის თანაგუნდელ სებასტიან ფეტელს კი ერთი გამარჯვების ტოლფასი ქულებით უსწრებდა. თუმცა საბოლოოდ ტიტულს სწორედ ფეტელი დაეუფლა. ოზი პილოტი კი მხოლოდ მესამე ადგილს დასჯერდა.

სეზონის დასრულებიდან ერთი თვის შემდეგ კი ირკვევა მიზეზი, რომლის გამოც, უებერმა სეზონის ბოლო ნაწილი ჩააგდო. ეს მიზეზი კი მისი ველოსპორტით გატაცებაა. ფორმულა 1-ის მოყვარულებს ალბათ ახსოვთ, რომ 2009 წლის სეზონის დაწყებამდე ცოტა ხნით ადრე, უებერი მთის ველოსიპედით ასპარეზობისას (მის მიერვე ორგანიზებულ რბოლაში) დაეცა და ფეხი მოიტეხა. მაშინ იყო იმის შანსი, რომ ამის გამო, სეზონის დასაწყისი გამოეტოვებინა კიდეც. მაგრამ უებერმა სტარტზე დადგომა შეძლო და ბრწყინვალედ იასპარეზა. მოგვიანებით კი გაირკვა, რომ სეზონის პირველი ნაწილის განმავლობაში, ის ძლიერ ტკივილებს ძლივს, გამაყუჩებლებით უმკლავდებოდა...

გავიდა ცოტა ხანი და ისტორია განმეორდა. გასული სეზონის მიწურულს, სინგაპურში რბოლის შემდეგ, სადაც მესამე ადგილს დასჯერდა, უებერი შინ გაემგზავრა და ისევ სამთო ბაიკს მოაჯდა, მაგრამ ისევ დაეცა და ამჯერად მხარი დაუზიანდა. ამჯერად ექიმების დიაგნოზი იყო ”მოთხილამურეების მოტეხილობა”. როგორც ირკვევა, ეს სერიოზული ტრავმა არაა, თუმცა მხრის სახსრების მუშაობას ართულებს.

მოკლედ, უებერმა ამის თაობაზე გუნდში არაფერი თქვა, რა თქმა უნდა, მომხდარი ”რედ ბულ რეისინგის” შეფ ქრისტიან ჰორნერსაც დაუმალა. მისი ტრავმის შესახებ მხოლოდ მისმა პირადმა მწვრთნელმა როჯერ კლირლიმ და საერთაშორისო საავტომობილო ფედერაციის (FIA) ექიმმა გარი ჰარტშტაინმა იცოდა. ტკივილების გასაყუჩებლად, კორეისა და იაპონიის რბოლების წინ, უებერს კორტიზონის ინექციებიც კი დასჭირდა.

მოკლედ, ველოსიპედებით გატაცება ძაიან ძვირი დაუჯდა...

Sunday, December 5, 2010

ალონსო ”ფერარიში” ათი წლით დარჩება

Alonso Plans 10-Year Career with Ferrari

5 დეკემბერი

მიუხედავად იმისა, რომ გასულ სეზონში, მსოფლიოს ჩემპიონის მესამე ტიტულამდე ერთი ნაბიჯი დააკლდა და ეს გუნდური მცდარი სტრატეგიის ბრალი იყო, ესპანელი ფერნანდო ალონსო თავისი გამოსვლით მაინც კმაყოფილია და ამბობს, რომ შემდგომ ათ სეზონს იტალიურ გუნდში გაატარებს.

29 წლის პილოტი ამბობს, რომ ”ფერარის” შემდეგ არსად გადასვლას არ აპირებს და კარიერას ამ გუნდშივე დაასრულებს. ამის შესახებ, მან ესპანურ რადიო ”ონდა სეროსთან” საუბრისას განაცხადა. პირველ რიგში, ის იმ ფაქტითაა კმაყოფილი, რომ ორწლიანი პაუზის შემდეგ, ისევ მიეცა ჩემპიონობისთვის ბრძოლის შანსი.

”შესანიშნავი სეზონი მქონდა. საერთო ჯამში, უკმაყოფილების საბაბი არ მაქვს. არ ვიცი, მომავალ სეზონშიც იმავე პერსონალთან მომიწევს თუ არა მუშაობა, მაგრამ იმის თქმა კი შემიძლია, რომ ჩვენ კარგად შეკრული გუნდი ვართ და მანქანაც კონკურენტული გვქონდა”, - ამბობს ესპანელი, ვინც ჯერ არ იცის, რა გადაადგილებებია მოსალოდნელი ”ფერარიში”.

