ფორმულა 1-ის სიახლეები ნახეთ საიტ ავტო პანორამა/ავტო მოტორზე

ფორმულა 1-ის სიახლეები ნახეთ საიტ ავტო პანორამა/ავტო მოტორზე
ფორმულა 1-ის სიახლეები ნახეთ საიტ ავტო პანორამა/ავტო მოტორზე

Wednesday, December 23, 2009

ჩემპიონთა ჩემპიონი დაბრუნდა

Schumacher makes F1 return

23 დეკემბერი

”მერსედეს-ბენცმა” ოფიციალურად გამოაცხადა, რომ მომავალ სეზონში მის ფორმულა 1-ის გუნდში მსოფლიოს შვიდგზის ჩემპიონი, გერმანელი მიხაელ შუმახერი იასპარეზებს, ვისაც 3 ინვარს 41 წელი შეუსრულდება.

შუმახერის დაბრუნებასა და ”მერსედეს GP-ში” გადასვლას მიმომხილველები ჯერ კიდევ მას შემდეგ ვარაუდობდნენ, რაც გერმანულმა კომპანიამ გასული სეზონის ტრიუმფატორის, ”ბრაუნ GP-ს” აქციების საკონტროლო პაკეტი (75 პროცენტი) გამოისყიდა. ეს ვარაუდი კი კიდევ უფრო მას შემდეგ გაძლიერდა, რაც გერმანულ გუნდთან სასპონსორო კონტრაქტი მალაიზიურმა ნავთობკომპანია ”პეტრონასმა” გააფორმა.

რამდენიმე დღის წინ კი უკვე გადაჭრით შეიძლებოდა იმის თქმა, რომ შუმახერის დაბრუნება და ”მერსედეს GP-ში” გადასვლა დღეების ამბავი იყო - ხუთშაბათს ”ფერარის” პრეზიდენტმა ლუკა დი მონტეძემოლომ განაცხადა, რომ შუმახერს ტელეფონით ელაპარაკა და მან ”მერსედესში” თავისი შესაძლო გადასვლის შესახებ ამცნო. ამასთან, ლუკამ ისიც დასძინა, რომ ”სკუდერია” თავის დიდ ჩემპიონს ამაში ხელს არ შეუშლიდა.

ყველაფერი სამედიცინო შემოწმებაზე იყო დამოკიდებული. თუ ექიმები იტყოდნენ, რომ შუმახერი რბოლებში დასაბრუნებლად მზადაა, მაშინ მის დაბრუნებას ხელს ვეღარაფერი შეუშლიდა. ორიოდ დღის წინ, შუმიმ ექიმებისგანაც მწვანე შუქი მიიღო.

”მერწმუნეთ, ძველებურად მოტივირებული ვარ. როს ბრაუნმა ნოემბრის ბოლოს დამირეკა და მივხვდი, რომ დაბრუნების რეალური შანსი გამიჩნდა. მაშინ უკვ ვიცოდი, რომ საქმეში ”მერსედესიც” ჩაერთვებოდა. სპორტიდან როცა წავედი, მაშინ რბოლებისთ დაღლილი ვიყავი. მაგრამ ამ სამ წელიწადში მოტივაცია კვლავ დამიბრუნდა. შარშან მოტორბაიკებით გავერთე და მაშინ მივხვდი, რომ რბოლებში დაბრუნება მსურდა. ახლა კი მიხარია, რომ სურვილის ასრულების საშუალება მეძლევა”, - განაცხადა შუმახერმა.

გერმანელმა პილოტმა თავისი სპორტული კარიერა 2006 წელს დაასრულა, მაგრამ მას შემდეგაც, სპორტთან მუდმივი შეხება ჰქონდა - ”ფერარის” კონსულტანტი იყო და იტალიური კომპანიის სახედ ითვლებოდა. ხანდახან კი კარტინგის რბოლებში ასპარეზობდა.

გასულ სეზონში, მას დაბრუნების შანსი მას შემდეგ მიეცა, რაც უნგრეთის დიდ პრიზზე ზერიოზულად დაშავდა ”ფერარის” ბრაზილიელი პილოტი ფელიპე მასა. მაგრამ შემდეგ შუმიმ დაბრუნება გადაიფიქრა, რის ოფიციალურ მიზეზადაც მოტოავარიის დროს დაშავებული კისერი გამოცხადდა.

მოკლედ, შუმახერი იქ დაბრუნდა, სადაც მისი კარიერა დაიწყო - ”მერსედეს-ბენცში”. თავის დროზე, სანამ ფორმულა 1-ში მოვიდოდა, ის შტუტგარტული ავტოგიგანტის ახალგაზრდულ პროგრამაში მონაწილეობდა და მის ფარგლებში, 1990 და 1991 წლებში, ტურიზმის კლასის გერმანიის ჩემპიონატსა და სპორტული პროტოტიპების რბოლებშიც იასპარეზა.

ამგვარად, 2010 წლის სეზონში, ”მერსედეს GP-ს” ორი გერმანელი პილოტი ეყოლება - შუმახერის გარდა, ”ვერცხლისფერი ისრების” ბოლიდით ნიკო როსბერგიც იასპარეზებს.

შუმახერი არ მალავს, რომ მერვე ტიტულის მოსაპოვებლად აპირებს ბრძოლას: ”ჩემპიონი შვიდჯერ ვიყავი და ახლა იმ გუნდში გადავედი, რომელმაც გასულ სეზონში ორივე ტიტული მოიპოვა. ჰოდა, რას ელით? ალბათ არაფერს იმის გარდა, რომ ჩემპიონობისთვის ვიბრძოლო. ჩვენი მიზანი სწორედ ესაა”.

უნდა ითქვას, რომ მიმომხილველები შუმახერსა და ”ბრაუნ GP-ს” შორის მხოლოდ ერთწლიან კონტრაქტს ელოდნენ, მაგრამ პრესკონფერენციაზე ითქვა, რომ მათი პერტნიორობა სამ წელიწადს გაგრძელდება. პირველ სეზონში გერმანელი პილოტი 7 მილიონ ევროს (დაახლოებით 10 მილიონი დოლარი) მიიღებს.

და, კიდევ ერთი საინტერესო ფაქტი - შუმახერი იმ გუნდში გადავიდა, რომლის შეფიც როს ბრაუნია. ადამიანი, რომლის ხელმძღვანელობითაც, მან ”ბენეტონში” ყოფნისას ორი, ”ფერარიში” ყოფნისას კი ხუთი ტიტული მოიპოვა.

”ეს ერთადერთი კომბინაციაა, რომელიც ჩემს დაბრუნებას დააჩქარებდა. უკეთესს ვერც ვინატრებდი. დიდი ხანია, როსთან ვმგობრობ. ის დეტალურად მიცნობს. ჩვენ ერთმანეთს კარგად ვუგებთ და ერთად კარგად ვმუშაობთ. ჩვენ ერთად ისეთი რბოლები გვაქვს მოგებული, რომლებიც მოსაგები არ იყო. ძნელი პერიოდებიც გვქონის, მაგრამ საბოლოოდ, მიზანს მაინც ვაღწევდით. და ახლა ისევ ერთად ვიქნებით”, - დასძენს შუმახერი, ვისაც ფორმულა 1-ში გატარებული 15 (14 სრული) სეზონის განმავლობაში, 249 რბოლაში მიუღია მონაწილეობა და მათგან 91 მოიგო, 68 კი პოულ პოზიციიდან დაიწყო.

ცნობისათვის, თავისი ერთადერთი ტიტული ბრიტანელმა ნაიჯელ მენსელმა 41 წლისამ მოიპოვა. ისე კი, ფორმულა 1-ის ყველაზე ხნიერი ჩემპიონი ლეგენდარული არგენტინელი ხუან მანუელ ფანხიოა, რომელიც ხუთიდან ბოლო ტიტულს 46 წლისამ დაეუფლა. რაც შეეხება ფ1-ის ყველაზე ხნიერ გამარჯვებულს, ეს საპატიო წოდება (ალბათ სამუდამოდ) იტალიელ ლუიჯი ფაჯოლის ეკუთვნის, რომელმაც 1951 წელს, საფრანგეთის დიდი პრიზი 53 წლისამ მოიგო.

Monday, December 21, 2009

”მერსედესი” და ”პეტრონასი” დაძმობილდნენ

Mercedes signs Petronas as title sponsor

21 დეკემბერი

”მერსედეს გრან პრიმ” და მალაიზიურმა ნავთობგიგანტმა ”პეტრონასმა” გრძელვადიანი სასპონსორო ხელშეკრულება გააფორმეს, რომლის თანახმადაც, მალაიზიური კომპანია, რომელიც ქვეყნის მთავრობის კუთვნილებაა, გერმანული გუნდის ტიტულოვანი სპონსორი გახდება.

ყველა ელოდა, რომ ”პეტრონასი”, რომელიც აქამდე ”ბეემვე ზაუბერის” სპონსორი იყო, თავის ფინანსურ რესურსებს ფორმულა ერთის დებიუტანტ ”ლოტუსს” მოახმარდა - ”ლოტუსი” მალაიზიურ ავტომწარმოებელ ”პროტონის” ჯგუფში შედის და მისი გუნდი მალაიზიის მთავრობის მხარდაჭერით სარგებლობს. და თითქოს, მალაიზიური ალიანსი ყველაზე რეალურად მოჩანდა, მაგრამ ”პეტრონასმა” უფრო ძლიერ გუნდთან ურთიერთობა ამჯობინა. მისმა ხელმძღვანელობამ რამდენიმე დღის წინ ოფიციალურად გამოაცხადა, რომ არ აპირებს ”ლოტუსთან” თანამშრომლობას, თუმცა მალაიზიის დიდი პრიზის ტიტულოვან სპონსორად მაინც დარჩება.

გუნდმა უკვე გამოაქვეყნა თავისი ბოლიდის კონცეპტუალური ვარიანტის სურათები, თუმცა როგორც მისი შეფი როს ბრაუნი აცხადებს, მანქანის გაფორმების რეალურ სურათს გუნდის ოფიციალურ პრეზენტაციაზე ვნახავთ. რის შემდეგაც, 1 თებერვალს, ის ვალენსიაში ტესტირებას შეუდგება.

”მოხარულნი ვართ, დავადასტუროთ, რომ მომავალი სეზონიდან, ჩვენი გუნდის ტიტულოვანი სპონსორი ”პეტრონასი” იქნება. ახალი სეზონისთვის მზადების პროცესი გეგმის შესაბამისად მიმდინარეობს. მანქანა ვალენსიაში ტესტებისთვის დროულად მომზადდება და პირველივე ტესტებზე, მას ”ვერცხლისფერი ისრისა” და ”პეტრონასის” ფერებში გამოწყობილს იხილავთ”, - განაცხადა ბრაუნმა.

მალაიზიური კომპანია იმედოვნებს, რომ სახელგანთქმულ და მსოფლიოს ერთ-ერთ ყველაზე პრესტიჟულ ავტობრენდთან თანამშრომლობა, ”პეტრონასს” უფრო ცნობად კომპანიად გადააქცევს, რაც მის ბიზნესზე დადებითად იმოქმედებს. ამის საწინდარი კი ისაა, რომ მისი სახელი გერმანული გუნდის ოფიციალურ სახელწოდებაში შევა. ამიერიდან, ”სამქიმიანების” საჯინიბო ოფიციალურად მოიხსენიება, როგორც ”მერსედეს GP პეტრონას ფორმულა ვან ტიმ”. რაც ყველაზე მნიშვნელოვანია, ”პეტრონასის” ლოგო გუნდის ბოლიდის ყველაზე თვალსაჩინო ადგილებზე გამოჩნდება.

”მოხარულნი ვართ განვაცხადოთ, რომ ახალი სეზონიდან ახალი ტიტულოვანი სპონსორი გვეყოლება. ”მერსედეს-ბენცისა” და ”პეტრონასის” თანამშრომლობა ნაყოფიერი იქნება როგორც ტრასებზე, ასევე მის მიღმაც. მალაიზიურ კომპანიას თავისი ბიზნესის მთელ მსოფლიოში სტაბილურად განვითარების საშუალება მიეცემა, ჩვენ კი მისი მხარდაჭერით, წინსვლისთვის სოლიდურ ბაზას მივიღებთ”, - ამბობს ”მერსედეს მოტორშპორტის” ვიცე პრეზიდენტი ნორბერტ ჰაუგი.

