ჰამილტონმა ხელთ ჩემპიონატის ლიდერობა იგდო

Hamilton back on top after Canada win

13 ივნისი

ჰამილტონი გამარჯვებას ზეიმობს

..........................................

თავისუფლად შეიძლება ითქვას, რომ დღეისათვის ფორმულა 1-ში საუკეთესო მანქანა ”რედ ბულ რეისინგს” ჰყავს, მაგრამ უკვე რამდენიმე რბოლაა, მის პილოტებს ”მაკლარენელებთან” გამკლავება უჭირთ. ეგ კი არა, კანადის დიდი პრიზი სწორედ ”მაკლარენის” პილოტების გამარჯვების დუბლით დასრულდა და მრბოლების კლასიფიკაციაშიც ლიდერი შეიცვალა. კანადაში მოპოვებული ბრწყინვალე გამარჯვებით, ”მაკლარენმა” კონსტრუქტორთა თასზე ლიდერობა განიმტკიცა, პილოტების კლასიფიკაციაში კი ლუის ჰამილტონი დაწინაურდა.

ჰამილტონმა ზედიზედ მეორე რბოლა მოიგო, ”მაკლარენმა” კი ზედიზედ მეორე დუბლი შეასრულა

..........................................

მართალია, ჰამილტონმა სტარტი პოულიდან აიღო, მაგრამ მას რომ ”რედ ბულის” პილოტების - მარკ უებერის და სებასტიან ფეტელის შეტევების მოგერიება გაუჭირდებოდა, ეს ეჭვს არ იწვევდა, მაგრამ მათგან ერთს საქმე სტარტამდე გაურთულდა. როგორც აღმოჩნდა, უებერის მანქანაზე გადაცემათა კოლოფი გახდა შესაცვლელი და რამდენადაც ეს რიგგარეშე შეცვლა იყო, უებერი ხუთი ადგილით ჩამოაქვეითეს.

სტარტზე კი ჰამილტონი საკმაოდ იოლად გაუმკლავდა ფეტელის აგრესიას და რბოლა ლიდერის რანგში დაიწყო. სხვათა შორის, რბოლის დაწყებამდე ”ბრიჯსტოუნის” წარმომადგენლებმა განაცხადეს, რომ რბოლის მსვლელობისას, გუნდების უმეტესობა, მინიმუმ ორჯერ შევიდოდა ბოქსებში საბურავის შესაცვლელად. ეს კი იმას ნიშნავდა, რომ რბოლაში ტაქტიკური ბრძოლა იყო მოსალოდნელი.

ჰამილტონმა ალონსოს მე-15 წრეზე გაასწრო

..........................................

ჰამილტონმა და მისმა თანაგუნდელმა ჯენსონ ბატონმა რბოლა რბილი საბურავებით დაიწყეს, რაც იმის ეჭვს ბადებდა, რომ ორივეს ადრეული პიტ სტოპი ჰქონდა დაგეგმილი. მართალია, ფეტელმა რბოლა მედიუმ (საშუალო სიმაგრის) საბურავებით დაიწყო, მაგრამ თავიდანვე მიიტანა ჰამილტონზე იერიში და რამდენჯერმე ლამის მიაღწია კიდეც საწადელს, თუმცა შემდეგ მათ შორის ბრძოლა შეწყდა, რადგან ბრიტანელმა ბოქსებს მე-8 წრეზე მიაშურა (ბატონის შემდეგ). 5-6 წრის შემდეგ, ბოქსებს ჯერ უებერმა, შემდეგ კი ფეტელმაც მიაშურეს. თანაც, გერმანელს რბილი (სუპერ სოფტ) საბურავი დაუყენეს, რაც იმას ნიშნავდა, რომ მას ბოქსში მალე ისევ ვიხილავდით.

სხვათა შორის, ჰამილტონი და ფერნანდო ალონსო ბოქსში ერთდროულად შევიდნენ. წინ ჰამილტონი იყო, მაგრამ იქიდან უფრო ადრე ალონსო გამოვიდა. მაგრამ მალე ჰამილტონმა თავისი ყოფილი თანაგუნდელი უკან მოიტოვა. ეს მაშინ მოხდა, როდესაც ”რედ ბულის” პილოტებს პიტ სტოპი მოვლილი ჰქონდათ და ბრიტანელი ლიდერი გახდა. ალონსოს უკან ბატონი მიჰყვებოდა, შემდეგ კი ფეტელი, უებერი, რობერტ კუბიცა...

სტარტზე ჰამილტონმა მოწინავეობა იოლად შეინარჩუნა

..........................................

პიტ სტოპების მეორე სერიამდე რბოლა მიწყნარდა. თუ არ ჩავთვლით უკანა რიგებში ძალიან დაძაბულ ბრძოლებს, ტრასაზე საინტერესო ბევრი არაფერი მომხდარა. ისე მოხდა, რომ რეზინის მეორე კომპლექტის დასაყენებლად, ბოქსში ყველაზე გვიან უებერი შევიდა, თუმცა ამის მიუხედავადაც, მან შესვლის წინ ლიდერობა მაინც დაკარგა, რადგან საბურავები საშინლად გაეცვითა.

50-ე წრეზე მას ჰამილტონმა გაასწრო და იქვე კუდზე ალონსოც დააჯდა, მაგრამ ავსტრალიელმა ბოქსებისკენ გადახვევა მოასწრო. ტრასაზე დაბრუნებული კი მეხუთეზე, ფეტელის უკან აღმოჩნდა. 56-ე წრეზე, ალონსოს ბატონმა იმ დროს გაუარა, როცა ესპანელი ინდოელ კარუნ ჩანდჰოკს ასწრებდა და ამიტომ, ტემპი დაკარგა. აქედან მოყოლებული, ლიდერთა განლაგებაში აღარაფერი შეცვლილა.