ალონსო იტალიურ გუნდში 2009 წლის სეზონის ბოლოს გადავიდა და მასთან სამწლიანი კონტრაქტი გააფორმა. ამასთან, ”ფერარის” უფლება აქვს, რომ ორი წლის შემდეგ, მასთან კონტრაქტი კიდევ სამი წლით გაახანგრძლოვოს. ამგვარად, მსოფლიოს ორგზის ჩემპიონი, ”კვიცებთან” მინიმუმ 5 სეზონს დაჰყოფს და თუ ყველაფერი კარგად იქნა, იქ უფრო მეტი ხნითაც დარჩება.

სხვათა შორის, ალონსო დღესაც ნანობს, რომ ერთი სეზონი ”მაკლარენში” გაატარა. უფრო მეტიც, დასძენს, რომ 2007 წელს ჩემპიონიც რომ გამხდარიყო, იქ მაინც არ დარჩებოდა. რა თქმა უნდა, ახლა ამბობს, რომ ამ გუნდში აღარასდროს დაბრუნდება. მას ჰკითხეს, ლუის ჰამილტონის ჩემპიონობას სებასტიან ფეტელის ტრიუმფი თუ ერჩივნა, რაზეც სწრაფად უპასუხა - ”სი” (კი).

Friday, December 3, 2010

ალონსო სეზონის საუკეთესო პილოტად დასახელდა

Fernando Alonso Voted Off Best F1 Driver of 2010

3 დეკემბერი

სებასტიან ფეტელი მსოფლიო ჩემპიონი კი გახდა, მაგრამ ჟურნალ ”ავტოსპორტის” მიერ ჩატარებულმა გამოკითხვამ, სეზონის საუკეთესო პილოტად ფერნანდო ალონსო დაასახელა. გამოკითხვაში მხოლოდ ფორმულა 1-ში მონაწილე 12 გუნდის ხელმძღვანელები მონაწილეობდნენ, რომლებსაც 10-10 საუკეთესო პილოტი უნდა დაესახელებინათ.

კონკურსის წესი მარტივია - ყოველ ანკეტაში, პილოტი ქულებს დაკავებული ადგილის შესაბამისად ღებულობს, ქულათა სისტემა კი ფორმულა ერთის სისტმის იდენტურია (ანუ 25-18-15-12-10-8-6-4-2-1).

მიუხედავად იმისა, რომ ალონსომ და ”ფერარიმ” სეზონის პირველი ნახევარი აშკარად ჩააგდეს, მეორე ნახევარში პირიქით, მათი ტანდემი თითქმის საუკეთესო იყო, რამაც მათ ტიტულისთვის ბრძოლის შანსი მისცა. და რომ არა ბოლო რბოლაში არჩეული მცდარი სარბოლო სტრატეგია, ესპანელი პილოტი მესამედ გახდებოდა მსოფლიო ჩემპიონი.

ბევრი თვლის, რომ ალონსომ თავის კარიერაში საუკეთესო სეზონი ჩაატარა და ჩემპიონობასაც იმსახურებდა. ყოველ შემთხვევაში, ასე ფიქრობენ ”ფერარიში”, რომლის ტექმიკური პერსონალის მონდომებამაც ალონსოზე დიდი გავლენა მოახდინა.

”ძალიან მიხარია, რომ გუნდების ხელმძღვანელთა უმეტესობამ, სეზონის საუკეთესო მრბოლად მიმიჩნია. რა თქმა უნდა მერჩივნა, ეს აღიარება მსოფლიო ჩემპიონის რანგში მიმეღო. თუმცა, ბოლო ეტაპზე გაწბილების მიუხედავად, მაინც შემიძლია ვთქვა და გამოკითხვის შედეგებიც ამას მოწმობს, რომ შესანიშნავი სეზონი ჩავატარე. გუნდთან ერთად, მთელი ჩემპიონატის განმავლობაში, ბოლომდე ვიბრძოლე და დანებებაზე ერთხელაც არ მიფიქრია. არადა იყო მომენტი, როცა ყველა ფიქრობდა, რომ ჩვენთვის სეზონი წარუმატებელი იქნებოდა. ალბათ, მომავალ სეზონში უკეთ გავირჯებით, თუმცა გასულ სეზონს ყოველთვის გავიხსენებ, როგორც გასაოცარს”, - ამბობს ალონსო.