არაოფიციალური ინფორმაციით, ”პეტრონასთან” გაფორმებული კონტრაქტი სეზონში ”მერსედეს GP-ს” 30 მილიონ ევროს მოუტანს. ამგვარად, თუ გავითვალისწინებთ, რომ ჩემპიონობისთვის ”ბრაუნმა” 50 მილიონი დაიმსახურა, გამოდის, რომ ”მერსედესის” და სხვა სპონსორების ინვესტიციების გარეშე, გერმანული გუნდის ბიუჯეტი 80 მილიონ ევროს აღწევს.

ბევრი მიმომხილველის აზრით, ”პეტრონასი” ”მერსედესის” გუნდით იმიტომ დაუკავშირდა, რომ მალაიზიური კომპანია მიხაელ შუმახერის დაბრუნებას ელის. სხვა მოსაზრებით, ამიერიდან, შტუტგარტული გიგანტის ყველა ავტომობილი ამიერიდან ”პეტრონასის” წარმოების ზეთებით გაეწყობა, რაც მალაიზიურ ნავთობგიგანტს დიდ მოგებას მოუტანს.

Friday, December 18, 2009

შუმახერი ცალი ფეხით ”მერსედესშია”

Schumacher reveals comeback is close

18 დეკემბერი

ახლა უკვე გადაჭრით შეიძლება ითქვას, რომ ფორმულა 1-ში მიხაელ შუმახერის დაბრუნებამდე სულ რამდენიმე დღე რჩება და მიუხედავად იმისა, რომ ”მერსედეს-ბენცმა” რამდენიმე დღის წინ გამოაცხადა, მეორე პილოტის ვინაობას ახალი წლის შემდეგ გამცნობთო, დიდია შანსი იმისა, რომ ეს შობის დღესასწაულამდე მოხდეს. პილოტის გვარი კი მიხაელ შუმახერი იქნება.

გიშინ მსოფლიოს შვიდგზის ჩემპიონი ”ფერარის” პრეზიდენტ ლუკა კორდერო დი მონტეძემოლოს დაურეკა და განუცხადა, რომ ”ძალიან, ძალიან, ძალიან დიდი შანსია იმისა, რომ ის მომავალ სეზონში ”მერსედეს-ბენცის” გუნდში იასპარეზებს”. ეს ინფორმაცია თავად დი მონტეძემოლომ გაავრცელა, რაც იმას ნიშნავს, რომ შუმისა და ”სამქიმიანებს” შორის მოლაპარაკებები მიმდინარეობს და ალბათ, ყველაფერი უკვე გადაწყვეტილიცაა.

მართალია, ჯერ არც შუმახერი და არც შტუტგარტელები ამ თემაზე ხმამაღლა არ ლაპარაკობენ, მაგრამ დი მონტეძემოლომ ფიორანოში, ჟურნალისტებისთვის საშობაო ლანჩი გამართა, რომელზეც სწორედ ”მერსედესში” შუმახერის შესაძლო გადასვლაზე გაამახვილა ყურადღება.

”აბუ დაბის რბოლის შემდეგ, შუმახერთან არ მისაუბრია, მაგრამ გუშინ ჩვენ ტელეფონით ვილაპარაკეთ. მან დამირეკა და მითხრა, რომ ძალიან, ძალიან, ძალიან დიდი ალბათობაა იმისა, რომ ის ”მერსედესში” გადავა. თუმცა იქვე დასძინა, რომ ჯერ ეს 100 პროცენტით გადაწყვეტილი არაა”, - ამბობს დი მონტეძემოლო და დასძენს, რომ ”ფერარი” შუმახერს ახლახან გაგრძელებული კონტრაქტით არ დააკავებს და თუ შუმის სურვილი ექნება, ამ კონტრაქტის დარღვევას წინ არ აღუდგება.

ინგლისურმა ჟურნალმა ”ავტოსპორტმა” მოიპოვა სანდო ინფორმაცია, რომლის მიხედვითაც, შუმახერსა და ”სამქიმიანებს” შორის შეთანხმება პრაქტიკულად მიღწეულია. ახლა ჯერი შუმახერის სამედიცინო შემოწმებაზეღაა და თუ ექსპერტები იტყვიან, რომ მან კისრის ტრავმა ბოლომდე მოიშუშა, მაშინ კონტრაქტიც ოფიციალურად გაფორმდება.

როგორც ცნობილია, შუმიმ კისრის ტრავმა ამ წლის დასაწყისში, მოტობაიკით ავარიისას მიიღო. სწორედ ეს ტრავმა გახდა იმის ძირითადი მიზეზი, რომ გერმანელმა პილოტმა აგვისტოში ფ1-ში დაბრუნებისგან თავი შეიკავა.

დი მონტეძემოლო ამბობს, რომ ”მერსედესში” გადასვლის შემთხვევაში, ჩვენ ”ახალ შუმახერს” ვიხილავთ. ”ნამდვილმა მიხაელ შუმახერმა მითხრა, რომ თავის სპორტულ კარიერას ”ფერარიში” დაასრულებდა”, - ამბობს ლუკა.

კითხვაზე, რა უპასუხა შუმახერს სატელეფონო საუბრისას, დი მონტეძემოლომ მცირე პაუზის შემდეგ უპასუხა: ”არ დაგავიწყდეთ, რომ როდესაც ადამიანთან დიდხანს თანამშრომლობ - ჩვენ და მიხაელს 1995 წლიდან, 14 წლის განმავლობაში გვაკავშირებს საერთო მიზნები, ეს ურთიერთობა მეგობრობად ყალიბდება. მეგობარს შეიძლება რამეში დაეთანხმო, ან არ დაეთანხმო, მაგრამ მეგობრობა რჩება. მე ვერ დავივიწყებ იმას, რაც მან ”ფერარისთვის” გააკეთა და ვერც ის დაივიწყებს იმას, რაც ჩვენ მისთვის გავაკეთეთ”.

დი მონტეძემოლო ასევე შეეხე იმ ფაქტს, რომ გასული სეზონი ”ფერარისთვის” მეტად წარუმატებელი იყო, რადგან გუნდმა რეალური მეტოქეობა ვერ გაუწია ლიდერებს - ”ბრაუნსა” და ”რედ ბულს”.

”ჩვენი მანქანის არქიტექტურაში ყველაფერი - გადაცემათა კოლოფის ზომები, საკიდარი და ყველა დანარჩენი ელემენტი, ტექნიკური რეგლამენტის განსხვავებულ ინტერპრეტაციას ეყრდნობოდა. მაგრამ ჩვენ ბოლო რბოლის ბოლო მოსახვევამდე ვიბრძოლეთ. რაც შევძელით, ეს მაქსიმუმი იყო”, ამბობს დი მონტეძემოლო და დასძენს, რომ გასულ სეზონში ის ახლოს იყო გადაწყვეტილებასთან, ”ფერარი” მსოფლიო ჩემპიონატიდან გაეყვანა.

”რაც მე ”ფერარის” ხელმძღვანელი ვარ, 1991 წლიდან, ასე არასდროს მდომებია გუნდის ფ1-დან გამოყვანა. უბრალოდ, დირექტორთა საბჭომ ერთხმად გადაწყვიტა, რომ მეტისმეტად დიდი იყო იმის ალბათობა, რომ იმ პოლიტიკურ პოლემიკაში, რასაც შუა სეზონში ჰქონდა ადგილი, წაგებული დავრჩებოდით. ახლა კი ღმერთს მადლობას ვწირავ იმისათვის, რომ კრიზისი ყველასათვის უმტკივნეულოდ მოგვარდა. თუმცა, ”ტოიოტას” და ”ბეემვეს” წასვლით, სპორტმა ბევრი დაკარგა”, - ამბობს დი მონტეძემოლო.

რაიკონენი შეიძლება რალიში დარჩეს

Raikkonen: WRC may be permanent

18 დეკემბერი

კიმი რაიკონენი ამბობს, რომ არავითარი გარანტია არ არსებობს იმისა, რომ ის ფორმულა 1-ს დაუბრუნდება. ფორმულა 1-ის 2007 წლის ჩემპიონი, მომავალ სეზონს რალის მსოფლიო ჩემპიონატზე, ”სიტროენ ჯუნიორის” გუნდში გაატარებს, რომელსაც ფინანსურად გვერდში ენერგეტიკული სასმელების მწარმოებელი ”რედ ბული” უდგას.

ბევრს მიაჩნია, რომ მომავალი სეზონი რაიკონენისთვის შვებულებასავით იქნება, მაგრამ თავად ფინელი პილოტი რალიში დარჩენას არ გამორიცხავს. ინგლისურ ჟურნალ ”ავტოსპორტთან” ექსკლუზიური საუბრისას, ”აისმენმა” თავის მომავალზე ილაპარაკა და აღნიშნა, რომ საბოლოოდ გადაწყვეტილი ჯერ არაფერი აქვს.

”ფორმულა 1-ში კონტრაქტი არავისთან მაქვს და ამიტომ, არ ვიცი, მომავალში რა იქნება. არჩევანი კი მაქვს - ან რალიში დავჩები, ან ფ1-ში დაბრუნებას ვცდი. მაინტერესებს, რალის მსოფლიო ჩემპიონატზე რა შედეგები მექნება. გადაწყვეტილებას მხოლოდ ამის საფუძველზე გავაკეთებ. თუ ყველაფერი კარგად აეწყობა, მაშინ რალიშივე გავაგრძელებ. საერთოდ, ბევრი განსხვავებული სცენარი არსებობს იმისა, თუ როგორ მოვიქცევი. მაგრამ ამ მომენტისთვის, ”რედ ბულთანაც” და ”სიტროენთანაც”, კონტრაქტი მხოლოდ მომავალი სეზონისთვის მაქვს”, - ამბობს რაიკონენი.

ფინელი პილოტი ამბობს, რომ ”ფერარის” ის მარტო უღიმღამო შედეგების გამო არ გაუშვია: ”მათ ჰკითხეთ, ვინც ეს გადაწყვეტილება მიიღო. მე არ მაინტერესებს, რატომ მოხდა ეს. საბოლოო პასუხი ვიცი და დარწმუნებული ვარ, რომ ჩემი გაშვება ჩემი შედეგების შედეგი არაა. ვფიქრობ, როდესაც საქმეში დიდი ფულია ჩადებული, ყველაფრის შეცვლა შეგიძლია. ჩემი აზრით, ბევრი რამ გუნდში ”სანტანდერის” მოსვლამ გადაწყვიტა. ალბათ, რაღაც გარიგება შედგა. არ ვიცი...”.

რაიკონენი აღიარებს, რომ ”მაკლარენში” დაბრუნების რეალური შანსი ჰქონდა და მოლაპარაკებას ”ბრაუნთანაც” აწარმოებდა, მაგრამ საბოლოოდ, ვერცერთისგან ის პირობები ვერ მიიღო, რომლებსაც ესწრაფვოდა:

”რომ მდომოდა, ”მაკლარენთან” კონტრაქტის გაფორმება შემეძლო, მაგრამ იქ ჩემი მოთხოვნების მხოლოდ ნაწილის დაკმაყოფილებას მთავაზობდნენ. შემიძლია ვთქვა, რომ გადამწყვეტი ფაქტორი ფული არ ყოფილა. ჩემი გადაწყვეტილება უფრო სხვა გარემოებებმა განაპირობა. საბოლოოდ, შემოთავაზებული კონტრაქტი ჩემთვის მიუღებელი იყო”.

მართალია, რაიკონენი ამას ამბობს, მაგრამ ფაქტია, რომ თუ სხვა გუნდთან კონტრაქტს გააფორმებდა, ”ფერარისგან” კონტრაქტის დარღვევისთვის გაცილებით ნაკლებ თანხას მიიღებდა, ვიდრე იმ შემთხვევაში, თუ ”მაკლარენში” გადავიდოდა.