”ძალიან დიდი მადლობა ამ შესანიშნავი უიკენდისთვის. ჩვენს მხრებზე ბევრმა პრობლემამ გადაიარა, მაგრამ ამას გავუძელით და ეს თქვენი დამსახურებაა”, - ჰამილტონმა რადიოთი მადლობა ამ სიტყვებით გადაუხადა თავის გუნდს.

ამგვარად, მას 109 ქულა დაუგროვდა და ჩემპიონატის ლიდერიც გახდა. მეორეზე ბატონმა გადაინაცვლა, ვისაც 106 ქულა აქვს, ძველი ლიდერი უებერი კი 103 ქულით, მესამემდე ჩამოქვეითდა. 94 ქულით, მეოთხეზე ალონსოა, მეხუთეზე მყოფ ფეტელს კი 90 ქულა აქვს.

”ეს ამ სეზონში ერთ-ერთი ურთულესი რბოლა იყო და მით უფრო სასიხარულოა, რომ კვლავ დუბლი შევძელით. ჯენსონმაც შესანიშნავად იმუშავა და საერთოდ, მთელი გუნდი მოწოდების სიმაღლეზე ვიყავით. ვამაყობ, რომ ამ გუნდის წევრი ვარ. ეს ჩემთვის განსაკუთრებული გამარჯვებაა, რადგან ჩემს კარიერაში პირველი გამარჯვება სწორედ აქ მაქვს მოპოვებული”, - განაცხადა ჰამილტონმა, ვინც ამ ჩემპიონატის მეხუთე ლიდერია (ალონსოს, ფეტელის, ბატონის და უებერის შემდეგ).

როგორც იქნა, კვარცხლბეკზე კვლავ შეაბიჯა ალონსომ, ვინც ჯერ კიდევ კვალიფიკაციის შემდეგ იმედოვნებდა, რომ ამას შესძლებდა. ის თავისი რბოლითაც კმაყოფილი დარჩა და რაც მთავარია, აღნიშნა, რომ ყოველივე მისი გუნდის აშკარა წინსვლის შედეგია. მისგან განსხვავებით, თავი ვერაფრით ისახელა ”ფერარის” მეორე პილოტმა, ბრაზილიელმა ფელიპე მასამ, რომელმაც უკანა რიგებში ლომივით კი იბრძოლა, მაგრამ ამ ბრძოლაში მანქანა დაუზიანდა (მიხაელ შუმახერთან შეჯახებისას) და საბოლოოდ, მე-15 ადგილს დასჯერდა.

კარგად იასპარეზა უებერმაც და რბოლის დიდი ნაწილი ლიდერის რანგში გაატარა, მაგრამ შემდეგ საბურავები დაუზიანდა, რის გამოც, სანამ მათ შეცვლიდა, რამდენიმე მეტოქემ გაასწრო და სწორედ მაშინ დაკარგა გამარჯვების შანსი. საბოლოოდ კი რბოლა მეხუთეზე, ფეტელის უკან დაასრულა.

კანადის დიდი პრიზი

რბოლის შედეგები

ტრასის სიგრძე - 4.361 კმ, 70 წრე, რბოლის დისტანცია 305.270 კმ

1. ლუის ჰამილტონი (ბრიტანეთი, მაკლარენი) 1:33:53.456

2. ჯენსონ ბატონი (ბრიტანეთი, მაკლარენი) +00:02.254

3. ფერნანდო ალონსო (ესპანეთი, ფერარი) 00:09.214

4. სებასტიან ფეტელი (გერმანია, რედ ბული) 00:37.817

5. მარკ უებერი (ავსტრალია, რედ ბული) 00:39.291

6. ნიკო როსბერგი (გერმანია, მერსედესი) 00:56.084

7. როებრტ კუბიცა (პოლონეთი, რენო) 00:57.300

8. სებასტიან ბუემი (შვეიცარია, ტორო როსო) 1 წრე

9. ვიტანტონიო ლიუცი (იტალია, ფორს ინდია) 1 წრე

10. ადრიან სუტილი (გერმანია, ფორს ინდია) 1 წრე

11. მიხაელ შუმახერი (გერმანია, მერსედესი) 1 წრე

12. ხაიმე ალგერსუარი (ესპანეთი, ტორო როსო) 1 წრე

13. ნიკო ჰულკენბერგი (გერმანია, უილიამსი) 1 წრე

14. რუბენს ბარიკელო (ბრაზილია, უილიამსი) 1 წრე

15. ფელიპე მასა (ბრაზილია, ფერარი) 1 წრე

16. ჰეიკი კოვალაინენი (ფინეთი, ლოტუსი) 2 წრე

17. ვიტალი პეტროვი (რუსეთი, რენო) 2 წრე

18. კარუნ ჩანდჰოკი (ინდოეთი, ისპანია) 4 წრე

19. ლუკას დი გრასი (ბრაზილია, ვირჯინი) 5 წრე

გ. ტიმო გლოკი (გერმანია, ვირჯინი) 20 წრე

გ. იარნო ტრული (იტალია, ლოტუსი) 28 წრე

გ. პედრო დე ლა როსა (ესპანეთი, ზაუბერი) 40 წრე

გ. ბრუნო სენა (ბრაზილია, ისპანია) 57 წრე

გ. კამუი კობაიაში (იაპონია, ზაუბერი) 69 წრე

შენიშვნა: გ - გამოეთიშა

უსწრაფესი წრე: როებრტ კუბიცა - 1:16.972, 67-ე წრე

პილოტთა კლასიფიკაცია

1. ლუის ჰამილტონი - 109 ქულა; 2. ჯენსონ ბატონი - 106; 3. მარკ უებერი - 103; 4. ფერნანდო ალონსო - 94; 5. სებასტიან ფეტელი - 90; 6. ნიკო როსბერგი - 74; 7. რობერტ კუბიცა - 73; 8. ფელიპე მასა - 67; 9. მიხაელ შუმახერი - 34; 10. ადრიან სუტილი - 23; 11. ვიტანტონიო ლიუცი - 12; 12. რუბენს ბარიკელო - 7; 13. ვიტალი პეტროვი - 6; 14. სებასტიან ბუემი - 5; 15. ხაიმე ალგერსუარი - 3; 16-17. კამუი კობაიაში - 1; 16-17. ნიკო ჰულკენბერგი - 1