გამოკითხვის შედეგებით, მეორე ადგილი ფეტელმა დაიკავა, რომელსაც ლუის ჰამილტონი და მარკ უებერი მოჰყვებიან. ”ავტოსპორტის” გამოკითხვის საუკეთესო ათეული ასე გამოიყურება:

1. ფერნანდო ალონსო - 229 ქულა; 2. სებასტაინ ფეტელი - 220; 3. ლუის ჰამილტონი - 196; 4. მარკ უებერი - 146; 5. რობერტ კუბიცა - 129; 6. ჯენსონ ბეტონი - 86; 7. ნიკო როსბერგი - 68; 8-9. ნიკო ჰულკენბერგი - 17; 8-9. ფელიპე მასა - 17; 10. რუბენს ბარიკელო - 11

Thursday, December 2, 2010

ფეტელი სტატისტიკითაც საუკეთესოა

Statistics Show Vettel Best Driver of 2010

2 დეკემბერი

სებასტიან ფეტელი მსოფლიო ჩემპიონ ისე გახდა, სეზონის განმავლობაში, ლიდერი ერთხელაც არ ყოფილა. ცხრილს სათავეში ერთადერთხელ - ბოლო რბოლის შემდეგ მოექცა და ტიტულსაც დაეუფლა. თან, ბევრი ამბობს, რომ ფერნანდო ალონსოს და ”ფერარის” ტაქტიკური შეცდომა რომ არა, ჩემპიონი ესპანელი გახდებოდა.

მაგრამ გერმანულმა ჟურნალმა ”აუტო მოტორ უნდ შპორტმა” კარგად შეისწავლა ტოპ პილოტების სტატისტიკური მონაცემები, რომლებმაც აჩვენა, რომ ფეტელი პრაქტიკულად ყველა ასპექტში სჯობდა თავის მეტოქეებს. სტატისტიკა კი თითქმის ყოველთვის, ზუსტად ასახავს, თუ როგორ ჩაატარა მრბოლმა სეზონი.

და რატომ გაუჭირდა ფეტელს ჩემპიონობა? საქმე ისაა, რომ ახალგაზრდა გერმანელმა მეტისმეტად ბევრი შეცდომაც დაუშვა, რაც მას ლამის მარცხის ფასად დაუჯდა. ისე კი, ერთადერთი მაჩვენებელი, რომელშიც მას ალონსომ რეალური კონკურენცია გაუწია, გამარჯვებათა რაოდენობაა - ორივე პილოტმა 5-5 რბოლა მოიგო.

სხვა მაჩვენებლების მხრივ, ფეტელს ბადალი არ ჰყავდა. მაგალითად, 19 ეტაპიდან, მან 10-ის პოულ პოზიცია მოიგო. შედარებისთვის, მხოლოდ ხუთი საკვალიფიკაციო რბოლის მოგება შეძლო მისმა ავსტრალიელმა თანაგუნდელმა მარკ უებერმა. რბოლებში კი ფეტელის საშუალო სეზონური პოზიცია 1.95 ადგილია. შედარებისთვის, უებერი მსგავსი მაჩვენებელი 2.79-ია, ალონსოსი კი - 5.79.

პილოტის სისწრაფის კიდევ ერთი მაჩვენებელია რბოლისას გავლილი უსწრაფესი წრეები. ამ მხრივ, ფეტელის საშუალო მაჩვენებელი 0.051 წამით სჯობნის უებერისას. სხვათა შორის, ოზი პილოტიც დანარჩენებზე ბევრ ასპექტში უკეთესია, თუმცა ”რედ ბულ რეისინგის” წყვილს ასეთი სოლიდური უპირატესობის მიუხედავად, მაინც დიდი ბრძოლის გადატანა დასჭირდა იმისათვის, რომ მათგან რომელიმე ჩემპიონი გამხდარიყო და ამის მიზეზი ისევდაისევ, ხშირი შეცდომებია. ამასთან, სეზონის დასაწყისში, მათი ბოლიდიც საკმაოდ არასაიმედო იყო.

კიდევ ერთი საინტერესო სტატისტიკური მაჩვენებელი: სეზონის განმავლობაში, ფეტელი პელოტონს სათავეში 2000 კილომეტრის მანძილზე ედგა. უებერის შესაბამისი მაჩვენებელი 1500 კილომეტრზე ნაკლებია. შემდეგ მოდიან ლუის ჰამილტონი, ალონსო და ჯენსონ ბატონი.

