„ფერარიმ“ უკვე მომავალი სეზონისთვის მზადება დაიწყო
Ferrari Kicks Off Aggressive 2012 Car Project
13 მაისი
მიმდინარე სეზონში ჯერ მხოლოდ ოთხი ეტაპია გამართული, თუმცა ესეც საკმარისი გამოდგა იმისათვის, რომ „ფერარის“ კრიტიკის ქარცეცხლი დასტყდომოდა თავს. თავად გუნდიც აღიარებს, რომ ბოლიდ „150 იტალიას“ შემუშავებისას, კონსერვატიული მიდგომა გამოიყენეს, რამაც უღიმღამო შედეგები განაპირობა. ჰოდა, კვარცხლბეკზე პირველად წითელკომბინეზონიანი პილოტი ახლახანს, თურქული რბოლის შემდეგ ავიდა.
ისიც ფაქტია, რომ ჩინური ეტაპის შემდეგ, „ფერარიმ“ დაწვრილებითი ანალიზი ჩაატარა და ჩავარდნის მიზეზები დაადგინა, რის შემდეგაც, მანქანის სრულყოფის გრაფიკიც შედგა. მის შესაბამისად, ყოველი შემდგომი ეტაპის წინ, მანქანა სრულყოფის ახალ ეტაპს გაივლის. მაგრამ ამით მარანელოელთა გეგმები არ შემოიფარგლება. ჩატარებული ანალიზის საფუძველზე, მათ გადაწყვიტეს, რომ მომავალი სეზონის მანქანაზე მუშაობა დაიწყონ.
ამ ინფორმაციას ესპანური პრესა ავრცელებს. კერძოდ, გაზეთი „მარკა“ გვამცნობს, სკუდერიას რომ ინჟინრებს, მომავალი სეზონის მანქანის შემუშავება უკვე დაწყებული აქვთ. კერძოდ, უკვე შემუშავებულია შასი, გადაცემათა კოლოფი, საკიდარი და გაგრილების სისტემები. ამასთან, მანქანის შემუშავებისას, კონსერვატიულის ნაცვლად, ინოვაციურ მეთოდოლოგიას იყენებენ.
„მარკასთან“ საუბრისას, „ფერარის“ მთავარმა ინჟინერმა ნიკოლას ტომბაზისმა განაცხადა, რომ ახალი მანქანის შემუშავება უკვე დაწყებულია, „რადგან სხვა შემთხვევაში, ეს პროცესი ძალიან დაგვიანებული იქნება. სანამ მასზე მუშაობას დავიწყებდით, ამ სეზონის ყველა პრობლემა დაწვრილებით განვიხილეთ და ახალი პროექტისთვის უფრო აგრესიული და რადიკალური მეთოდოლოგია ავირჩიეთ“.
No comments:
Post a Comment