კონსტრუქტორთა პირველობა

1. მაკლარენ-მერსედესი - 215 ქულა; 2. რედ ბულ-რენო - 193; 3. ფერარი - 161; 4. მერსედესი - 108; 5. რენო - 79. 6. ფორს ინდია-მერსედესი - 35; 7-8. ტორო როსო-ფერარი - 8; 7-8. უილიამს-კოსუორტი - 8; 9. ზაუბერ-ფერარი - 1

ჰამილტონმა კვალიფიკაციებზე ”რედ ბულის” ჰეგემონია დაამხო

Hamilton ends Red Bull's run of poles

12 ივნისი

ფინიშიდან ცოტა ხანში ჰამილტონს საწვავი გამოელია და ბოქსებს მან პეისკარით მიაღწია

..........................................

მაშ ასე, მიმდინარე ჩემპიონატში ახალი ფურცელი გადაიშალა - ”რედ ბულის” პილოტებს მორიგი პოულის მოპოვების საშუალება არ მისცეს. უფრო სწორედ, ლუის ჰამილტონმა არ მისცა. სწორედ ჰამილტონია ის პილოტი, რომელსაც ავსტრიული კომპანიის საჯინიბო ყველაზე მეტად უფრთხის და როგორც ჩანს, თურქეთში გამარჯვების შემდეგ, ბრიტანელი თანდათან მადაზე მოდის.

ძნელი სათქმელია, რბოლაშიც შეძლებს თუ არა მარკ უებერისა და სებასტიან ფეტელის ჯობნას, მაგრამ ფაქტი ერთია - მიმდინარე სეზონში კანადის დიდი პრიზი იქნება პირველი რბოლა, რომლის პირველ სასტარტო პოზიციაზეც ”რედ ბულის” პილოტი არ იდგება. ამისათვის კი, ”მაკლარენიც” და ჰამილტონიც მაქსიმალურად გაისარჯნენ.

ჰამილტონმა თავისი ”მაკლარენიდან” მაქსიმუმი გამოწურა

..........................................

უნდა აღინიშნოს, რომ ჰამილტონმა კვალიფიკაციის ბოლო წრეები რბილი საბურავებით განვლო, როცა ”რედ ბულის” ორივე პილოტმა მაგარი საბურავი არჩია. როგორც ჩანს, ავსტრიული გუნდი კანადაშიც ერთი პიტ სტოპით აპირებს ასპარეზობას, ”მაკლარენის” პილოტები (ან მარტო ჰამილტონი) კი შეიძლება ბოქსში ორჯერ ვიხილოთ. დაკიდევ, კვალიფიკაცია რომ დასრულდა, ჰამილტონს მაშინვე საწვავი გამოელია. ჯერ კიდევ ინერციით მოძრავი მანქანიდან ამოძვრა, ცოტა ხანს თავად მიაწვა მას, შემდეგ კი ტრასის პერსონალს დაუტოვა, თავად კი მომსახურე მანქანით საკონფერენციო დარბაზისკენ გასწია.

უებერმა და ფეტელმა შესაბამისად, მეორე და მესამე საუკეთესო შედეგები აჩვენეს, მათ კი მცირედით ჩამორჩა ესპანელი ფერნანდო ალონსო, მას კი მსოფლიოს მოქმედი ჩემპიონი ჯენსონ ბატონი მოჰყვა. ხელი მოეცარა მიხაელ შუმახერს, რომელმაც მესამე სესიაში მონაწილეობის უფლებაც კი ვერ მოიპოვა. სამაგიეროდ, შესანიშნავად იასპარეზეს ”ფორს ინდიას” პილოტებმა - იტალიელ ვიტანტონიო ლიუცის მეექვსე შედეგი ჰქონდა, გერმანელი ადრიან სუტილი კი მეცხრეს დასჯერდა.

სხვათა შორის, 25 წლის ჰამილტონისთვის მონრეალის ტრასა იღბლიანია - თავის კარიერაში პირველი გამარჯვება მან 2007 წელს სწორედ მასზე მოიპოვა. ამასთან, კანადის დიდი პრიზის კვალიფიკაციაში ზედიზედ მესამედ გაიმარჯვა.

P.S. რბოლის შემდეგ, სტიუარდებმა განიხილეს ჰამილტონის შემთხვევა და გადაწყვიტეს, რომ ის 10 000 დოლარით დაჯარიმდეს. საქმე ისაა, რომ რბოლის შემდგომი პროცედურა, გამარჯვებული მანქანის ავზიდან საწვავის შემოწმებას ითვალისწინებს. მაგრამ რამდენადაც ჰამილტონის მანქანის ავზში საწვავი ილეოდა, მას ბოქსებიდან რადიოთი სთხოვეს, რომ გაჩერებულიყო, რათა ავზში სინჯისთვის საჭირო რაოდენობის საწვავი დარჩენილიყო.

კვალიფიკაციის შემდეგ მანქანის სხვადასხვა მიზეზით გაჩერება არ იკრძალება. სამაგიეროდ, ბოქსებში დასაბრუნებლად, პილოტებს დრო შეზღუდული აქვთ. სწორედ ამის გამო, სტიუარდებმა, რომელთა შორისაც იყო მსოფლიოს ორგზის ჩემპიონი, ბრაზილიელი ემერსონ ფიტიპალდი, ჰამილტონი გააფრთხილეს და 10 000 დოლარით დააჯარიმეს. არადა, ბრიტანელის მანქანის ავზში საწვავი რომ არ დარჩენილიყო, მას საუკეთესო შედეგს გაუუქმებდნენ და აქედან გამომდინარე, პოულიც დაიკარგებოდა. ამ შემთხვევაში, ჰამილტონი კვალიფიკაციას მეოთხე ადგილზე დაასრულებდა.