ალონსოს ხელი ”ფერარის” გამძლეობამაც შეუწყო. იტალიური გუნდის მანქანებმა სეზონის განმავლობაში, ყველაზე მეტი წრის გავლა შეძლეს. ამასთან, ალონსოს რბოლისას 5 უსწრაფესი წრე ჰქონდა, ზუსტად იმდენი, რამდენიც ჰამილტონს. მხოლოდ სამი უსწრაფესი წრის გავლა მოახერხა ფეტელმა.

Wednesday, December 1, 2010

”უილიამსის” მეორე პილოტი მალდონადო გახდა

Pastor Maldonado Lands 2011 F1 Seat with Williams

1 დეკემბერი

”უილიამსმა” გამოაცხადა, რომ მომავალ სეზონში, მისი მეორე პილოტი ვენესუელელი პასტორ მალდონადო იქნება. სარბოლ სერია გრანპრი2-ის ჩემპიონი პარტნიორობას ბრაზილიელ ვეტერან რუბენს ბარიკელოს გაუწევს. ამგვარად, 1984 წლის შემდეგ, 25 წლის მალდონადო პირველი ვენესუელელი პილოტი გახდება, ვინც ფ1-ის მანქანის საჭეს მიუჯდება. მის თანამემამულეთაგან დიდი პრიზების ცირკში ბოლოს ჯონი სეკოტომ იასპარეზა.

კონტრაქტი მხოლოდ ერთ სეზონზე გაფორმდა და მალდონადო მას ვენესუელას სახელმწიფო ნავთობკომპანიას უნდა უმადლოდეს, რომელიც ზოგიერთი ავტორიტეტული გამოცემის ვარაუდით, ინგლისურ გუნდს ამისათვის 15 მილიონ ევროს გადაუხდის.

”პასტორმა ჩემი ყურადღება პირველად სამი წლის წინ მიიქცია, როდესაც მონაკოს რბოლაში იასპარეზა. მას შემდეგ, მან არაერთხელ გამოავლინა თავისი ნიჭი. ამ სეზონში კი გრანპრი2-ში ექვსი რბოლა მოიგო და ჩემპიონი გახდა, რაც შემთხვევით ვერ მოხდებოდა. აბუ დაბიში მან ჩვენთან ერთად მიიღო ტესტებში მონაწილეობა და მაშინ გადავწყვიტეთ, რომ მისი ნიჭი წინასასეზონო ტესტებზეც გაგვევითარებინა”, - ამბობს გუნდის დამაარსებელი და თანამფლობელი ფრენკ უილიამსი.

”ჩემთვის დიდი პრივილეგიაა, რომ დბიუტი ისეთ გუნდში მექნება, როგორიც ”უილიამსია”. ამით, ჩემთვის ისედაც შესანიშნავი სეზონი დაგვირგვინდა. აბუ დაბიში გუნდთან ერთად ტესტებში უკვე მივიღე მონაწილეობა, თუმცა მოუთმენლად ველი იმ მომენტს, როდესაც ახალი სეზონისთვის მზადებას დავიწყებ. რა თქმა უნდა, თავს არ დავზოგავ, რომ შემდეგი სეზონისთვის საუკეთესო ფიზიკურ ფორმაში ვიყო. დარწმუნებული ვარ, გუნდიც მისთვის შესაფერის დონეზე მოემზადება. თითქმის 30 წელია, ჩემი ქვეყნიდან ფორმულა 1-ში არავის უასპარეზია და ჩემთვის დიდი პატივია, რომ მისი სახელით ასპარზობის საშუალება მომეცემა. ყველაფერს ვეცდები, კარგი შედეგებით დავაფასო ვენესუელას ის მხარდაჭერა, რომლის წყალობიტაც ფ1-ში გამოსვლის საშუალება მომეცა”, - ამბობს მალდონადო, ვინც ”უილიამსში” გერმანელ ნიკო ჰულკენბერგს შეცვლის.

Monday, November 29, 2010

”ფერარი” საბრძოლო განწყობაზეა

Luca di Montezemolo

29 ნოემბერი

მიუხედავად იმისა, რომ მსოფლიო ჩემპიონის ტიტული ხელიდან ბოლო რბოლაში გაუშვა, ”ფერარის” პრეზიდენტი ლუკა დი მონტეძემოლო განვლილი სეზონით მაინც კმაყოფილია...