”რა თქმა უნდა, სხვა გუნდში რომ გადავსულიყავი, გაცილებით ნაკლები წლიური გამომუშავება მექნებოდა. მაგრამ ”მაკლარენში” არგადასვლის მთავარი მიზეზი ეს მაინც არ ყოფილა. ეს ის არაა, რაც მე მინდოდა”.

”ბრაუნთან” დაკავშირებით კი ამბობს: ”იქ გადასვლის შანსიც მქონდა და ეს რეალური იყო, მაგრამ ”მაკლარენთან” რომ არაფერი გამოვიდა, მას შემდეგ, ”ბრაუნის” გარდა, ”რედ ბულტანაც” დავიწყე მოლაპარაკება. ძალიან მაინტერესებდა, რას შევძლებდი რალიში და ჩემი საბოლოო გადაწყვეტილებაც ამ ინტერესმა განაპირობა. ჰოდა, ერთი წლის შემდეგ, შეიძლება ისევ ფ1-ში დავბრუნდე, ან იქნებ, რალიშივე გავაგრძელებ...”.

Thursday, December 17, 2009

გაიცანით - ”ვირჯინ რეისინგი”

Virgin Racing

16 დეკემბერი

სურათზე (მარცხნიდან): გლოკი, ბრენსონი, უირტი და დი გრასი

...............................................................................

”ფორმულა 1-ის” ახალმა გუნდმა, ინგლისურმა ”ვირჯინ რეისინგმა” (მას განაცხადი მეინორის სახელით აქვს გაკეთებული) თავისი პილოტების ვინაობა დაასახელა. ლონდონში გამართულ პრესკონფერენციაზე, გუნდის მეპატრონემ, ინგლისელმა მილიარდერმა და თავგადასავლების მოყვარულმა სერ რიჩარდ ბრენსონმა გამოაცხადა, რომ მომავალ სეზონში, მისი გუნდის ღირსებას გერმანელი ტიმო გლოკი და ბრაზილიელი ლუკას დი გრასი დაიცავენ.

გლოკი ფორმულა 1-ში დიდი ხნის გაშინაურებულია. მისი დებიუტი 2004 წელს, ”ჯორდანში” შედგა. მაშინ მან მხოლოდ ოთხ რბოლაში მიიღო მონაწილეობა, შემდეგ, გარემოებათა გამო, სხვა სერიებში მოუწია გამოსვლამ, მაგრამ 2008 წელს ფ1-ში დაბრუნდა და კონტრაქტი ”ტოიოტასთან” გააფორმა.

დი გრასი დიდი პრიზების ცირკში პირველად იასპარეზებს. თუმცა, ისიც სღსანიშნავია, რომ მისთვის ფორმულა 1-ის ბოლიდი კარგადაა ნაცნობი - 2005-დან 2008 წლამდე მას ”რენოსა” და ”ჰონდას” ბოლიდების ტესტირებაში აქვს მონაწილეობა მიღებული და საერთო ჯამში, ტესტებზე 4 400 კილომეტრზე მეტის გავლა მოასწრო. პარალელურად, დი გრასი სერია GP2-შიც მონაწილეობდა, სადაც 2007 წელს ტიტულისთვისაც იბრძოდა, მაგრამ გლოკთან ბრძოლაში დამარცხდა.

რაც შეეხება სარეზერვო და ტესტ პილოტის პოსტს, მას 25 წლის პორტუგალიელი ალვარუ პარენტე დაიკავებს.

პრესკონფერენციაზე, ”ვირჯინ რეისინგის” ტექნიკურმა დირექტორმა ნიკ უირტმა განაცხადა, რომ სარბოლი მანქანის შექმნის პროცესი გეგმის შესაბამისად მიმდინარეობს და რომ ის ტრასაზე გამოსასვლელად, მზად თებერვალში იქნება.

მანქანის შექმნისას, უირტი გამოთვლითი ჰიდროდინამიკის მეთოდოლოგიას იყენებს და დარწმუნებულია, რომ ასეთი ტექნოლოგია უკვე საკმაოდ დახვეწილია იმისათვის, რომ მანქანის და მისი ცალკეული კომპონენტების აეროდინამიკურ მილში გამოცდა აღარ გახდეს საჭირო.

სხვათა შორის, უირტს და მის კომპანია ”უირტ რისერჩს” გამოთვლითი ჰიდროდინამიკის ტექნოლოგიის გამოყენების კარგი გამოცდილება აქვს. ამ მეთოდოლოგიით, მან კომპანია ”აკურას” (ჰონდას ამერიკული ბრენდი) საქარხნო გუნდს სპორტული პროტოტიპი დაუმზადა, რომელსაც ამერიკული ლე მანის სერიაში არაერთი გამარჯვება აქვს მოპოვებული.

ისევე როგორც ”ლოტუსი”, ”ვირჯინ რეისინგიც” თავის პირველ სეზონში, მთავარ მიზნად, ახალბედებს შორის საუკეთესო შედეგის ჩვენებას ისახავს. გუნდის სპორტული დირექტორი ჯონ ბუტი ამბობს, რომ ”ვირჯინ რეისინგი” პირველივე სეზონში მოიპოვებს ”ძველებისგან” პატივისცემას. მისი თქმით, ამ მიზნის მისაღწევად, მთავარი იარაღი უირტის მიერ დაპროექტებული ბოლიდი - VR-01 იქნება.

ბუტის თქმით, სტაბილურიბა, უსაფრთხოება და ეფექტურობა - ესაა სამი მთავარი კომპონენტი, რომლებმაც ”ვირჯინ რეისინგის” განვითარებას საფუძველი უნდა დაუდოს. ”მთავარია, ჩამოვყალიბდეთ, როგორც გუნდი. თუ ეს შევძელით, მაშინ შედეგებზე ორიენტირების დროც დაგვიდგება. ამ სეზონში ჩვენი ამოცანა ის იქნება, რომ ახალბედებს შორის საუკეთესო შედეგს მივაღწიოთ”, - ამბობს ბუტი.

პრესკონფერენციაზე, ბრენსონმა თავისი გუნდის მიზნის ჩამოყალიბებისთვის, ბიბლიური პერსონაჟები და სიუჟეტი გამოიყენა: ”გასულ სეზონში, ”ბრაუნმა” სეზონი დავითის როლში დაიწყო, ჩემპიონატი კი, როგორც გოლიათმა, ისე დაასრულა. ჩვენ ვეძებდით ახალ გუნდს, რომელსაც დავითის როლი მიესადაგებოდა და ის ვიპოვნეთ კიდეც. ახლა საინტერესოა, რას მივაღწევთ. მომავალი სეზონიდან, ფორმულა 1-ში ახალი ერა იწყება - ჩემპიონატში მონაწილეობის ხარჯები მცირდება. და შემიძლია განვაცხადო, რომ ჩვენს გუნდს ფ1-ში ყველაზე მცირე ბიუჯეტი ექნება”.

”ფერარი 312 T” – სამი ტიტულის კვიცი

Ferrari 312 T

14 დეკემბერი

ფერარი 312 T - ლაუდას პირველი საჩემპიონო ფერარი
...........................................................................................

1964 წელს, ინგლისელმა ჯონ სარტიზმა რომ ”ფერარის” მანქანით მსოფლიო ჩემპიონის ტიტული მოიპოვა, მას შემდეგ, მთელი ათი წელი, იტალიური საჯინიბო ამაოდ ცდილობდა პირად ჩათვლაში ტიტულის დაუფლებას. ამის მიზეზი კი ინგლისური, მეტად ეფექტური მანქანები იყო, რომლებიც ”კოსუორტის” თითქმის სერიული, DFV ძრავებით იყვნენ აღჭურვილნი. მართალია, მარანელოელების ძრავები თითქმის ყოველთვის ჭარბი ცხენის ძალებით გამოირჩოდნენ, მაგრამ ალბიონელებს სხვადასხვა ეშმაკობა არ გამოელიათ, რითაც ისინი ცხენების ნაკლებობას ორმაგად აბათილებდნენ.

1973 წლის სეზონი ”ფერარისთვის” ნამდვილ კატასტროფად იქცა - მარანელოელთა კვიცებმა და მათმა მესაჭეებმა ერთი რბოლის მოგებაც კი ვერ შეძლეს. არადა, მათ თითქოს გამარჯვების მომტანი მანქანა ჰქონდათ - V12 ძრავით აღჭურვილი 312 B, რომელმაც 1970 წელს, დებიუტისთანავე ოთხი რბოლა მოიგო. მაგრამ მარანელოში მისი განვითარება-დახვეწა ვერ შეძლეს, რის გამოც ენცო ფერარიმ საკონსტრუქტორო შტაბის ნაწილი დაიფრინა, დარჩენილებს კი სათავეში მაურო ფორჯიერი ჩაუყენა, რომელმაც საფუძვლიანად განაახლა ძრავი.

ლაუდა ფერარი 312 T2-ით ასპარეზობს

......................................................................

რაც მთავარია, გუნდის მენეჯერად ლუკა კორდერო დი მონტეძემოლო დაინიშნა, ადამიანი, რომელიც დღეს ”ფერარის” პრეზიდენტია. ამ 30 წელზე მეტი ხნის განმავლობაში კი მას კომპანიაში არაერთი თანამდებობა აქვს გამოცვლილი. დაკიდევ, ენცომ გუნდის პილოტებად ორი ახალგაზრდა და ძალიან ამბიციური პილოტი მოიწვია - ავსტრიელი ნიკი ლაუდა და შვეიცარელი კლეი რეგაცონი.

1974 წელს 312 B-ს არაერთი მოდიფიკაცია ჩაუტარდა და საბოლოოდ, 312 B3-ად ჩამოყალიბდა. ამ მანქანას რომ სიჩქარე არ აკლდა, ლაუდამ იმითაც დაამტკიცა, რომ 9-ჯერ დაიკავა პულ პოზიცია. მაგრამ მანქანა გამძლე არ იყო და ამ ცხრა პოულიდან, გამარჯვებად მხოლოდ ორის მატერიალიზება მოხერხდა. კიდევ ერთი რბოლა რეგაცონიმ მოიგო და ჩემპიონატი მეორე ადგილზე დაასრულა. ტიტულს კი ”მაკლარენით” მოასპარეზე ბრაზილიელი ემერსონ ფიტიპალდი დაეუფლა. რა თქმა უნდა, წინა სეზონის კრახთან შედარებით, სამი გამარჯვება სერიოზული წინსვლა იყო, მაგრამ კომენდატორეს (ენცო ფერარის) ტიტული სურდა...

ჟილ ვილნევი ფერარი 312 T3-ში

..........................................................

ჰოდა, სეზონი დასრულებული არ იყო, რომ მარანელოში მომავალი 1975 წლის ჩემპიონატისთვის მზადება გახურდა. აქცენტი იმაზე გაკეთდა, რომ მანქანა კომპაქტური გამოსულიყო. ამისათვის კი გადაცემათა კოლოფმა განივი განლაგება მიიღო, რის გამოც, ავტომობილის ინდექსში ასო T (ტრანსვერსალ) გამოჩნდა. ასეთი კონფიგურაციის წყალობით, ავტომობილის წონა წინა და უკანა ღერძებს შორის უფრო თანაბრად განაწილდა, რაც მოსახვევების უფრო სწრაფად გავლის საშუალებას იძლეოდა. ძრავი 485 ცხენის ძალამდე გაძლიერდა და მართალია, ის ”კოსუორტის” DFV-ზე მძიმე იყო, მასზე სულ ცოტა, 20 ცხენის ძალით მეტსაც იძლეოდა.

სეზონის დაწყებამდეც კი, ეჭვიც არავის ეპარებოდა იმაში, რომ ეს ავტომობილი, ”ფერარის” ახალგაზრდა პილოტებს ტიტულისთვის ბრძოლის საშუალებას მისცემდა. მაგრამ ლაუდამ პირველად ახალი მანქანა მესამე ეტაპზე (სამხრეთ აფრიკა, კიალამი) მიიღო. და მაშინვე პოულსაც დაეუფლა. სტარტის პირველ რიგში, მის გვერდით დადგომის უფლება კი რეგაცონიმ მიიღო. მაგრამ პირველივე წრეზე მომხდარმა ავარიამ ორივე მანქანა ასპარეზობიდან გამოთიშა.