კანადის დიდი პრიზი

კვალიფიკაციის შედეგები

1. ლუის ჰამილტონი (ბრიტანეთი, მაკლარენი) 1:15.105

2. მარკ უებერი (ავსტრალია, რედ ბული) 1:15.373

3. სებასტიან ფეტელი (გერმანია, რედ ბული) 1:15.420

4. ფერნანდო ალონსო (ესპანეთი, ფერარი) 1:15.435

5. ჯენსონ ბატონი (ბრიტანეთი, მაკლარენი) 1:15.520

6. ვიტანტონიო ლიუცი (იტალია, ფორს ინდია) 1:15.648

7. ფელიპე მასა (ბრაზილია, ფერარი) 1:15.688

8. როებრტ კუბიცა (პოლონეთი, რენო) 1:15.715

9. ადრიან სუტილი (გერმანია, ფორს ინდია) 1:15.881

10. ნიკო როსბერგი (გერმანია, მერსედესი) 1:16.071

- - - - - - - - -

11. რუბენს ბარიკელო (ბრაზილია, უილიამსი) 1:16.434

12. ნიკო ჰულკენბერგი (გერმანია, უილიამსი) 1:16.438

13. მიხაელ შუმახერი (გერმანია, მერსედესი) 1:16.492

14. ვიტალი პეტროვი (რუსეთი, რენო) 1:16.844

15. სებასტიან ბუემი (შვეიცარია, ტორო როსო) 1:16.928

16. ხაიმე ალგერსუარი (ესპანეთი, ტორო როსო) 1:17.029

17. პედრო დე ლა როსა (ესპანეთი, ზაუბერი) 1:17.384

- - - - - - - - - -

18. კამუი კობაიაში (იაპონია, ზაუბერი) 1:18.019

19. ჰეიკი კოვალაინენი (ფინეთი, ლოტუსი) 1:18.237

20. იარნო ტრული (იტალია, ლოტუსი) 1:18.698

21. ტიმო გლოკი (გერმანია, ვირჯინი) 1:18.941

22. ბრუნო სენა (ბრაზილია, ისპანია) 1:19.484

23. ლუკას დი გრასი (ბრაზილია, ვირჯინი) 1:19.675

24. კარუნ ჩანდჰოკი (ინდოეთი, ისპანია) 1:27.757

მონრეალში ვარჯიშებზე ფეტელი უსწრაფესია

Vettel fastest in practice for Canadian GP

12 ივნისი

მონრეალური სარბოლი უქმეები ”რედ ბულის” და მისი გერმანელი პილოტის, სებასტიან ფეტელის დომინაციით დაიწყო. კანადის დიდი პრიზის თავისუფალ პრაქტიკებზე მან საუკეთესო შედეგი აჩვენა, თუმცაღა პირველი სესიის შემდეგ, ყვეკაზე სწრაფი, მსოფლიოს მოქმედი ჩემპიონი, ბრიტანელი ჯენსონ ბატონი იყო.

თუმცა, რამდენადაც მეორე სესიაზე თითქმის წამნახევრით უკეთესი დროები დაფიქსირდა, ვიდრე პირველზე, მიმოხილვაში ძირითადად სწორედ მის შედეგებს შევეხებით.

ფეტელს მცირედით ჩამორჩა ”ფერარის” ესპანელი ფერნანდო ალონსო, რომელიც ბაჰრეინში გამარჯვების შემდეგ, თავის გამოჩენას ვერაფრით ახერხებს. გერმანელს ის 0.086 წამით ჩამორჩა. მხოლოდ მეოთხე შედეგს დასჯერდა ფეტელის ავსტრალიელი თანაგუნდელი მარკ უებერი, ვინც პირველ სესიაზე მხოლოდ მე-14 იყო, თუმცა საბოლოოდ მაინც კმაყოფილი დარჩა.

”დღეს ყველას უცურდებოდა მანქანა. ეს უფრო რალი ქროსს ჰგავდა, ვიდრე ფორმულა 1-ს. მაგრამ ეს სულაც არ მადარდებს, რადგან პრაქტიკების დროს, ასფალტი რეზინით დამუშავდება და რბოლისთვის კარგ მდგომარეობაში დაგვხვდება. ასეთი ტრასების მთავარი საიდუმლო ისაა, რომ მასზე პანიკას არ უნდა დანებდე”, - განაცხადა ფეტელმა.

სხვათა შორის, სწორედ პანიკის ნიშნები ეტყობოდა ”რედ ბულის” მთავარ მეტოქე ”მაკლარენის” ბანაკს - ლუის ჰამილტონი მხოლოდ მეშვიდე შედეგს დასჯერდა, ბატონი კი მეორე სესიაზე მე-11 ადგილამდე ჩამოქვეითდა. ჰამილტონი იმაზე ჩიოდა, რომ ძალიან გაუჭირდა საბურავების გახურება, თანაც შენიშნა, ტრასა ძალიან განსხვავდება იმისგან, რომელზეც აქ ბოლოს ვიარეთო. საბურავების პრობლემას ძირითადად ბატონიც მიიჩნევდა.

ასეა თუ ისე, მონრეალის ტრასა ყველაზე უკეთ სწორედ ”მაკლარენის” მანქანას მიესადაგება, რადგან გრძელი სწორი მონაკვეთები აქვს, სადაც აეროდინამიკური ჰაერსადინარი დიდ უპირატესობას იძლევა.