”ძალიან დიდი ხანია, რაც ფორმულა 1-ში ვმუშაობ და ფინალურ რბოლაში ჩემპიონატი პირველად არ წამიგია. 1974 წელს უოტკინს გლენში (აშშ) ვიყავი, როდესაც ბოლო რბოლაში კლეი რეგაცონიმ ემერსონ ფიტიპალდისთან წააგო. შემდეგ 1997 წელს ხერესის რბოლას ვესწრებოდი, სადაც ჟაკ ვილნევმა მიხაელ შუმახერს მოუგო, მომდევნო წელს კი შუმახერმა ტიტული ბოლო მომენტში გაუშვა ხელიდან. ყველაზე ძნელი კი 2008 წლის სეზონის ბოლო გამოდგა, როცა ინტერლაგუშზე ფელიპე მასამ ფინიშის ხაზი ჩემპიონის რანგში გადაკვეთა, მაგრამ ტიტული იმ მომენტში დაკარგა, როდესაც ჰამილტონმა გლოკს გაასწრო.

მაგრამ მთავარი ისაა, რომ 1997 წლიდან მოყოლებული, რამდენიმე გამონაკლისის გარდა, ”ფერარი” ტიტულის პრეტენდენტთა შორის იყო. გამარჯვება და მარცხი სპორტის ორი განუყოფელი ნაწილია. და ისინი ერთდროულად, შესანიშნავიც შეიძლება იყოს და საშინელიც.

ძალიან მესიამოვნა, როცა აბუ დაბის რბოლის შემდეგ, ჩვენი გუნდის წევრებმა ყურები კი არ ჩამოყარეს, არამედ მათ სიბრაზე მოემატათ. ახლა ყველა იმაზე ოცნებობს, რომ მომავალ სეზონში ერთი ნაბიჯით წინ წავიწიოთ. ახლა ჩვენი მთავარი მიზანია, შევქმნათ მანქანა, რომელიც სეზონის დასაყისიდანვე კონკურენტუნარიანი იქნება და თავიდანვე გამარჯვებებისთვის ბრძოლის საშუალებას მოგვცემს. მთავარია, მდევრის როლში ყოფნამ და შუა სეზონში ამოქაჩვამ არ მოგვიწიოს.

მომავალ სეზონში ბევრი ტექნიკური სიახლე გველის. ჯერ ერთი, ”პირელის” საბურავებზე გადავდივართ. მეორეც, კერს-ი (კინეტიკური ენერგიის რეკუპერაციის სისტემა) ბრუნდება და რეგულირებადი უკანა ფრთის გამოყენების უფლება გვეძლევა. ჩვენ ამისათვის მზად ვართ - წინა სეზონის ბოლოსთვის, ჩვენი კერს-ი ერთ-ერთი საუკეთესო იყო. რაც შეეხება უკანა ფრთას, მთავარია, რომ ახალი სეზონი მკაფიოდ განსაზღვრული რეგლამენტით დავიწყოთ, რომელიც შუა სეზონში, ზოგიერთი გუნდის ფრთის ლეგალურობასთან დაკავშირებულ კითხვებს არ წარმოქმნის.

გასული სეზონის შემდგ, ”ფერარი” მისთვის მეტად მნიშვნელოვანი ახალი სეზონის ზღურბლზეა. ლაპარაკია სპორტზეც და ბიზნესზეც - ავტომობილების წარმოებაზე. ბევრ სიახლეს ვამზადეთ და მთავარი ისაა, რომ ფორმულა 1-ში მკაფიო მიზნები გვაქვს.

აბუ დაბის რბოლის შემდეგ, ჩვენი ბიჭები ტიროდნენ, მე კი მათ ვუთხარი, რომ ყურადღება მომავალ სეზონზე გადაეტანათ. ”ფერარის” ძალა ისაა, რომ ჩვენ არასდროს ვნებდებით. ცვლილებები გუნდში? ეს საქმისადმი ჩვენეული მიდგომა არაა. წლების განმავლობაში, ჩვენ გამოვიმუშავეთ პოლიტიკა, რომელიც დინამიურ სტაბილურობაზეა დაფუძნებული. მის მიხედვით, შესაძლებელია მცირე კორექტივები, მაგრამ არა რადიკალური რეფორმები.

სხვა თუ არაფერი, აბუ დაბის რბოლის სხვა შედეგის შემთხვევაში, ჩვენი საუბრის თემა სულ სხვა იქნებოდა. ნებისმიერ შემთხვევაში, ალონსო შესანიშნავი იყო როგორც ტრასაზე, ისე მის მიღმაც. ის გუნდის ნამდვილი ლიდერია. მომავალ სეზონში ბევრს ველი ფელიპესგანაც. დარწმუნებული ვარ, მომავალ სეზონში ის ისეთივე ძლიერი მრბოლი იქნება, როგორიც 2008 წელს იყო”, - ამბობს დი მონტეძემოლო (ფოტოზე).