ჯოდი შექტერი ფერარი 312 T4-ის საჭესთან

.........................................................................

სამაგიეროდ, მომდევნო ხუთი რბოლიდან ლაუდამ ოთხი მოიგო, რეგაცონიმ კი ”ფერარისთვის” ყველაზე მნიშვნელოვანი ეტაპი - იტალიის დიდი პრიზი მოიგო მონცაზე. სეზონის ბოლო ეტაპი (აშშ, უოტკინს გლენი) კი ისევ ავსტრიელის გამარჯვებით დასრულდა, ვინც თავისი სამიდან პირველი ყიყული მოიპოვა. კონსტრუქტორთა თასს კი ”ფერარი” დაეუფლა.

1976 წელს ძალაში ახალი რეგლამენტი შევიდა, რომლის გამოც, მარანელოელებს მანქანის სასწრაფოდ მოდერნიზება მოუწიათ. განახლებულ მანქანას T2 უწოდეს და ის წინამორბედისგან იმით განსხვავდებოდა, რომ ძრავის ჰაერის ამღები ორად იყო გაყოფილი და ისინი კოკპიტის ორივე მხარეს, იყო განთავსებული.

ლაუდა კვლავ ჩემპიონობისთვის იბრძოდა და ამის რეალური შანსიც ჰქონდა, მაგრამ ნურბურგრინგზე საშინელ ავარიაში მოჰყვა, რომლის დროსაც დაწვას პილოტებმა გადაარჩინეს. ავსტრიელს რამდენიმე ეტაპის გამოტოვება მოუხდა, თუმცა უჩვეულოდ სწრაფად გამოჯანმრთელდა და ტიტულის მოპოვების რეალური შანსიც შეინარჩუნა. მაგრამ ბოლო ეტაპი (იაპონია, ფუძი), რომელიც თავსხმა წვიმაში დაიწყო, პირველივე ეტაპზე მიატოვა და ტიტულს ბრიტანელი ჯეიმს ჰანტი დაეუფლა. სამაგიეროდ, მომდევნო სეზონში ლაუდა და 312 T2 დაუმარცხებელ ტანდემად დაბრუნდნენ და ორივე ტიტულს (პირადსა და კონსტრუქტორთა) დაეუფლნენ.

ფერარი 312 T-ს ერთ-ერთი მთავარი ნაწილი - ტრანსვერალური კოლოფი

..................................................................................

თითქოს, ეს დუეტი მომდევნო სეზონშიც დაუმარცხებელი უნდა ყოფილიყო, მაგრამ საქმეში ორი გარემოება ჩაერია. ჯერ ერთი, ”მიშლენმა” პირველად გამოიყენა რადიალური საბურავები, რამაც მანქანის საფუძვლიანად შეცვლა მოითხოვა. მეორეც, გენიალურმა კოლინ ჩეპმენმა თავის ”ლოტუსზე” პირველად გამოიყენა გრაუნდ ეფექტის აეროდინამიკური ეფექტი, რითაც სოლიდური უპირატესობა მოიპოვა.

ახალ ”ფერარის” 312 T3 ეწოდა. ”სკუდერიას” მანქანებს ამჯერად არგენტინლი კარლოს როიტემანი და კანადელი ჟილ ვილნევი მართავდნენ. მართალია, რევოლუციური ”ლოტუს 78” შეუდარებელი იყო, მაგრამ ”ფერარი” მას გამძლეობით სჯობდა, რაც მის პილოტებს ბრძოლის საშუალებას აძლევდა. და მაინც, ჩემპიონი ”ლოტუსით” მოასპარეზე ამერიკელი მარიო ანდრეტი გახდა.

1979 წლის ჩემპიონატისთვის, მანქანის მომზადებაში ”ფიატი” და ”პინინფარინა” ჩაერთვნენ. მათ 312 T ისე გადააკეთეს, რომ გრაუნდ ეფექტი მიეღოთ (გრაუნდ ეფექტი ისეთი აეროდინამიკური ეფექტია, რომლის დროსაც, მანქანის ქვეშ გაუხშოებული არე იქმნება და ამით, მისი ბორბლების გზის საფართან ჩაჭიდულობა უმჯობესდება). მაგრამ დიდი გაშლის კუთხის მქონე ძრავის გამო, ეს ეფექტი დაკნინებული იყო.

ეს ის სეზონის, რომლის დროსაც ”რენომ” რევოლუციური სიახლე - ტურბოკომპრესორიანი V6 პირველად გამოიყენა. ვილნევის თანაგუნდელად კი სამხრეთ აფრიკელი ჯოდი შექტერი მიიწვიეს.

სწორ მონაკვეთებზე ყველაზე სწრაფები ”რენოს” მანქანები იყო, მოსახვევებს კი სრულყოფილი გრაუნდ ეფექტის მქონ მანქანები გადიოდნენ. მაგრამ 312 T4 ისევ ყველაზე საიმედო, გამძლე მანქანა გამოდგა, რამაც შექტერს ტიტული, ”სკუდერიას” კი კონსტრუქტორთა თასი მოაპოვებინა. სამხრეთ აფრიკელმა ვილნევს ოთხი ქულით აჯობა. სამაგიეროდ, კანადელმა დიჟონში (საფრენგეთი), ფრანგ რენე არნუსთან (რენო) უდაძაბულეს პაექრობაში მოიპოვა გამარჯვება.

Monday, December 14, 2009

”ლოტუსმა” პილოტები გამოაცხადა

Lotus announces Trulli and Kovalainen for 2010

14 დეკემბერი

ფორმულა ერთში დაბრუნებულმა ”ლოტუსმა” იმ პილოტების ვინაობა გამოაცხადა, რომლებიც მომავალ სეზონში მისი ბოლიდის საჭეს მიუჯდებიან. როგორც მოსალოდნელი იყო, ერთ მონოპოსტს იტალიელი იარნო ტრული დაიკავებს, მეორე ადგილზე ”მაკლარენიდან” წამოსული ფინელი ჰეიკი კოვალაინენი გამწესდა. სარეზერვო პილოტი კი მალაიზიელი ფაირუზ ფაუზი გახდება.

”პირველივე სეზონისთვის განსაკუთრებულ მიზნებს არ ვისახავთ, მაგრამ გვინდა, რომ ახალ გუნდებს შორის საუკეთესონი ვიყოთ. ჩვენი განზრახვის სერიოზულობაზე კი ის ფაქტიც მეტყველებს, რომ ჩვენ გუნდში მსოფლიო დონის ორი ვარსკვლავი იასპარეზებს”, - ავბობს ”ლოტუსის” შეფი ტონი ფერნანდესი.

35 წლის ტრული ახალ სეზონში ერთ-ერთი ყველაზე გამოცდილი პილოტი იქნება - მისთვის 2010 წლის სეზონი კარიერაში მე-13-ა. წინა 12 სეზონში მას მხოლოდ ერთი გამარჯვება აქვს მოპოვებული. კოვალაინენი 28 წლისაა და მის ანგარიშზეც ერთადერთი გამარჯვებაა.

”თავისი გამოცდილებით, ტრული ჩვენი გუნდისთვის საუკეთესო შენაძენია. ის ძალიან დაგვეხმარება განვითარებაში. ჰეიკი უფრო ახალგაზრდა, თუმცა არანაკლებ გამოცდილი პილოტია. მათი სახით, პილოტთა შესანიშნავი წყვილი გვყავს. ფაირუზიც პერსპექტიული პილოტია. ასე რომ, ისინი ერთად გამოცდილების ახალგაზრდობისა და ენთუზიაზმის არაჩვეულებრივ შენადნობს მოგვცემენ”, - ამბობს ფერნანდესი.

ტრული ამბობს, რომ ”ლოტუსში” მისი გადასვლის მთავარი მიზეზი ისაა, რომ გუნდის ტექნიკური დირექტორი მაიკ გასკოინია, ვისთან ერთადაც ის ცოტა ხანს ”ტოიოტაში” იყო. იტალიელი პილოტი პილოტი ამბობს, რომ ის გუნდის გრძელვადიანმა სტრატეგიამაც მოხიბლა.

”მე ამ გუნდის მენეჯერებისა და ტექნიკური პერსონალის გრძელვადიანმა სტრატეგიამ დამაინტერესა. ტონის ძალიან ამბიციური გეგმები აქვს და მე მზად ვარ, გუნდს ამ გეგმების განხორციელებაში დავეხმარო. ძალიან მიხარია, რომ ისევ მომიწევს მაიკ გასკოინთან მუშაობა. ჩვენ შესანიშნავი დამოკიდებულება გვაქვს და მე მისი მუშაობის სტილს დიდ პანივს ვცემ”, - ამბობს ტრული

კარგი განწყობა აქვს კოვალაინენსაც: ”ახლახან გუნდის ბაზაზე ვიმყოფებოდი და გაოცებული დავრჩი იმით, რომ გუნდმა მოკლე დროში ამდენი რამ მოასწრო. პროექტმა ხომ სტარტი მხოლოდ სექტემბერში აიღო. ტონიმ გუნდს საკმაოდ ამბიციური მიზნები დაუსახა და მთელი პერსონალი ამ მიზნების შესრულებაზეა მობილიზებული. მე კი დარწმუნებული ვარ, რომ ”ლოტუსს” მისი პროგრამის განხორციელებაში დავეხმარები”.

რაც შეეხება ფაუზის, ის 27 წლისაა და ადრე GP2 და A1GP სერიებში მონაწილეობდა. გასულ სეზონში, მან სერია ფორმულა ”რენო” 3.5-ში მეორე ადგილი დაიკავა. ორი წლის წინ კი ფორმულა 1-ის გუნდ ”სპაიკერის” ტესტ პილოტი იყო.

Sunday, December 13, 2009

ჰილის აზრით, შუმახერი წარმატებას ახლაც მიაღწევს

Hill: Schumacher could still succeed in F1

12 დეკემბერი

მსოფლიოს 1996 წლის ჩემპიონი, ბრიტანელი დეიმონ ჰილი დარწმუნებულია, რომ ფორმულა 1-ში დაბრუნების შემთხვევაში, მსოფლიოს შვიდგზის ჩემპიონი მიხაელ შუმახერი კვლავაც შეძლებს უმაღლესი მიზნებისთვის ბრძოლას.

ჰილსა და შუმახერს ტიტულისთვის 1994 და 1995 წლებში უშეღავათო ბრძოლები ჰქონდათ და ორივე შემთხვევაში, გამარჯვებული გერმანელი დარჩა, რომელიც მაშინ ”ბენეტონის” (ახლანდელი რენო) ბოლიდით ასპარეზობდა. თუმცა, როდესაც ის ნაკლებად კონკურენტუნარიან ”ფერარიში” გადავიდა (1996 წელს) ჰილის (უილიამს-რენო) რევანშმაც არ დააყოვნა.

გაზეთ ”ტაიმსის” სვეტში ჰილი წერს, რომ თუ მას 37 წლის ასაკში, ”ჯორდანის” მანქანით შეეძლო რბოლის მოგება, 41 წლის შუმახერისთვის ”მერსედესით” გამარჯვებისთვის ბრძოლა მიუწვდომელი ოცნება სულაც არ იქნება.

”არ მგონია, შუმახერისთვის დაბრუნება შეცდომა იყოს. მე თუ 37 წლისას შემეძლო, ”ჯორდანით” გამარჯვებისთვის მებრძოლა, როს ბრაუნის მანქანით რბოლის მოგება 41 წლის მიხაელისთვის პრობლემა არ უნდა იყოს”, - წერს ჰილი და დასძენს:

”როსმა გასული სეზონი მოიგო და მომავალ სეზონშიც კონკურენტუნარიანი მანქანა ექნება. რაც შეეხება მიხაელ შუმახერს, მას ბრძოლის ჟინი არასდროს დააკლდება და რაც მთავარია, ახლაც შესანიშნავ ფორმაშია. მან თავისი ცხოვრება რბოლებს მიუძღვნა და ის ფაქტი, რომ შარშან მოტორბოლებში მიიღო მონაწილეობა, აშკარად მიგვანიშნებს - სიჩქარე მას სისხლში აქვს”.

