formula 1

„მერსედესი“ შუმახერს მხარს უჭერს

Schumacher has full Mercedes support

11 მაისი

„მერსედეს GP-ს“ ხელმძღვანელობა დარწმუნებულია მიხაელ შუმახერის შესაძლებლობებში. თურქეთის დიდ პრიზზე აშკარა ჩავარდნის მიუხედავად, სამქიმიანებს ეჭვი არ ეპარებათ, რომ მსოფლიოს შვიდგზის ჩემპიონი გუნდს კარგი შედეგების მიღწევაში დაეხმარება.

ისტანბულში რბოლა შუმახერმა უქულოდ დაასრულა. მას რბოლა მეორე წრეზევე გაუფუჭდა მას შემდეგ, რაც ვიტალი პეტროვს დაეჯახა. გერმანელს შეჰახებისას დაზიანებული წინა ფრთის გამოცვლამ მოუწია და ამის შემდეგ, მხოლოდ მაშინ ჩანდა, როდესაც პელოტონის მეორე ნაწილში პოზიციის შესანარჩუნებლად ბრძოლა უწევდა.

არადა, რბოლის შემდეგ შესრულებულმა ანალიზმა აჩვენა, რომ შუმი მოწინავე ათეულში შესულ რამდენიმე პილოტზე სწრაფი იყო, თუმცა ტრეფიკის გამო, სისწრაფეში თავისი უპირატესობა ვერ გამოიყენა. ნარბოლევს მან განაცხადა, რომ თურქეთში ასპარეზობას მისთვის სიამოვნება არ მიუნიჭებია.

მის ამ გამონათქვამს ბევრი Iორის აგორება მოჰყვა, რომელთა მიხედვიტაც, შუმის ფ1 აღარ მოსწონს და ამის გამო, „მერსედესი“ მის შეცვლას აპირებს. მაგრამ სწორედ ამ ჭორების გასაფანტად, გერმანულმა გუნდმა განცხადება გამოაქვეყნა, რომლითაც თავის სახელოვან პილოტს სრულ მხარდაჭერას პირდება.

„როცა წარუმატებლად ასპარეზობ, ყველა გაკრიტიკებს. ეს ცხოვრებისეული მოვლენაა. მითუმეტეს, როდესაც მსოფლიოს შვიდგზის ჩემპიონი წარმატებას ვერ აღწევს, მას კრიტიკის წვიმა ატყდება თავს. და მე მესმის, რატომაც: ხალხი მისგან და მერსედესისგან საუკეთესო შედეგებს ელის, რაც ჩვენს მიზნებსაც შეესაბამება. პრაქტიკებსა და რბოლაში მიხაელის წრის დროები რომ გავაანალიზეთ, გამოჩნდა, რომ მას კარგი სიჩქარე აქვს. მეორე წრეზე კონტაქტი და ამის გამო, ბოქსში შესვლაზე დაკარგული დრო რომ არა, ის რბოლას მეექვე, ან მეშვიდე ადგილზე დაასრულებდა. ამას ჰაერზე არ ვამბობ, ეს ფაქტია. ასეთი პოტენციალი კი მარწმუნებს იმაში, რომ შედეგები მალე იქნება“, - ამბობს „მერსედეს ბენცის“ მოტორსპორტის შტოს შეფი ნორბერტ ჰაუგი.

ის დასძენს, რომ არ გაჰკვირვებია, როცა შუმახერმა ჟურნალისტებთან საუბრისას განაცხადა, რომ ისტანბულის რბოლას მისთვის სიამოვნება არ მოუტანია. თუმცა, არც ის უკვირს, რომ მისი დონის პილოტი, ასეთი შედეგის შემდეგ ცუდ განწყობაზე დადგა:

„მე მესმის მისი. მე-12 ადგილი, როცა იცი, რომ ამ შეჯახების გარეშე, გაცილებით უკეთესი შედეგი გექნებოდა, სიამოვნების მომტანი ვერ იქნება. დარწმუნებული ვარ, ბარსელონაში რბოლა სიამოვნებას მოუტანს. ჩვენ საკუთარი შესაძლებლობების, ჩვენი პილოტების გვჯერა, თავდაუზოგავად და მშვიდად ვმუშაობთ და დარწმუნებულები ვართ, რომ მიზანს მივაღწევთ“.