formula 1

ფეტელის ოთხიდან მეოთხე პოული

Vettel on pole for fifth race in a row

7 მაისი

თავისუფალ პრაქტიკებზე ნაჩვენები უღიმღამო შედეგები რომ „რედ ბულისთვის“ ცუდს არაფერ მოასწავებდა, ამაში ეჭვი არავის შეპარვია. ამის დასტურად კი კვალიფიკაციის შედეგები მივიღეთ, რომლის შემდეგაც, სასტარტო მოწინავე რიგზე დადგომის უფლება, სწორედ ავსტრიული გუნდის პილოტებმა - სებასტიან ფეტელმა და მარკ უებერმა მოიპოვეს. ამასთან, ფეტელმა ამ სეზონში ყველა, ზედიზედ კი მეხუთე პოულ პოზიცია დაისაკუთრა.

მსოფლიოს გერმანელი ჩემპოიონი, მის მიერ სესიის მესამე ნაწილის შუაწელში ნაჩვენები დროით იმდენად კმაყოფილი იყო, რომ რბოლის მიწურულს, ტრასაზე არც გამოსულა. ავსტრალიელი თანაგუნდელი მას 0.405 წამით ჩამორჩა.

მოკლედ, „რედ ბულმა“ ზედიზედ მესამედ მოიგო თურქული რბოლის კვალიფიკაცია. საინტერესოა, რომ ისტანბულ პარკზე რბოლებს ყოველთვის ის პილოტები იგებენ, რომლებიც სტარტზე პირველ რიგში დგანან. სხვათა შორის, ფეტელმა სტარტი შარშანაც პირველი რიგიდან აიღო, მაგრამ ფინიშს იმ მარტივი მიზეზის გამო ვერ მიაღწია, რომ შუა რბოლაში, ლიდერობისთვის ბრძოლისას, უებერს დაეჯახა. ამ ინციდენტმა კი „მაკლარენს“ დუბლის საშუალება მისცა...

ფეტელი ამ სეზონში ყველა ეტაპის პოულს დაეუფლა

..............................

„პრაქტიკაზე არ გამიმართლა, მაგრამ დღეს ყველაფერი თავის ადგილზეა და ამით ბედნიერი ვარ. ჩემმა მექანიკოსებმა ბევრი იშრომეს და ამან შედეგი გამოიღო. დღეს მანქანა შესანიშნავად მუშაობდა“, - განაცხადა ფეტელმა.

სხვათა შორის, ის და უებერი გუნდთან წინასწარ შეთანხმდნენ, რომ თუ კვალიფიკაციის ბოლო წუთის წინ, მათ საუკეთესო შედეგები ექნებოდათ, ტრასაზე აღარ გამოვიდოდნენ და ამგვარად, საბურავების დაზოგვას შეძლებდნენ. „მაგრამ საბოლოოდ მაინც წინასწარ ვერ იტყვი, რა იქნება. თუ ასეთი ტაქტიკა გაამართლებს, გმირი გახდები, თუ არა, მაშინ წააგებ“, - დასძენს ფეტელი, ვინც კარიერაში მე-19 პოულს დაეუფლა (ერთით ნაკლები აქვს ჰამილტონს).

თუ პრაქტიკებზე ყველაზე სწრაფები „მერსედესის“ ძრავებით მოასპარეზენი იყვნენ, ამჯერად ისინი მეორე რიგიდან სტარტს დასჯერდნენ. თანაც, მესამე შედეგი სამქიმიანების ნიკო როსბერგმა აჩვენა, რაც მისთვისაც და მისი გუნდისთვისაც დიდი მიღწევაა. სხვათა შორის, როსბერგმა წამზე მეტით აჯობა თავის ტიტულოვან თანაგუნდელ მიხაელ შუმახერს, ვინც მერვე შედეგს დასჯერდა და რა ტქმა უნდა, ამით უკმაყოფილო დარჩა.

ნიკო როსბერგი ასპარეზობისას

..............................

სამაგიეროდ, მეხუთე ადგილით აშკარად კმაყოფილი დარჩა ფერნანდო ალონსო, ვინც აღნიშნა, რომ ახალი აეროდინამიკური ელემენტები, რომლებიც „ფერარიმ“ ისტანბულისთვის შეიმუშავა, კარგად მუშაობს და რომ ეს ლიდერების დევნაში გადადგმული პირველი სერიოზული ნაბიჯია.

ფეტელმა ზედიზედ მეხუთე პოული მოიპოვა და თუ მომდევნო სამი ეტაპის კვალიფიკაციებზეც გაიმარჯვებს, მაშინ ლეგენდარული აირტონ სენას მიღწევას გაიმეორებს. მსოფლიოს სამგზის ჩემპიონს, 1988/89 წლებში, ზედიზედ რვა რბოლის პოული აქვს მოპოვებული. იმ სეზონებში ის „მაკლარენ-ჰონდას“ მანქანით ასპარეზობდა.

კვალიფიკაციის შედეგები

1. სებასტიან ფეტელი (გერმანია, რედ ბული) 1:25.049

2. მარკ უებერი (ავსტრალია, რედ ბული) 1:25.454

3. ნიკო როსბერგი (გერმანია, მერსედესი) 1:25.574

4. ლუის ჰამილტონი (ბრიტანეთი, მაკლარენი) 1:25.595

5. ფერნანდო ალონსო (ესპანეთი, ფერარი) 1:25.851

6. ჯენსონ ბატონი (ბრიტანეთი, მაკლარენი) 1:25.982

7. ვიტალი პეტროვი (რუსეთი, რენო) 1:26.296

8. მიხაელ შუმახერი (გერმანია, მერსედესი) 1:26.646

9. ნიკ ჰაიდფელდი (გერმანია, რენო) 1:26.659

10. ფელიპე მასა (ბრაზილია, ფერარი) დროის გარეშე

- - - - - - - - - -

11. რუბენს ბარიკელო (ბრაზილია, უილიამსი) 1:26.764

12. ადრიან სუტილი (გერმანია, ფორს ინდია) 1:27.027

13. პოლ დი რესტა (ბრიტანეთი, ფორს ინდია) 1:27.145

14. პასტორ მალდონადო (ვენესუელა, უილიამსი) 1:27.236

15. სერხიო პერესი (მექსიკა, ზაუბერი) 1:27.244

16. სებასტიან ბუემი (შვეიცარია, ტორო როსო) 1:27.255

17. ხაიმე ალგერსუარი (ესპანეთი, ტორო როსო) 1:27.572

- - - - - - - - - -

18. ჰეიკი კოვალაინენი (ფინეთი, ლოტუსი) 1:28.780

19. იარნო ტრული (იტალია, ლოტუსი) 1:29.673

20. ჟერომ დ’ამბროზიო (ბელგია, ვირჯინი) 1:30.445

21. ვიტანტონიო ლიუცი (იტალია, ისპანია) 1:30.692

22. ტიმო გლოკი (გერმანია, ვირჯინი) 1:30.813

23. ნარაინ კართიკეიანი (ინდოეთი, ისპანია) 1:31.564

24. კამუი კობაიაში (იაპონია, ზაუბერი) დროის გარეშე