ჰილი ასევე დარწმუნებულია, რომ 2006 წელს შუმახერმა კარიერა თავისი სურვილის საწინააღმდეგოდ დაასრულა. მაშინ ”ფერარის” გერმანელის ადგილზე კიმი რაკონენის მოწვევა სურდა და იმედოვნებდა, რომ ფინელი გუნდში დიდი ხნით დარჩებოდა.

”ვეჭვობ, მიხაელი 2006 წელს სპორტიდან საკუთარი სურვილით წასულიყო. ჩემი აზრით, გადაწყვეტილების მიღებისას, ის ზეწოლას განიცდიდა. ეს უფრო ”ფერარის” პოლიტიკურ გადაწყვეტილებას ჰგავდა და მათ მიხაელს გადაწყვეტილების მიღება დააძალეს. დარწმუნებული ვარ, მას ფორმულა 1-ში დაუმთავრებელი საქმე დარჩა. ერთადერთი პრობლემა, რამაც შეიძლება მას დაბრუნებაში ხელი შეუშალოს, კისრის ტრავმაა, რომლის გამოც, გასულ სეზონში დაბრუნებისგან თავი შეიკავა. და თუ ეს პრობლემა მოაგვარა, ვერ ვხედავ მიზეზს, რის გამოც არ უნდა დაბრუნდეს.

ქვეყნად არიან ადამიანები, რომლებსაც გამოწვევის გარეშე ცხოვრება არ შეუძლიათ, რისკი იზიდავთ. მიხაელიც ასეთ კატგორიას მიეკუთვნება. მას რბოლებში მონაწილეობა ახლაც სწყურია. მას შეუძლია იმ საქმის კეთება, რომელიც უყვარს”, - დასძენს ჰილი.

გერმანულ პრესაში გავრცელებული ინფორმაციით, ”ფერარი” მზადაა, შუმახერი ზაფხულში გაგრძელებული კონტრაქტისგან გაათავისუფლოს და სავარაუდოდ, მასთან კონტრაქტს ”მერსედესი” შობის დღესასწაულამდე გააფორმებს.

Friday, December 11, 2009

ფორმულა 1-ში ქულების ახალი სისტემა დამტკიცდა

FIA announces new F1 points system

11 დეკემბერი

მომავალ, 2010 წლის სეზონში, ფორმულა 1-ის მსოფლიო ჩემპიონატზე ქულების დარიცხვის ახალი სისტემა ამოქმედდება, რომლის მიხედვითაც, რბოლებში ათი საუკეთესო პილოტი მიიღებს ქულებს. ორნახევარჯერ იზრდება პირველი სამეულის შეფასება - გამარჯვებული 25 ქულას მიიღებს, მეორეადგილოსანი 20 ქულას, მესამეზე გასული კი - 15 ქულას. სულ კი ქულები ასე განაწილდება - 25-20-15-10-8-6-5-3-2-1.

საერთაშორისო საავტომობილო ფედერაციის (FIA) მოტორ სპორტის მსოფლიო საბჭომ, ქულების სისტემის შეცვლა შემდეგნაირად ახსნა: ”რამდენადაც გუნდების რაოდენობა 13-მდე იზრდება, პილოტებისა კი - 26-მდე, მიზანშეწონილად მიგვაჩნია, დავაკმაყოფილოთ ფ1-ის კომისიის რეკომენდაცია და 2010 წლის სეზონიდან, ქულების ახალი სისტემა შემოვიღოთ”.

ახალი სისტემა, პირველ რიგში, მოწინავე სამ ადგილზე გასულების გარჯას უკეთ დააფასებს, თუმცა ის ასევე სტიმული იქნება ახალი გუნდებისთვის, რომლებსაც ქულებისთვის ბრძოლის შანსი მიეცემათ.

ამგვარად, ფორმულა 1-ის ისტორიაში, ქულების სისტემა ყველაზე რადიკალურად შეიცვალა. ბოლო ოც წელიწადში, პირველად ქულების სისტემა 1991 წელს შეიცვალა, როცა გამარჯვებულისთვის 9-ის ნაცვლად, 10 ქულა დაწესდა. 2003 წელს ქულების არეალი რვა მოწინავე ადგილამდე გაიზარდა, მეორე ადგილის შეფასება კი 6-დან 8 ქულამდე გაიზარდა.

საინტერესოა, რომ ეს ეს ცვლილება სამი წლით ადრე რომ განხორციელებულიყო, ჩემპიონატის საბოლოო შედეგები პრაქტიკულად არ შეიცვლებოდა - 2007 წელს ჩემპიონი მაინც კიმი რაიკონენი გახდებოდა, 2008 წელს ტიტულს ლუის ჰამილტონი დაეუფლებოდა, გასულ სეზონში კი პირველ ადგილს ჯენსონ ბატონი დაეუფლებოდა.

გასულ სეზონში პილოტებს ქულები შემდეგნაირად დაერიცხებოდათ: ჯენსონ ბატონი - 243 ქულა, სებასტიან ფეტელი - 203, რუბენს ბარიკელო - 187, მარკ უებერი - 178, ლუის ჰამილტონი - 123, კიმი რაიკონენი - 119 და ასე შემდეგ.

2008 წელს ჰამილტონს 240 ქულა დაუგროვდებოდა, ფელიპე მასას კი - 239.

2007 წელს, რაიკონენი ჩემპიონი 271 ქულით გახდებოდა, ჰამილტონი მას ისევ ერთი ქულით (270) ჩამორჩებოდა, მესამეზე კი 268 ქულით ფერნანდო ალონსო გავიდოდა.

არც 2003 წლის ჩემიონი შეიცვლებოდა - მიხაელ შუმახერი 225 ქულას მიიღებდა და 4 ქულით ჩამოიტოვებდა რაიკონენს.

სამაგიეროდ, ახალი სისტემა 1999 წლის ჩემპიონს შეცვლიდა. ედი ირვინი 230 ქულას მოაგროვებდა და 12 ქულით ჩამოიტოვებდა მიკა ჰაკინენს. ისე კი, ირვინი ჩემპიონი იმ შემთხვევაშიც გახდებოდა, თუ იმ დროს 2003 წელს შემოღებული სისტემა იმოქმედებდა.

კიდევ ერთი რამ, რასაც ქულების ახალი სისტემა შეცვლის ისაა, რომ აზრი დაეკარგება პილოტის ბიოგრაფიაში, მის მიერ კარიერის განმავლობაში დაგროვებული ქულების მნიშვნელობას. მაგალითად, აირტონ სენას კარიერის განმავლობაში 614 ქულა აქვს დაგროვებული, ნაიჯელ მენსელის ანგარიშზე 482 ქულაა, ჯეკი სტიუარტისა კი - 360 ქულა. დღეს კი, ყველა ამ მიღწევის გაუმჯობესება ნებისმიერ ახალბედას, სულ სამ სეზონში შეუძლიათ ისე, რომ დიდი მიღწევებიც არ ჰქონდეთ. მაინცდამაინც რთული საქმე არც შუმახერის მიღწევის (1369 ქულა) გაუმჯობესება იქნება.

სხვათა შორის, კარიერაში დაგროვილი ქულები ძალიან მნიშვნელოვანი მაჩვენებელი არც ადრე ყოფილა, რადგან თუ ფორმულა 1-ის პირველ სეზონში მხოლოდ 7 ეტაპი ჩატარდა, 2005 წელს რბოლების რაოდენობა 19 იყო და ბუნებრივია, თანამედროვე პილოტებს გაცილებით მეტი ქულის დაგროვების საშუალება აქვთ, ვიდრე 50-იანი და 60-იანი წლების პილოტებს ჰქონდათ.

”მერსედესი” შუმახერს 7 მილიონ ევროს შესთავაზებს

Mercedes to offer 7m euros for Schumacher return

11 დეკემბერი

გერმანული პრესის ინფორმაციით, ”მერსედეს-ბენცის” ფორმულა 1-ის გუნდი მზადაა, მსოფლიოს შვიდგზის ჩემპიონ მიხაელ შუმახერს 7 მილიონი ევრო შესთავაზოს იმ შემთხვევაში, თუ ის მსოფლიო ჩემპიონატს დაუბრუნდება და თავის სახელოგვან კარიერას ”სამქიმიანებთან” გააგრძელებს.

გავრცელებული ინფორმაციით, შუმახერს ამ შეთავაზებით უახლოეს მომავალში თავად ”მერსედეს მოტორშპორტის” შეფი ნორბერტ ჰაუგი მიმართავს. ცოტა ხნის წინ, ანალოგიური თანხა ”მერსედესმა” ცოტა ხნის წინ მსოფლიოს ახალ ჩემპიონ ჯენსონ ბატონსაც შესთავაზა, მაგრამ ამან ”მაკლარენში” გადასვლა ამჯობინა.

ცნობილია, რომ სანამ თავის კარიერას დაასრულებდა, შუმახერი ”ფერარისგან” სეზონში 30 მილიონ ევროს იღებდა, დღეს კი იტალიური კომპანიის კონსულტანტია და ამაში მას მარანელოელები 5 მილიონ ევროს უხდიან. შესაძლოა, შუმის 2 მილიონის გამო, ღალატი არ უღირს. გავრცელებული ინფორმაციით, ”მერსედესი” შუმახერს 7 მილიონზე მეტს ვერ შესთავაზებს.

მაგრამ აქ ისიც გასათვალისწინებელია, რომ თავის დროზე, როცა გერმანელი პილოტი თავის კარიერას იწყებდა, მაშინ სწორედ ”მერსედესი” ედგა გვერდში და სწორედ ამ კომპანიის დამსახურებაა, რომ ის ფორმულა 1-ში მოხვდა. ამაზევე მიანიშნებს მსოფლიოს სამგზის ჩემპიონი, ავსტრიელი ნიკი ლაუდაც, როცა ამბობს, რომ ”მერსედესისა” და შუმახერის ურთიერთობის განახლებაში ფული დიდ როლს არ ითამაშებს.

ცნობისათვის, ფორმულა 1-ში მოხვედრამდე, შუმახერი ”მერსედესის” იუნიორთა გუნდთან ერთად, სპორტული პროტოტიპების რბოლებში მონაწილეობდა. ფ1-ში მისი დებიუტი 1991 წელს შედგა და 2006 წლამდე, მან ფ1-ში არსებული თითქმის ყველა რეკორდი დაამხო.

ნებისმიერ შემთხვევაში, ”მერსედესის” ხელმძღვანელობა აცხადებს, რომ ნიკო როსბერგის თანაგუნდელის ვინაობას შობამდე ვერ დაასახელებს.

Thursday, December 10, 2009

ქულების სისტემა შეიძლება შეიცვალოს

Formula 1 set to adopt new points system

10 დეკემბერი

არაა გამორიცხული, რომ მომავალი სეზონისთვის, ფორმულა 1-ში ქულათა დარიცხვის ახალი, მნიშვნელოვნად შეცვლილი სისტემა შემოიღონ. ამ საკითხზე დღეს (პარასკევს), საერთაშორისო საავტომობილო ფედერაციის (FIA) მოტორ სპორტის მსოფლიო საბჭო, ფორმულა 1-ის კომისიის მიერ წარმოდგენილ პროექტს განიხილავს.

ფორმულა 1-ის კომისიის სხდომაზე მონაწილეობდნენ FI-ს ახალი პრეზიდენტი ჟან ტოდტი და ფორმულა 1-ის კომერციულ უფლებათა გამგებელი ბერნი ეკლსტოუნი, ვისაც ამ სეზონის დასაწყისში, მედლების სისტემის შემოღების დიდი სურვილი ჰქონდა.

პროექტის დამტკიცების შემთხვევაში, ქულებს პირველ ათ ადგილზე გასული პილოტები მიიღებენ. ამასთან, გამარჯვებულისთვის 25 ქულა იქნება განკუთვნილი, მეორეზე გასულს 20 ქულა დაეწერება, მესამეს - 15, მეოთხეს - 10. შემდეგ ექვს ადგილზე კი ქულები ასე დაირიცხება: 8-6-5-3-2-1.

