formula 1

უებერს უკვე მეორე ნომრად მოიხსენიებენ

Red Bull Official Hints at No 2 Role for Mark Webber

16 მაისი

ძნელი წარმოსადგენია, უებერი (მარცხნივ) ფეტელის მსახურის როლს შეეგუოს. მერე რა, რომ ჩემპიონს ქუდზე პირველი ნომერი აწერია...

..............................

შესაძლოა, მარკ უებერს ჩემპიონობის იმედი ჯერაც აქვს და არც მისი მდგომარეობაა იმდენად უიმედო, რომ თავისი ოცნების ასრულებისთვის გაისარჯოს, მაგრამ როგორც ჩანს, „რედ ბულ რეისინგში“ როლები უკვე გადანაწილებულია და ამას სასწაული თუ შეცვლის. ყოველ შემთხვევაში, ავსტრიული გუნდის კონსულტანტი ჰელმუტ მარკო ამბობს, რომ ამ სეზონში, ავსტრალიელი პილოტის მთავარი ამოცანა, სებასტიან ფეტელის მეტოქეებისთვის ქულების ართმევა იქნება.

მართალია, მარკო ხაზს უსვამს იმას, რომ „რედ ბულში“ არ არსებობს პირველი და მეორე პილოტის როლები, მაგრამ ფაქტია - თანაგუნდელის სასარგებლოდ, მისი მეტოქეებისთვის ქულების ართმევა, მის მსახურობას, მეორე ნომრობას ნიშნავს.

„ჩვენ გუნდური მითითებები არ გვექნება, თუმცა ისიც ფაქტიამ რომ შარშანდელი სილვერსტოუნის შემდეგ, მარკი სებასტიანზე სამი მეათედი წამით ნელია. ეს კი მეტისმეტად ბევრია იმისათვის, რომ საკუტარი მონდომების ხარჯზე, ასეთი ჩამორჩენის აღმოფხვრა შეძლოს. მაგრამ თუ ის ისევე ირბოლებს როგორც თურქეთში, მაშინ მეტოქეებს ბევრ ქულას დააკარგვინებს“, - ამბობს მარკო და ამ სიტყვებით მიანიშნებს, რომ მილტონ კეინსში, მის აზრს ბევრი იზიარებს და ბევრს არც იმის სჯერა, რომ ამ სეზონში, უებერი ჩემპიონობისთვის ბრძოლას შეძლებს.

ჯერ ამაზე უებერს პასუხი არ გაუცია. როგორც წესი, ოზი პილოტი მსგავს განცხადებებს მკვახედ პასუხობს ხოლმე, მაგრამ ახლა ცოტა დაფიქრება მოუწევს - „რედ ბულთან“ კონტრაქტის გაგრძელებს თუ სურს, მარკოს ალიყურს ჩაყლაპავს. თუ არა, მაშინ სამსახურის სხვაგან მოძებნა მოუწევს, რადგან ამ სეზონის ბოლოს, მის კონტრაქტს ყავლი გაუვა.

თუმცა, მარკოსთვის პასუხის გაცემა მას ტრასაზე, რბოლების დროს შეუძლია, რაც შარშანაც არაერთხელ დაგვანახა. ოთხი ეტაპის შემდეგ, მას მესამე ადგილი უკავია და ლიდერ თანაგუნდელს 39 ქულით ჩამორჩება. ეს სხვაობა სეზონის მიწურულს მეტისმეტად ძნელი აღმოსაფხვრელი იქნებოდა, მაგრამ ახლა, როცა უკან მხოლოდ ოთხი რბოლაა, იმაზე ლაპარაკიც არ ღირს, რომ ფეტელს დიდი უპირატესობა აქვს.

რა თქმა უნდა, იმის გათვალისწინებით, რომ მსოფლიო ჩემპიონი შესანიშნავ ფორმაშია, მისი დაწევა ყველასთვის ძალიან ძნელი იქნება, თუმცა ვინ იცის. მითუმეტეს, უებერი თანდათან აუმჯობესებს ტავის შედეგებს - ჩინეთში მესამე იყოს, თურქეთში - მეორე. და თუ ასე გაგრძელდა, ბარსელონაში კვარცხლბეკის უმაღლეს საფეხურზე ასვლის ჯერია...