კანადის დიდი პრიზი

თავისუფალი პრაქტიკები

პირველი სესია

1. ჯენსონ ბატონი (ბრიტანეთი, მაკლარენი) 1:18.127

2. მიხაელ შუმახერი (გერმანია, მერსედესი) 1:18.285

3. ლუის ჰამილტონი (ბრიტანეთი, მაკლარენი) 1:18.352

4. ნიკო როსბერგი (გერმანია, მერსედესი) 1:18.356

5. სებასტიან ფეტელი (გერმანია, რედ ბული) 1:18.549

6. როებრტ კუბიცა (პოლონეთი, რენო) 1:18.662

7. ფერნანდო ალონსო (ესპანეთი, ფერარი) 1:18.726

8. ვიტანტონიო ლიუცი (იტალია, ფორს ინდია) 1:19.097

9. ნიკო ჰულკენბერგი (გერმანია, უილიამსი) 1:19.282

10. რუბენს ბარიკელო (ბრაზილია, უილიამსი) 1:19.313

11. ადრიან სუტილი (გერმანია, ფორს ინდია) 1:19.373

12. ფელიპე მასა (ბრაზილია, ფერარი) 1:19.511

13. ვიტალი პეტროვი (რუსეთი, რენო) 1:19.549

14. მარკ უებერი (ავსტრალია, რედ ბული) 1:19.609

15. კამუი კობაიაში (იაპონია, ზაუბერი) 1:20.186

16. სებასტიან ბუემი (შვეიცარია, ტორო როსო) 1:20.320

17. პედრო დე ლა როსა (ესპანეთი, ზაუბერი) 1:20.584

18. ხაიმე ალგერსუარი (ესპანეთი, ტორო როსო) 1:20.823

19. ჰეიკი კოვალაინენი (ფინეთი, ლოტუსი) 1:21.869

20. კარუნ ჩანდჰოკი (ინდოეთი, ისპანია) 1:21.977

21. იარნო ტრული (იტალია, ლოტუსი) 1:22.543

22. ბრუნო სენა (ბრაზილია, ისპანია) 1:22.701

23. ტიმო გლოკი (გერმანია, ვირჯინი) 1:22.713

24. ლუკას დი გრასი (ბრაზილია, ვირჯინი) დროის გარეშე

მეორე სესია

1. სებასტიან ფეტელი (გერმანია, რედ ბული) 1:16.877

2. ფერნანდო ალონსო (ესპანეთი, ფერარი) 1:16.963

3. ნიკო როსბერგი (გერმანია, მერსედესი) 1:17.151

4. მარკ უებერი (ავსტრალია, რედ ბული) 1:17.273

5. ფელიპე მასა (ბრაზილია, ფერარი) 1:17.401

6. ადრიან სუტილი (გერმანია, ფორს ინდია) 1:17.415

7. ლუის ჰამილტონი (ბრიტანეთი, მაკლარენი) 1:17.522

8. როებრტ კუბიცა (პოლონეთი, რენო) 1:17.529

9. მიხაელ შუმახერი (გერმანია, მერსედესი) 1:17.688

10. ვიტანტონიო ლიუცი (იტალია, ფორს ინდია) 1:17.903

11. ჯენსონ ბატონი (ბრიტანეთი, მაკლარენი) 1:17.961

12. რუბენს ბარიკელო (ბრაზილია, უილიამსი) 1:18.385

13. ნიკო ჰულკენბერგი (გერმანია, უილიამსი) 1:18.447

14. ვიტალი პეტროვი (რუსეთი, რენო) 1:18.582

15. პედრო დე ლა როსა (ესპანეთი, ზაუბერი) 1:18.658

16. კამუი კობაიაში (იაპონია, ზაუბერი) 1:19.142

17. სებასტიან ბუემი (შვეიცარია, ტორო როსო) 1:19.168

18. ხაიმე ალგერსუარი (ესპანეთი, ტორო როსო) 1:19.274

19. ჰეიკი კოვალაინენი (ფინეთი, ლოტუსი) 1:19.969

20. კარუნ ჩანდჰოკი (ინდოეთი, ისპანია) 1:20.879

21. ბრუნო სენა (ბრაზილია, ისპანია) 1:21.097

22. იარნო ტრული (იტალია, ლოტუსი) 1:21.346

23. ტიმო გლოკი (გერმანია, ვირჯინი) 1:21.488

24. ლუკას დი გრასი (ბრაზილია, ვირჯინი) 1:21.577

მონრეალის ტრასის ერთი წრე მარკ უებერთან ერთად

Canadian Grand Prix with Mark Webber

10 ივნისი

თურქეთის დიდი პრიზიდან უკვე ათი დღე გავიდა და ფორმულა 1-ის მსოფლიო ჩემპიონატის კანადური ეტაპის დროც მოვიდა. დიდი პრიზების ქარავანს ამჯერად ჟილ ვილნევის სახელობის ავტოდრომი უმასპინძლებს, რომელზეც მეგზურობას, ტრადიციულად, ”რედ ბულ რეისინგის” ავსტრალიელი პილოტი მარკ უებერი (სურათზე) გაგვიწევს.

”კანადის დიდი პრიზი, ქალაქში არსებული შესანიშნავი ატმოსფეროთი და რესტორნებით, ასევე პილოტირებისთვის ძალიან ძნელი ტრასით გამოირჩევა. ტრასის სიგრძე 4.4 კილომეტრია, გასავლელი გვაქვს 70 წრე - სულ 305 კილომეტრი. ტრასას ოთხი ჩქაროსნული მონაკვეთი, ორი ნელი მოსახვევი და გასწრებისთვის სამი იდეალური ადგილი აქვს. მაქსიმალური სიჩქარე კი 323 კმ/სთ-ს აღწევს.

პირველი მოსახვევის წინ ძალიან მკვეთრი დამუხრუჭება გვიწევს. მანქანა თითქმის ჩერდება. მას მეორე მოსახვევი მოსდევს, სადაც ჩატევა კიდევ უფრო ძნელია. თუმცა, მასში სიჩქარე თანდათან მატულობს. აქ, აჩქარებით მოძრაობისას, ძალიან დიდი მნიშვნელობა აქვს საბურავების გზასთან ჩაჭიდების ხარისხს. ამ ადგილიდან რბოლას ყოველთვის ძალიან ბევრი მაყურებელი ადევნებს თვალს, მარცხენა მხარეს კი მდინარის დანახვაც შეიძლება.

