„ფერარიმ“ და ალონსომ კონტრაქტი ხუთი წლით გააგრძელეს
Alonso Signs Ferrari Extension Until 2016
19 მაისი
მსოფლიოს ორგზის ჩემპიონმა, ესპანელმა ფერნანდო ალონსომ „ფერარისთან“ კონტრაქტი 2016 წლის სეზონის ბოლომდე გააგრძელა. ალონსო იტალიურ გუნდში 2009 წლის სეზონის შემდეგ გადავიდა და მაშინ მათ შორის სამწლიანი კონტრაქტი გაფორმდა, რომელსაც ვადა მომავალი სეზონის დასრულების შემდეგ უნდა გასვლოდა.
თუმცა, „კვიცებს“ ამ კონტრაქტის სამი წლით გაგრძელების უფლება ჰქონდათ და მათ სწორედ ეს უფლება გამოიყენეს. უფრო მეტიც, გასულ სეზონში ალონსოს შესანიშნავი გამოსვლით აღფრთოვანებულებმა, მისი უფრო დიდი ხნით შენარჩუნება ისურვეს და ამაზე ალონსოს თანხმობასაც ადვილად მიაღწიეს.
„მრბოლტან, რომელიც გამარჯვების სულისკვეთებას, ურთულეს პირობებშიც კი ავლენს, კონტრაქტის განახლება ჩვენთვის დიდი სიამოვნების მომტანი იყო. ფერნანდოს ყველა ის თვისება აქვს, რაც ჩემპიონს სჭირდება. ტექნიკურადაც და პიროვნულადაც, ის გუნდის ნამდვილი ლიდერი გახდა. ვიმედოვნებ, მალე ის კვლავ დაიწყებს გამარჯვებას“, - ამბობს ალონსოს გუნდში დიდი ხნით დატოვების მთავარი ინიციატორი, „ფერარის“ პრეზიდენტი ლუკა დი მონტეძემოლო.
მიუხედავად იმისა, რომ „ფერარიში“ გადასვლიდან პირველ სეზონში, მისგან ჩემპიონობას არ ელოდნენ, ალონსომ „სკუდერია“ საჩემპიონო ბრძოლაში ჩააბა (თუნდაც მხოლოდ პილოტთა შორის). ბოლო რბოლაზე ის ჩემპიონატის ლიდერის რანგში გავიდა და მესამე ტიტულის მოპოვების რეალური შანსი ჰქონდა, თუმცა გუნდის მიერ დაშვებულმა ტაქტიკურმა შეცდომამ მისი გამოყენების საშუალება არ მისცა და საბოლოოდ, ის ვიცე ჩემპიონის წოდებას დასჯერდა.
No comments:
Post a Comment