პროექტში აღნიშნულია, რომ ქულათა დარიცხვის სისტემის შეცვლა, ჩემპიონატის მონაწილე გუნდების რაოდენობის 13-მდე გაზრდამ მოითხოვა, რის შედეგადაც, სტარტზე მანქანათა რაოდენობა 26-მდე გაიზრდება. ეს კი, 1995 წლის შემდეგ, ყველაზე მაღალი მაჩვენებელია.

ცნობისათვის, ქულათა დარიცხვის სისტემა ბოლოს 2003 წელს შეიცვალა. ქულების მიმღებთა რაოდენობა ექვსიდან რვამდე გაიზარდა.

პილოტებმა აირტონ სენა ყველა დროის საუკეთესოდ აღიარეს

Drivers vote Senna the greatest ever

10 დეკემბერი

ინგლისურმა ჟურნალმა ”ავტოსპორტმა” მასშტაბური გამოკითხვა ჩაატარა, რომელშიც ფორმულა 1-ის ყოფილ და მოქმედ პილოტებს ერთადერთი კითხვით მიმართა - ვინ არის ფორმულა 1-ის ყველა დროის უდიდესი პილოტი? გამოკითხვის შედეგად, ყველა დროის საუკეთესო პილოტად ლეგენდარული ბრაზილიელი აირტონ სენა დასახელდა.

გამოკითხვის შედეგების მიხედვით, სენას ყველაზე მეტი მეტოქეობა მიხაელ შუმახერმა და ხუან მანუელ ფანხიომ გაუწიეს, რომლებზეც შესაბამისად, 7 და 5 ტიტული მოდის.

”ავტოსპორტის” გამოკითხვაში ფორმულა 1-ის თითქმის ყველა რბოლის მონაწილე იმ პილოტებმა მიიღეს მონაწილეობა, რომლებიც ცოცხლები არიან. მათ შორის მხოლოდ ინდი 500-ის ათი რბოლის მონაწილეები არ ფიგურირებენ. ეს ის რბოლებია, რომლებიც 50-60-იან წლებში მსოფლიო ჩემპიონატის ჩათვლაში შედიოდა, მაგრამ ლოგისტიკური პრობლემების გამო, მასზე ბევრი ევროპული გუნდი არ ასპარეზობდა.

გამოკითხულთა შორის იმყოფებოდა თავად შუმახერიც, მსოფლიოს ახალი ჩემპიონი ჯენსონ ბატონი, ასევე ვეტერანები, მათ შორის, მონაკოს 1950 წლის დიდი პრიზის მონაწილე ხოსე ფროილან გონსალესი, ვინც რბოლის მომგებთა შორის ყველაზე ხნიერია და 98 წლის პაულ პიჩი, რომელიც ფორმულა 1-ის ცოცხალ პილოტებს შორის ყველაზე ხნიერია. საინტერესო ფაქტი - გამოკითხულთა ანგარიშზე 9194 სტარტი და 270 გამარჯვება მოდის...

ყოველ გამოკითხულს საშუალება ჰქონდა, თავისი შეხედულებისამებრ, ყველა დროის საუკეთესო ათი პილოტი დაესახელებინა. ამასთან, მათ არ ევალებოდათ უდიდესის დასახელება. მხოლოდ ათეული. ამასთან, მათ არც შეფასების კრიტერიუმებს უწესებდა ვინმე.

”საოცარი გამოკითხვა ჩატარდა. მსგაცსი ადრე არაფერი მსმენია. რა თქმა უნდა, საინტერესო და რიგ შემთხვევებში, მოულოდნელი შედეგები მივიღეთ. მაგრამ უდავოა, რომ ათეულში ყველაზე ღირსეულები შევიდნენ”, - განაცხადა ჟურნალ ”ავტოსპორტის” რედაქტორმა ებდრიუ ვან დე ბერგტმა.

კორეული დიდი პრიზი დებიუტისთვის ემზადება

Korean GP preparations on target

10 დეკემბერი

კორეის დიდი პრიზის ორგანიზატორები აცხადებენ, რომ ტრასის მშენებლობა და პირველი რბოლისთვის მზადების პროცესი გრაფიკის შესაბამისად მიმდინარეობს. თუმცა არსებობს პრობლემაც - რეგიონს, სადაც ტრასა შენდება, ჯერჯერობით არ ჰყოფნის სასტუმროები, რის გამოც, შესაძლოა, სხვა ქვეყნებიდან ჩასულ მაყურებელს დაბინავების პრობლემები შეექმნათ.

კორეული დიდი პრიზის დებიუტი 2010 წლის სეზონში, 17 ოქტომბერს შედგება. მონაკოში გამართულ მოტორ სპორტის ბიზნეს ფორუმზე, კორეული რბოლის ორგანიზატორის, კომპანია ”კორეან აუტო ვალეი ოპერეიშნის” წარმომადგენლებმა განაცხადეს, რომ ისინი სიტუაციას სრულად აკონტროლებენ და მშენებლობას დროულად დაასრულებენ.

”მზადება გეგმის შესაბამისად მიმდინარეობს. მშენებლობის დასრულებას 5 ივლისს ვაპირებთ. ამ ეტაპზე, ობიექტის 60 პროცენტი აგებულია და ეს ძალიან კარგი შედეგია”, - ამბობს კორეული კომპანიის სტრატეგიული დაგეგმარების განყოფილების შეფი კევინ ლი და დასძენს:

”ჩვენ უამრავი პარტნიორი გვყავს, საინჟინრო საკითხებში კი კონსულტაციებს ამ საქმის ისეთი გამოცდილი სპეციალისტისგან ვღებულობთ, როგორიც ჰერმან ტილკეა. ის კმაყოფილია მშენებლობის მიმდინარეობითაც და ტემპითაც. უკვე შეგვამოწმეს FOM-ის (ფორმულა ვარ მენეჯმენტ) სპეციალისტებმაც, რომლებმაც გაწეული მუშაობა მოგვიწონეს და ჩვენი რეგიონიც მოეწონათ”.

ტრასის სიახლოვეს ორი აეროპორტი მდებარეობს, თავად ტრასა კი სეულიდან 350 კილომეტრითაა დაშორებული. მაყურებელთა დაბინავება კი სერიოზული პრობლემა შეიძლება გახდეს. კორეული ეტაპის ორგანიზატორები რბოლაზე 120 000 ადამიანის დასწრებას ელიან, რომელთა სოლიდური ნაწილი უცხოელი იქნება, ადგილობრივთა დიდ ნაწილს კი სეულიდან მოუწევს ადგილზე ჩასვლა და აქედან გამომდინარე, მათი დაბინავებაც საჭირო გახდება.

ლი ამბობს, რომ რბოლის ორგანიზატორები პირველ რიგში, გუნდების პერსონალების დაბინავებაზე იზრუნებენ. სასტუმროების დეფიციტის აღმოსაფხვრელად კი საკრუიზო გემებს დაიქირავებენ, როგორც ეს ათენის ოლიმპიადის დროს მოხდა.

იმავდროულად, ლიმ კატეგორიულად განაცხადა, რომ ჯერჯერობით ლაპარაკი არაა კორეაში ღამის რბოლის ჩატარებაზე. ”ჯერ გამოცდილება დავაგროვოთ და ღამის რბოლაზე ლაპარაკს ორი-სამი სეზონის შემდეგ დავუბრუნდებით”, - ამბობს ლი.

Wednesday, December 9, 2009

”მერსედესი” მეორე პილოტს ჯერ ვერ დაასახელებს

Mercedes GP

9 დეკემბერი

”მერსედეს-ბენცმა” ფორმულა 1-ში საკუთარი გუნდით შემოაბიჯა და ერთი პილოტი - გერმანელი ნიკო როსბერგიც დაიმტკიცა. მაგრამ მეორე პილოტის დასახელებას აჭიანურებს და ამით ბევრ ჭორს უდებს საფუძველს. ამ ჭორებიდან კი მთავარი ისაა, რომლიც მიხაელ შუმახერს უკავშირდება.

უკვე სამი კვირაა, რაც ავტოსპორტული პრესა მსოფლიოს შვიდგზის ჩემპიონის სარბოლ ტრასებზე შესაძლო დაბრუნებაზე ლაპარაკობს. მაგრამ თუ გასულ აგვისტოში, ის ”ფერარის” საჭესთან დაჯდომაზე ფიქრობდა, დღეს მის სახელს იმ კომპანიას უფრო ხშირად უკავშირებენ, რომელმაც კარიერის დასაწყისში, დიდ გზაზე დადგომაში შეუწყო ხელი.

მოკლედ, დასამალი რაა, და ”სამქიმიანებს” ფორმულა 1-ში დაბრუნება თავიდანვე ხმაურიანად სურთ. მათი პირველი ნაბიჯი სწორედ ასეთი იყო - ხმაურიანი. გერმანულმა კომპანიამ ჩემპიონი გუნდის, ”ბრაუნის” აქციების საკონტროლო პაკეტი შეიძინა. მართალია, მსოფლიო ჩემპიონ ჯენსონ ბატონთან შეუთანხმებლობით, პირველი ნომერი დაიკარგა, მაგრამ ახლა მის ადგილზე შუმახერის მიწვევის რეალური შანსი გაჩნდა. შუმი ახლახანს ამერიკიდან, სადაც ისვენებდა, შტუტგარტში დაბრუნდა და თავის მენეჯერ ვილი ვებერს შეხვდა, რომელთან ერთადაც, თავის სამომავლო გეგმებს განიხილავს.

ბევრისთვის ეს ფაქტი იმის საფუძველი გახდა, რომ შუმახერი წინდაწინ ”მერსედესის” პილოტად გამოეცხადებინა. ხომ შეიძლებოდა, ის ვებერს სხვა გერმანულ ქალაქში შეხვედროდა. მაგრამ არა, შტუტგარტში შეხვდა, იმ ქალაქში, სადაც ”დაიმლერის” შტაბბინა მდებარეობს.

”მერსედეს მოტორშპორტის” პრეზიდენტი ნორბერტ ჰაუგი ამბობს, რომ შობის დღესასწაულამდე, ”სამქიმიანები” თავიანთი მეორე პილოტის ვინაობას ალბათ ვერ დაასახლებენ:

”კარგად მესმის ის ინტერესი, რომელიც ჩვენი მეორე პილოტის სახელს უკავშირდება. ჩემგან ყველა ამ სახელის გამოცხადებას ელის, მაგრამ ვერ შეგპირდებით, რომ ამას შობის დღესასწაულამდე გავაკეთებ. საბოლოო გადაწყვეტილების მიღებამდე, ყველაფრის აწონ-დაწონვა მოგვიწევს, ეს კი რთული პროცესია და კარგად მოფიქრებას საჭიროებს”.

სამაგიეროდ, როსბერგს შუმახერთან ერთ გუნდში ყოფნის საწინააღმდეგო არაფერი აქვს: ”ჩემი აზრით, კარგი იქნებოდა, თუ შუმახერთან ერთ გუნდში ყოფნა მომიწევს. ეს ჩემთვის მეტად საინტერესო იქნებოდა. ისე კი, გულახდილად გეტყვით - წარმოდგენა არ მაქვს, ვინ გახდება ჩემი თანაგუნდელი. ჩემთვის რომ ეკითხათ, ვისი გადმოყვანა მირჩევნია, ვეტყოდი, მაგრამ ასეთი რამ იშვიათად ხდება ხოლმე. თუმცა, მჯერა, რომ გუნდი სწორ გადაწყვეტილებას მიიღებს”.