პირველი ”ესის” წინ ვამუხრუჭებთ და ბორდიურების გამოყენებით, დიდი სიჩქარის შენარჩუნებას ვცდილობთ. ოღონდ, გასათვალისწინებელია, რომ თუ ბორდიურის მარჯვენა მხარეს ღრმად შევალთ, კედელთან შეხება გარდაუვალი იქნება. შემდეგ გასავლელია სწრაფი ტეხილი, რომელიც ყველა პილოტს ძალიან მოსწონს. ამას მოსდევს მკვეთრი მოსახვევი, რომლის წინაც, კვლავ მკვეთრად დამუხრუჭებაა საჭირო. აქაც რბოლას უამრავი მაყურებელი ადევნებს თვალყურს.

შემდეგ ისევ აჩქარება და გზის სიახლოვეს ისევ კედელია. ეს ძალიან მიმზიდველი ადგილია. ისევ შეიძლება მდინარის დანახვა. მაგრამ ყველაზე მთავარი ისაა, რომ მალე ისევ მუხრუჭების ამოქმედება გვიწევს, რათა მორიგი ”ესი” გავიაროთ. აქაც ბორდიურებს ვიყენებთ, გამოსასვლელში კი მაქსიმალურად ვუახლოვდებით კედელს. მერე კი ტრასის ყველაზე საინტერესო მონაკვეთი გველის, სადაც მაყურებელი მოუთმენლად ელის გასწრებებს.

და ისევ მკვეთრი დამუხრუჭება. გადავდივართ მეორე, ან შეიძლება პირველ საფეხურზეც კი - ეს კოლოფში გადაცემების ფარდობაზეა დამოკიდებული. აქედან უკანა სწორზე გავდივართ, რომლის ბოლოსაც ბოქსებში შესასვლელია. ამ სწორზე სიჩქარე 300 კმ/სთ-ზე მეტია, მის ბოლოს კი გასწრებისთვის კიდევ ერთი კარგი ადგილი გველის.

მესამე ”ესის” წინ ისევ მუხრუჭებს ვიყენებთ. მოსახვევების ეს მონაკვეთი ძალიან ვიწროა და აქ შეცდომის დაშვება ძალიან ადვილია. თუ შეცდით, ბეტონის კედელი არსად გაგიშვებთ. და თუ გაივლით, მაშინ სტარტ/ფინიშის სწორზე გახვალთ და შემდეგ წრეზე წასვლასაც შეძლებთ. მოკლედ, ძალიან ძნელი ტრასაა, თუმცა მისი კარგად გავლა დიდ სიამოვნებას მოგანიჭებთ”.

”მერსედესს” ძრავების სამი კლიენტი ჰყოფნის

Mercedes warned over engine supply

9 ივნისი

”მერსედეს GP-ს” შეფი როს ბრაუნი (სურათზე) გერმანულ კომპანიას ურჩევს, ”ბევრი და კარგად იფიქროს”, სანამ თავისი ძრავების მეოთხე გუნდისთვი მიწოდებას გადაწყვეტს. დღეისათვის, გერმანული კომპანია თავის ძრავებს, საკუთარი გუნდის გარდა, ”მაკლარენს” და ”ფორს ინდიასაც” აწვდის. თუმცა, სამქიმიანი ვარსკვლავით დამშვენებული ძრავების მიღება კიდევ რამდენიმე გუნდს, მათ შორის, ’რედ ბულ რეისინგსაც” სურთ.

ენერგეტიკული სასმელების მწარმოებელი ავსტრიული კომპანიის მფლობელი დიტრიხ მატეშიცი ძლიერ მოწადინებულია, რათა თავისი გუნდი, შტუტგარტული ავტო გიგანტის ძრავებით უზრუნველყოს. ასე ”რედ ბული” პრაქტიკულად დაუმარცხებელი გახდება. და, სწორედ ეს აფრთხობს როს ბრაუნს, ვინც დღესაც კი იმედოვნებს, რომ ”მერსედეს GP-ს” სეზონის განმავლობაში ”რედ ბულის” დაწევა ხელეწიფება.

თავის სურვილს კი ის სულ სხვა არგუმენტით ამაგრებს. კერძოდ, ის თვლის, რომ ”მერსედესს” ფორმულა 1-ის ძრავების წარმოების გასაფართოებლად, რესურსები არ ეყოფა. და თუ მეტი კლიენტი ეყოლება, ამით მისი ახლანდელი პარტნიორებიც იზარალებენ.

”ჩემი აზრით, ჩვენ, როგორც კონსტრუქტორებს, ბევრი ფიქრი გვმართებს მანამ, სანამ ჩვენი ძრავების კლიენტების რაოდენობას გავზრდით. მიმაჩნია, რომ ამჟამად შესაძლებლის ზღვარზე ვმუშაობთ. სარბოლი ძრავების წარმოება დიდი ავტომწარმოებლების საქმე არაა და უნდა ვიზრუნოთ იმაზე, რომ ისეთ კომპანიებს, როგორიც ”კოსუორტია”, სამოქმედო არეალი ჰქონდეთ.

”ამა თუ იმ ძრავის სიმძლავრეზე მსჯელობა არ შემიძლია, რადგან აგრეგატების ტექნიკური მახასიათებლების დადგენის ზუსტი პროცედურები არ გვაქვს. კარგი იქნება, თუ FIA შეძლებს ჩვენი ძრავების სტენდზე შემოწმებას და ერთმანეთთან შედარებას. ასე ამ საკითხზე უფრო ნათელი წარმოდგენა გვექნება. თუმცა, გარკვეული თვალსაზრისით, სიმძლავრე მხოლოდ ცალკეული პრობლემაა. ძრავს სხვა ისეთი თვისებებიც გააჩნია, როგორიცაა მიმღებიანობა (მაქსიმალური სიმძლავრის სწრაფად განვითარების უნარი), გაგრილების ეფექტურობა, ეკონომიურობა. სხვათა შორის, არცთუ დიდი ხნის წინ, ”რენოს” შეფი აცხადებდა, რომ მართალია, მათი ძრავი ყველაზე ძლიერი არაა, მაგრამ სამაგიეროდ, სხვა პარამეტრებით საუკეთესოა”, - ამბობს ბრაუნი.

”ფერარიმ” მასას კონტრაქტი გაუგრძელა

Massa extends Ferrari contract until '12

9 ივნისი

მას შემდეგ, რაც ”რედ ბულ რეისინგმა” ავსტრალიელ მარკ უებერს კონტრაქტი გაუგრძელა, მოსალოდნელი იყო, რომ ეს ფორმულა 1-ის პილოტების ბაზარზე დომინოს პრინციპს აამოქმედებდა და ტოპ გუნდების პოტენციურ ვაკანსიებს შეავსებდა. ასეც მოხდა და პირველმა რეაგირება ”ფერარიმ” მოახდინა, რომელმაც თავის ბრაზილიელ პილოტ ფელიპე მასას კონტრაქტი 2012 წლის სეზონის ბოლომდე გაუგრძელა.

მასას და ”ფერარის” მიმდინარე კონტრაქტს ვადა ამ სეზონის შემდეგ გასდიოდა. ”ფერარის” ბრაზილიელის ადგილზე პოლონელი რობერტ კუბიცას, ან უებერის მიწვევა სურდა. კუბიცასთან მარანელოელებმა ოპციონის კონტრაქტიც კი გააფორმეს, რომლის ძალითაც, ბრიტანულ ეტაპამდე, ისინი კუბიცაზე ეგრეთ წოდებული პირველი მოთხოვნის უფლებას ფლობდნენ. ანუ, თუ მოინდომებდნენ, ამ უფლებას ბრიტანულ რბოლამდე გამოიყენებდნენ და მასთან სრულფასოვან კონტრაქტს გააფორმებდნენ.

მაგრამ როგორც ჩანს, მარანელოში უფრო უებერის გადაბირება სურდათ და როგორც კი ოზმა მრბოლმა თავისი მომავალი ისევ ”რედ ბულს” დაუკავშირა, ”ფერარიმაც” მასას დატოვება ამჯობინა. არაა გამორიცხული, რომ ეს მსოფლიოს ორგზის ჩემპიონის, ესპანელი ფერნანდო ალონსოს სურვილის გათვალისწინებითაც მოხდა - ალონსო აშკარად სჯობნის მასას და ძნელი მისახვედრი არ უნდა იყოს, რომ ამბიციურ ესპანელს, გუნდში უფრო ძლიერი თანაგუნდელის მოყვანა არც აწყობდა.

შეგახსენებთ, რომ მასა, ვინც ახლა 29 წლისაა, ”ფერარიში” 2001 წლიდან ტესტ პილოტი იყო, 2006 წელს კი რეგულარული პილოტი გახდა. მას აქეთ, მასამ 69 რბოლაში მიიღო მონაწილეობა, რომელთაგან 11 მოიგო, 15-ში კი პოულ პოზიციას დაეუფლა. გარდა ამისა, 30-ჯერ კვარცხლბეკზე ავიდა და 360 ქულა დააგროვა.

”ძალიან კმაყოფილი ვარ, რომ მომდევნო ორ სეზონსაც ”ფერარისთან” ერთად გავატარებ. მთელი ჩემი კარიერის განმავლობაში, ”ფერარის” ძრავებით აღჭურვილი ავტომობილებით ვასპარეზობ და ვამაყობ იმით, რომ კვლავაც იმ გუნდთან ერთად ვიქნები, რომელსაც ჩემს მეორე ოჯახად ვთვლი”, - განაცხადა მასამ.

”უკვე თითქმია ათი წელია, რაც ფელიპე ”ფერარის” წევრია. ჩვენთან ერთად, ის ჩამოყალიბდა, როგორც პილოტი და როგორც ადამიანი. ჩვენთან ერთად, მან ბევრი სიძნელე გაიარა და არაერთხელ, სიხარულიც მოგვანიჭა. ჩვენ ვთვლით, რომ ორივე თანაბარი შესაძლებლობის მქონე პილოტი გვყავს. ისინი ერთნაირად სწრაფები არიან და გუნდის სასარგებლოდ, ერთობლივად შეუძლიათ მუშაობა”, - ამბობს ”ფგერარის” შეფი სტეფანო დომენიკალი.

ამგრვარად, კიდევ ერთმა ტოპ გუნდმა შეავსო მოსალოდნელი ვაკანსია. დიდი ალბათობაა იმისა, რომ მომავალ სეზონშიც იმავე პილოტებით იასპარეზებენ ”მაკლარენი” და ”მერსედესი”. რჩება ”რენო”, რომელიც ძალიან კმაყოფილია კუბიცათი. თუმცა, არაა გამორიცხული, რომ ფრანგულმა საჯინიბომ რუსი პილოტის, ვიტალი პეტროვის შეცვლა მოისურვოს. ეს საკითხი კი უფრო აქტუალური მას შემდეგ გახდება, როდესაც ”რენო” სოლიდური სპონსორების მოზიდვას შეძლებს...

უებერი ”რედ ბულში” რჩება

Red Bull extends Webber's contract

7 ივნისი

”რედ ბულ რეისინგმა” გამოაცხადა, რომ კონტრაქტი ერთი წლით გაუგრძელა თავის ავსტრალიელ პილოტს, ფორმულა 1-ის მსოფლიო ჩემპიონატის მიმდინარე სეზონის ერთპიროვნულ ლიდერ მარკ უებერს. 33 წლის პილოტისთვის, ეს ბრწყინვალედ დაწყებული სეზონის ლოგიკური გაგრძელებაა - მიმდინარე ჩემპიონატის პირველი შვიდი ეტაპიდან, მან ორი მოიგო, ოთხჯერ კი პოულ პოზიციას დაეუფლა. კიდევ ერთი რეალური გამარჯვება კი იმის გამო დაკარგა, რომ თურქეთის ეტაპზე, მას თანაგუნდელი სებასტიან ფეტელი დაეჯახა.