Saturday, December 5, 2009

”ფერარისთვის” ალონსო რაიკონენს სჯობს
Alonso 'better' for Ferrari than Raikkonen
5 დეკემბერიფერნანდო ალონსო ”ფერარიში” იმის გამო მიდის, რომ იტალიურ გუნდს ისეთივე ქარიზმატული მრბოლი სჭირდება, როგორიც მისთვის მიხაელ შუმახერი იყო. ასე ახსნა თავისი გუნდის გადაწყვეტილება, შეეცვალა კიმი რაიკონენი ალონსოთი, ”ფერარის” შეფმა სტეფანო დომენიკალიმ.
”ჩვენ ისეთი პილოტი გვჭირდება, რომელიც ჩვენთვის შუმივით იქნება. რაიკონენი ძალიან სწრაფია, მაგრამ იმავდროულად, ძალიან ჩაკეტილიც. თუ მანქანა სწრაფია და მოგების საშუალებას იძლევა, რაიკონენი ძალიან კარგია. მაგრამ თუ მანქანას სრულყოფა, გუნდს კი გამხნევება სჭირდება, ამ შემთხვევაში, ალონსო უკეთესია”, - ამბობს დომენიკალი.
მაგრამ არსებობს დიდი შანსი იმისა და ამის ნიშნები უკვე გამოიკვეთა, რომ ალონსოს ურთიერთობა არ აეწყობა ბრაზილიელ ფელიპე მასასთან. ამ უკანასკნელმა ცოტა ხნის წინ განაცხადა, რომ სინგაპურის 2007 წლის რბოლის ინციდენტის შესახებ, ალონსოს არ შეიძლებოდა არ სცოდნოდა. ამასთან, ცნობილია ისიც, რომ ალონსო ”მაკლარენში” ვერ შეეგუა იმ ფაქტს, რომ მისი თანაგუნდელი (ლუის ჰამილტონი) მასზე ნაკლებად სწრაფი არ იყო. და, ესპანელმა ინგლისური გუნდი სკანდალით დატოვა.
თუმცა, დომენიკალი ამბობს, რომ ის ესაუბრა ალონსოს და მან უთხრა, რომ ”მაკლარენში” ყოფნისას, მასთან ურთიერთობისას, ჰამილტონი ყოველთვის კორექტული არ იყო. მაგრამ, ”მარანელოში მსგავსი არაფერი მოხდება, ამის გარანტიას მე ვიძლევი”, - დასძენს დომენიკალი.
შუმახერი თავის მენეჯერს შეხვდება
Michael Schumacher
4 დეკემბერიგერმანული გამოცემა ”ბილდ ცაიტუნგი” გვატყობინებს, რომ ამ უქმეების შემდეგ, მიხაელ შუმახერს თავის ყოფილ მენეჯერ ვილი ვებერთან შეხვედრა აქვს დანიშნული.
როგორც ცნობილის, ავტოსპორტული მედია მსოფლიოს შვიდგზის ჩემპიონის ფორმულა 1-ში დაბრუნების მოლოდინშია. სავარაუდოდ, 40 წლის პილოტი ”მერსედესის” გუნდში გააგრძელებს თავის სახელოვან კარიერას. ამ უკანასკნელმა ახლახანს ჩემპიონი ”ბრაუნი” შეიძინა და მომავალ სეზონშივე ჩემპიონიბისთვის ბრძოლას აპირებს. და, როგორც ამბობენ, ამისთვის დიდი ჩემპიონის დახმარება სჭირდება.
”ბილდ ცაიტუნგის” ინფორმაციით, შუმახერი ამჟამად ამერიკაში ატარებს დროს, მაგრამ ორშაბათს გერმანიაში, კერძოდ კი, ქალაქ შტუტგარტში აპირებს ჩასვლას, სადაც ვებერს შეხვდება. შტუტგარტი კი ის ქალაქია, სადაც ”მერსედეს-ბენცის” და მისი მფლობელი ”დაიმლერის” შტაბ ბინაა განლაგებული. ისიც აღსანიშნავია, რომ შუმახერის ”მერსედესში” შესაძლო გადასვლის შესახებ მითქმა-მოთქმას არც თავად შუმახერი უარყოფს და არც გერმანული კომპანია.
ვებერი კი აცხადებს, რომ ამ ამბისა არაფერი იცის და არც მისი კლიენტის ”მერსედესში” გადასვლისა სჯერა: ”წარმოდგენაც კი მიჭირს იმისა, რომ მომავალ სეზონში მას ”მერსედესში” ვიხილავ. ახლახანს მან ”ფერარისთან” კონტრაქტი სამი წლით გააგრძელა”.
მაგრამ ”ბილდ ცაიტუნგს” ეს არ აკმაყოფილებს და გვაუწყებს, რომ შუმახერს ახლახანს კისრის სავარჯიშო ტრენაჟორი შეუძენია და უკვე მასზე ვარჯიშსაც შესდგომია.

Friday, December 4, 2009

”ზაუბერი” ფორმულა 1-ს დაუბრუნდა

Sauber confirmed as 13th Formula 1 team

4 დეკემბერი

საერთაშორისო საავტომობილო ფედერაციამ (FIA) ფორმულა 1-ის მე-13 გუნდად შვეიცარიული ”ზაუბერი” დაამტკიცა, რომელიც მსოფლიო ჩემპიონატიდან გასული ”ტოიოტას” ადგილს დაიკავებს.

”FIA-მ ”ბეემვე ზაუბერს” წერილობით შეატყობინა, რომ მისი განაცხადი 2010 წლის მსოფლიო ჩემპიონატზე დაკმაყოფილებულია. სუბიექტი, რომელსაც თანხმობის ხელშეკრულებაზე ”ბეემვე ზაუბერის” სახელით აქვს ხელი მოწერილი, ჩემპიონატიდან გასული ”ტოიოტას” ადგილს დაიკავებს”, - ნათქვამია ფედერაციის განცხადებაში, სადაც ”ზაუბერი” ჯერაც მისი ძველი სახელით - ”ბეემვე ზაუბერად” არის მოხსენიებული.

მიუნხენურმა ავტომწარმოებელმა ”ზაუბერის” აქციების 80 პროცენტი 2005 წელს შეიძინა, მაგრამ გასული სეზონის მსვლელობისას, კერძოდ კი ივლისში, როდესაც თანხმობის ახალი ხელშეკრულება ჯერაც არ იყო გაფორმებული, მსოფლიო ჩემპიონატიდან გასვლის შესახებ გამოაცხადა. რამდენადაც დოკუმენტზე გუნდის წარმომადგენლის ხელმოწერა არ დაფიქსირებულა, გუნდმაც ფ1-ში ადგილი დაკარგა და ”ტოიოტა” რომ დარჩენილიყო, ”ზაუბერს” მერმის სტარტზე ვერ ვიხილავდით.

რამდენიმე დღის წინ, ”ბეემვემ” პეტერ ზაუბერს ის აქციები უკანვე მიჰყიდა, რომლებიც ხუთი წლის წინ ჰქონდა ნაყიდი. . არადა, იყო ლაპარაკი იმაზე, რომ ამ აქციების შეძენა შვეიცარიულ საინვესტიციო ჯგუფ ”ქადბაკს” სურდა. თავად ”ზაუბერის” ადგილი კი ფორმულა 1-ში დაბრუნებულმა ინგლისურმა (მალაიზიური ”პროტონის” მფლობელობაში მყოფმა) ”ლოტუსმა” დაიკავა.

მიუხედავად იმისა, რომ ”ტოიოტამ” ფ1-დან გასვლის განცხადება გასული სეზონის ბოლო ეტაპის, აბუ დაბის დიდი პრიზის შემდეგ გამოაცხადა, მაგრამ FIA-მ ”ზაუბერის” საკითხი მაინც ღიად მანამ დატოვა, სანამ ”ტოიოტა” თავის გადაწყვეტილებას ოფიციალურად, წერილობით დაადასტურებდა.

სხვათა შორის, ”ზაუბერს” ”ფერარისთან” უკვე გაფორმებული აქვს კონტრაქტი, რომლის მიხედვითაც, მომავალ სეზონში, იტალიური კომპანიის ძრავებს გამოიყენებს. ამ ორი გუნდის თანამშრომლობა ახალი არაა. შვეიცარიელები იტალიურ ძრავებს მანამდეც იყენებდნენ, სანამ გუნდს ”ბეემვე” შეიძენდა.

”ძალიან გაგვახარა იმ ფაქტმა, რომ FIA-მ ჩვენ გუნდს მე-13 ადგილი მიანიჭეს. ამგვარად, გაურკვევლობის პერიოდი დასრულდა და ჩვენც მუშაობის საშუალება მოგვეცემა. ახლა მთელ ყურადღებას მომავალი სეზონისთვის მზადებას დავუთმობთ. ეჭვიც არ გვეპარება იმაში, რომ პეტერ საუბერი და მისი გუნდი ღირსეულად გამოსვლას შეძლებენ. გვინდა, მათ წარმატებნები ვუსურვოთ”, - განაცხადა ”ბეემვე ზაუბერის” შეფმა მარიო თაისენმა.

ფორმულა 1-ის მსოფლიო ჩემპიონატზე, ”ზაუბერი” 1993-2005 წლებში მონაწილეობდა. ამ პერიოდში, გუნდის საუკეთესო შედეგი, 2001 წელს კონსტრუქტორთა პირველობაზე დაკავებული მეოთხე ადგილია. შვეიცარული საჯინიბოს პილოტებს სტარტი პირველი რიგიდან მხოლოდ ორჯერ აქვთ აღებული. ექვსჯერ კი მათ კვარცხლბეკზე (ექვსივეჯერ მესამე საფეხურზე) ასვლა შეძლეს.

რაიკონენმა ფორმულა 1 რალიზე გაცვალა
Raikkonen switches from Formula 1 to rally
4 დეკემბერი
ფორმულა 1-ში მსოფლიოს 2007 წლის ჩემპიონმა, ფინელმა კიმი რაიკონენმა გამოაცხადა, რომ მომავალ სეზონში რალის მსოფლიო ჩემპიონატზე, ”სიტროენის” გუნდში იასპარეზებს, რომელსაც ენერგეტიკული სასმელების მწარმოებელი ავსტრიული კომპანია ”რედ ბული” ასპონსორებს.
ფრანგულმა კომპანიამ გამოაცხადა, რომ რაიკონენთან ერთწლიანი კონტრაქტი გაფორმდა, რომლის შესაბამისადაც, მომავალ სეზონში, ფინელი პილოტი მსოფლიო ჩემპიონატის 13 ეტაპიდან 12-ში მიიღებს მონაწილეობას.
”რალიზე გამოსვლა ყოველთვის მიზიდავდა, განსაკუთრებით კი მსოფლიო ჩემპიონატზე ასპარეზობა მსურდა. ეს ჩემთვის ახალი და ძალიან საინტერესო გამოწვევაა. ამ მომენტისთვის, მხოლოდ ერთწლიანი კონტრაქტი გავაფორმეთ, თუმცა ვნახოთ, როგორ განვითარდება მოვლენები - გამორიცხული არაფერია. ახლა მოუთმენლად ველი ტესტების დაწყებას და ერთი სული მაქვს, როდის მომეცემა ასპარეზობის საშუალება”, - განაცხადა 30 წლის რაიკონენმა, ვისაც ფ1-ში 18 რბოლა აქვს მოგებული.
შეგახსენებთ, რომ 2007 წელს ფინელმა პილოტმა ჩემპიონის ტიტული ”ფერარის” ბოლიდით მოიპოვა. მაგრამ გასული სეზონის ბოლოს, იტალიურმა გუნდმა მის ადგილზე მსოფლიოს ორგზის ჩემპიონი, ესპანელი ფერნანდო ალონსო მიიწვია. მას შემდეგ კი, რაც ”მაკლარენთან” კონტრაქტი ვერ გააფორმა, რაიკონენმა განაცხადა, რომ თუ კონკურენტუნარიან გუნდში მოხვედრის შანსი არ ექნებოდა, ფ1-დან ერთწლიან შვებულებას აიღებდა და მომავალ სეზონს რალის მსოფლიო ჩემპიონატში გაატარებდა.
ამგვარად, წერტილი დაესვა ვარაუდებს იმის შესახებ, რომ მომავალ სეზონში ფინელ პილოტს ”მერსედესში”, იქიდან წამოსული მსოფლიო ჩემპიონის, ჯენსონ ბატონის ადგილი უნდა დაეკავებინა.
რაიკონენმა გასულ სეზონში რალის მსოფლიო ჩემპიონატის ერთ ეტაპზე - ფინეთის რალიზე ”ფიატის” მანქანით იასპარეზა. გარდა ამისა, სამ სხვა სერიის რბოლაზეც გამოვიდა. ამჯერად კი ის სულ სხვა დონის მანქანით იასპარეზებს, იმ მანქანით, რომლითაც ლეგენდარულმა ფრანგმა სებასტიან ლოებმა მსოფლიო ჩემპიონის მეექვსე ტიტული მოიპოვა.
რაიკონენს ნავიგატორად ამ საქმის შესანიშნავი მცოდნე - თანამემამულე კაი ლინდსტრიომი ეყოლება, რომელიც თავის დროზე, ფინრლ ტომი მაკინენთან ერთად, ზედიზედ ოთზჯერ გახდა რალის მსოფლიო ჩემპიონი.
ერთადერთი ეტაპი, რომელსაც რაიკონენი გამოტოვებს, ახალი ზელანდიის რალია. ”სიტროენ ჯუნიორ ტიმში” რაიკონენის თანაგუნდელი ფრანგი ამომავალი ვარსკვლავი სებასტიან ოჟიე იქნება. რაც შეეხება ლოებს, მას ”სიტროენის” ძირითად გუნდში თანაგუნდელად ისევ ესპანელი დანიელ სორდო ეყოლება.

Thursday, December 3, 2009

FIA-მ ფრმულა 1-ის ჩემპიონატის მონაწილეთა სია გამოაქვეყნა
Formula 1. teams
3 დეკემბერი2010 წლის ჩემპიონატის დაწყებამდე 102 დღით ადრე, საერთაშორისო საავტომობილი ფედერაციამ (FIA) გამოაქვეყნა იმ გუნდების და მათი პილოტების წინასწარი სია, რომლებიც ამ ჩემპიონატში მონაწილეობას მიიღებენ. ჯერჯერობით, ამ სიაში არც ”ტოიოტა” და ”არც საუბერი” არ ფიგურირებენ. გარდა ამისა, ჯერ მხოლოდ 15 პილოტის განაცხადია დადასტურებული.
სიაში ახალი გუნდი ”მეინორი” უკვე ოფიციალურადაა მოხსენიებული, როგორც ”ვირჯინი” - ბრიტანელ მილიარდერ რიჩარდ ბრენსონის ჰოლდინგმა, როგორც მოსალოდნელი იყო, ახალი გუნდის დაფინანსების სანაცვლოდ, მისი სახელწოდების შეცვლა მოითხოვა და ეს მოთხოვნა დაუკმაყოფილდა. თუმცა, რამდენად მომგებიანი იქნება მისთვის ეს სარეკლამო კამპანია, ძნელი სათქმელია. ერთი რამ კი ფაქტია - ბრენსონმა ჩემპიონ გუნდთან (ბრაუნთან, უფრო სწორედ, მერსედესთან) პარტნიორობას ახალბედა საჯინიბოს შეძენა ამჯობინა.
”ბრენსონ-მეინორთან” დაკავშირებით, ამ ეტაპზე ცნობილია ისიც, რომ მისი ტექნიკური დირექტორი გამოცდილი ნიკ უირტი იქნება, პირველ პილოტად კი გერმანელი ტიმო გლოკი იასპარეზებს.
მართალია, ჯერჯერობით სიაში მხოლოდ 12 გუნდი არის შეტანილი, მაგრამ რამდენადაც ”ტოიოტას” თანხმობის ხელშეკრულებაზე აქვს ხელი მოწერილი, ამ გუნდს ”საუბერთან” შედარებით, უპირატესობა ენიჭება. უფრო სწორედ, იმ გუნდს, რომელიც ”ტოიოტას” შეიძენს. ამის სურვილი ოფიციალურად გამოთქვა სერბულმა კომპანიამ, მაგრამ ამისგან რა გამოვა, ეს ჯერ არავინ უწყის.
თუ ”ტოიოტა” თანხმობის ხელშეკრულებიდან გავა, მაშინ მის ადგილს ”საუბერი” დაიკავებს, რომელიც უკვე შესდგომია ახალი მანქანის შექმნას და იმედიც აქვს, რომ ბაჰრეინის დიდ პრიზზე სტარტზე დადგება.
გუნდების სიაში ისიცაა საინტერესო, რომ ”რედ ბულის” ძრავების მიმწოდებლად ისევ ”რენოა” მოხსენიებული. არადა, იყო ლაპარაკი იმაზე, რომ ავსტრიული კომპანია ”მერსედესის” აგრეგატებზე გადასვლას აპირებდა.
სიაში ისევ ძველი სახელით ფიგურირებს ”ბრაუნი”, თუმცა სიას თან სდევს შენიშვნა, რომ ამ გუნდმა სახელის ”მერსედესით” სეცვლის სურვილი ოფიციალურად გამოთქვა.

2010 წლის ჩემპიონატის ოფიციალური განაცხადი
გუნდი კონსტრუქტორი
ვოდაფოუნ მაკლარენ მერსედესი მაკლარენ მერსედესი
1. ჯენსონ ბატონი (ბრიტანეთი)
2. ლუის ჰამილტონი (ბრიტანეთი)
ბრაუნ GP ფორმულა ვან ტიმ ბრაუნ მერსედესი
3. ნიკო როსბერგი (გერმანია)
4. ჯერ უცნობია
რედ ბულ რეისინგი რედ ბულ რენო
5. სებასტიან ფეტელი (გერმანია)
6. მარკ უებერი (ავსტრალია)
სკუდერია ფერარი მარლბორო ფერარი
7. ფელიპე მასა (ბრაზილია)
8. ფერნანდო ალონსო (ესპანეთი)
AT&T უილიამსი უილიამს კოსუორტი
9. რუბენს ბარიკელო (ბრაზილია)
10. ნიკო ჰულკენბერგი (გერმანია)
რენო F1 ტიმ რენო
11. რობერტ კუბიცა (პოლონეთი)
12. ჯერ უცნობია
ფორს ინდია F1 ტიმ ფორს ინდია მერსედესი
14. ადრიან აუტილი (გერმანია)
15. ვიტანტონიო ლიუცი (იტალია)
სკუდერია ტორო როსო სკუდერია ტორო როსო ფერარი
16. სებასტიან ბუემი (შვეიცარია)
17. ჯერ უცნობია
ლოტუს F1 რეისინგ ლოტუს კოსუორტი
18. ჯერ უცნობია
19. ჯერ უცნობია
კამპოს მეტა 1 კამპოს დალარა
20. ჯერ უცნობია
21. ბრუნო სენა (ბრაზილია)
US F1 ტიმ US F1 კოსუორტი
22. ჯერ უცნობია
23. ჯერ უცნობია
ვირჯინ რეისინგი ვირჯინ კოსუორტი
24. ტიმო გლოკი (გერმანია)
25. ჯერ უცნობია

Sunday, November 29, 2009

შუმახერი დაბრუნებას არ გამორიცხავს
Michael Schumacher
29 ნოემბერიარაა გამორიცხული, რომ მომავალ სეზონში მიხაელ შუმახერი მაინც ვიხილოთ ფორმულა 1-ში. მსოფლიოს შვიდგზის ჩემპიონი ადასტურებს, რომ სრულად მოირჩინა ტრავმა, რომელიც გასული სეზონის დაწყებამდე, მოტოავარიისას მიიღო და არც იმას გამორიცხავს, რომ მერმის შეიძლება ფორმულა 1-ს დაუბრუნდეს.
ამ უქმეებზე გერმანელმა ფელიპე მასას მიერ ორგანიზებულ საქველმოქმედო ტურნირზე იასპარეზა და კარტინგის რბოლა მოიგო კიდეც. რაც მთავარია, მან რბოლისას თავისი ოსტატობა არაერთხელ გამოავლინა.
რა თქმა უნდა, ბრაზილიელი რეპორტიორები დაინტერესდნენ, აპირებს თუ არა შუმახერი ფ1-ში დაბრუნებას, რაზეც მისგან ორაზროვანი პასუხი მიიღეს - ”ვინ იცის”? ბევრისთვის ეს იმის ნიშანი იყო, რომ შუმი დაბრუნებაზე ფიქრობს.
მაგრამ ”ფერარიში” ორივე ადგილი დაკავებულია, ერთი გუნდის სამი მანქანით გამოსვლის შანსი კი პრაქტიკულად არ არსებობს. სხვა კონკურენტუნარიანი გუნდი, რომლის საჭესთან დაჯდომაც შეიძლება შუმახერმა ისურვოს, ”მერსედესია”, რომელსაც ჯერ მხოლოდ ერთი პილოტი ჰყავს, მეორის დასახელებას კი არ ჩქარობს.
ამ მეორე ვაკანსიაზე რამდენუმე კანდიდატურა განიხილება. პირველია გერმანელი ნიკ ჰაიდფელდი, რომლის მიწვევის შემთხვევაშიც, ”სამქიმიანები” სრულიად გერმანულ გუნდს ჩამოაყალიბებენ. მეორე კანდიდატია რობერტ კუბიცა, რომელსაც მართალია, კონტრაქტი ახალი გაფორმებული აქვს ”რენოსთან”, მაგრამ თუ ეს უკანასკნელი ჩემპიონატის მიტოვებას გადაწყვეტს, კუბიცაც გათავისუფლდება და ”მერსედესისთვის” ის მისწრება იქნება.
მაგრამ შტუტგარტელებისთვის ყველაზე სასურველი მაინც შუმახერი იქნება, ვინც სხვათა შორის, დიდ ავტოსპორტში სწორედ ”მერსედეს-ბენცის” ახალგაზრდა გერმანელი პილოტების მხარდაჭერის პროგრამის დახმარებით მოხვდა. როგორც ამბობენ, შუმის ”ფერარისთან” კონტრაქტი ა გაუგრძელებია, რაც ირიბად სწორედ იმაზე მიგვანიშნებს, რომ მას ”მერსედესთან” სერიოზული გეგმები აკავშირებს...
რედ ული” რაიკონენის გადაბირებას აპირებს
Red Bull-Kimi Raikkonen
29 ნოემბერიინტერნეტით ვრცელდება ინფორმაცია, რომლის მიხედვითაც, ”მერსედეს GP” ნიკო როსბერგს თანაგუნდელად ან ნიკ ჰაიდფელდს მოუსვამს, ან ”რენოდან” პოლონელ რობერტ კუბიცას გადმოიბირებს. ეს კი იმას ნიშნავს, რომ კიმი რაიკონენისთვის ტოპ გუნდებში ადგილი აღარ დარჩება და მსოფლიოს 2007 წლის ჩემპიონი მომავალ სეზონს გამოტოვებს.
ესე იგი, ფინელი ”აისმენი” თავის შესაძლებლობებს რალის მსოფლიო ჩემპიონატზე მოსინჯავს. აქ კი მის გადაბირებას ენერგეტიკული სასმელების მწარმოებელი ავსტრიული კომპანია ”რედ ბული” ეცდება, რომელიც რალიში ფრანგი სებასტიან ლოების ”სიტროენს” აფინანსებს, ფორმულა 1-ში კი ორი გუნდი - ”რედ ბული” და ”ტორო როსო” ჰყავს.
”ჯერჯერობით, ხელმოწერილი არაფერია და იმასაც გეტყვით, რომ რაიკონენთან ტელეფონით არასდროს მისაუბრია, თუმცა ეს სულაც არ ნიშნავს, რომ მთელი ეს მითქმა-მოთქმა უსაფუძვლო ჭორებია. პირიქით, არსებობს რეალური შანსი იმისა, რომ მერმის ის ჩვენთან ერთად მსოფლიო ჩემპიონატზე იხილოთ”, - ამბობს ”სიტროენის” სპორტული პროგრამების შეფი ოლივიე კესნელი.
რალის მსოფლიო ჩემპიონატზე რაიკონენის გამოსვლას ალბათ ”რედ ბული” დააფინანსებს, რომელსაც ფინელ სუპერმრბოლთან ხანგრძლივი ურთიერთობა აინტერესებს. დიტრიხ მატეშიცის კომპანიისთვის, ”აისმენის” რალით გატაცების დაფინანსება იმის საწინდარი უნდა გახდეს, რომ ფ1-ში დაბრუნების შემთხვევაში, ის სწორედ ”რედ ბულის” წევრი გახდება.
ცნობისათვის, ავსტრალიელ მარკ უებერს ”რედ ბულთან” კონტრაქტი მომავალი სეზონის შემდეგ უმთავრდება და სავარაუდოდ, ამის შემდეგ, მის ადგილზე სწორედ რაიკონენს მიიწვევენ.