ცნობილია, რომ ”რედ ბულ რეისინგი” და უებერი კონტრაქტის გაგრძელებაზე მოლაპარაკებას ჯერ კიდევ სეზონის დასაწყისში შეუდგნენ, ესპანეთის დიდი პრიზის შემდეგ კი ფაქტობრივ შეთანხმებას მიაღწიეს. სტამბულური ინციდენტის შემდეგ, ბევრმა იფიქრა, რომ ავსტრიული კომპანიის გუნდი ავსტრალიელის შენარჩუნებაზე უარს იტყოდა. მაგრამ ასე არ მოხდა.

”მოლაპარაკებას სეზონის დაწყებისთანავე შევუდექით. გადაწყვეტილების მიღება არ გაგვჭირვებია. ესპანეთში კი ყველაფერი თითქმის გადაწყვეტილი იყო. კონტრაქტის გაგრძელება ორივე მხარეს სურდა. ყველას კარგად ესმის, რომ ჩემი კარიერის ამ ეტაპზე, ფორმულა 1-ში მარტო იმისთვის დარჩენას არ ვაპირებ, რომ სტატისტის როლში ყოფნას დავჯერდე.

მთელ გუნდთან შესანიშნავი ურთიერთობა მაქვს, მილტონ კეინსის ბაზაზე კი თავს ისე ვგრძნობ, როგორც საკუთარ სახლში. ძალიან მსიამოვნებს, როცა თავს ამ გუნდის წევრად ვგრძნობ, რომელთან ერთადაც, ”რედ ბული” საშუალოდან ტოპ საჯინიბოდ ჩამოყალიბდა. იმეიდ მაქვს, რომ ერთობლივი ძალისხმევით, ახალ წარმატებებს მივაღწევთ და საბოლოო მიზნამდეც მივალთ - ჩემპიონები გავხდებით”, - ამბობს უებერი.

ავსტრალიელ პილოტთან კონტრაქტის გაგრძელებით კმაყოფილია გუნდის შეფი ქრისტიან ჰორნერიც: ”კითხვაც არავის გასჩენია იმაზე, თუ რატომ უნდა შეგვენარჩუნებინა მარკი. ის ჩვენი გუნდის მნიშვნელოვანი წევრია და თან, შესანიშნავ ფორმაში იმყოფება. სხვა თუ არაფერი, პილოტების კლასიფიკაციაში ლიდერობს. ჩვენ კმაყოფილები ვართ იმის გამო, რომ მარკი და სებასტიანი ზედიზედ მესამე სეზონს გაატარებენ ჩვენთან”.

ახლა, როცა გაირკვა, რომ ”რედ ბულ რეისინგს” მომავალი სეზონისთვის ვაკანსია არ აქვს, დიდი ალბათობით (99 პროცენტით) შეიძლება ვივარაუდოთ, რომ ჯერჯერობით, ფორმულა 1-ს არ დაუბრუნდება მისი 2007 წლის ჩემპიონი, ფინელი კიმი რაიკონენი, რომელიც ტოპ გუნდის შეთავაზების მოლოდინში, დროს რალის მსოფლიო ჩემპიონატზე ატარებს და არაა გამორიცხული, რომ დიდი პრიზების ცირკს აღარც დაუბრუნდეს.

ადვილი სავარაუდოა ისიც, რომ ”ფერარიში” არ გადავა პოლონელი რობერტ კუბიცა, რომელსაც სრულებით აწყობს აღმავლობის გზაზე დამდგარ ”რენოში” დარჩენა. და თუ კუბიცა ფრანგულ გუნდში დარჩა, ”ფერარის” ფელიპე მასას შეცვლაზე ზრუნვა არ მოუწევს. ასე რომ, ტავისუფლად შეიძლება ვთქვათ, რომ ტოპ გუნდებში ვაკანტური ადგილები აღარ დარჩა.

”აუდის” დიზელისძრავიანი ბოლიდი ლე მანის რბოლისთვის მზადაა

Audi R15 TDI plus Le Mans Racer

6 ივნისი

”აუდის” ლე მანის 24-საათიანი რბოლისადმი განსაკუთრებული დამოკიდებულება აქვს. უკვე დიდი ხანია, გერმანული კომპანიის სარბოლი პროტოტიპები ლეგენდარულ რბოლაში პირველობას არავის უთმობენ. უფრო მეტიც, 2006 წლიდან მოყოლებული, ”ოთხრგოლიანები” რბოლებს დიზელისძრავიანი მანქანებით იგებენ და ამ სეზონშიც იგივეს აპირებენ.

წლევანდელი რბოლისთვის ”აუდიმ” თავის სარბოლ პროტოტიპ R15 TDI-ის ახალი ვერსია მოამზადა, რომელიც წინამორბედისგან არამარტო გარეგნობით, სხვა უამრავი კონსტრუქციული ნაწილითაც განსხვავდება. მოდერნიზაციის მთავარი მიზანი, ავტომობილის გამძლეობის და ეფექტურობის გაუმჯობესება იყო.

ახალ ავტომობილს ”აუდი R15 TDI პლუს” ეწოდა. ის კვლავ 5.5-ლიტრიანი V12 დიზელითაა აღჭურვილი, რომელიც 620-ზე მეტ ცხენის ძალას იძლევა. არადა, ტექნიკური რეგლამენტი, რბოლის მონაწილეებს, ძრავებთან დაკავშირებით, ბევრ შეზღუდვას უწესებს.

პირველ რიგში, შეიცვალა ავტომობილის აეროდინამიკა, რომელიც მაღალი სიჩქარით მოძრაობისას, მის უფრო ეფექტურ მდგრადობას უზრუნველყოფს. შეიცვალა რადიატორის განლაგება, კოკპიტი კი უფრო ერგონომიული გახდა. შეიცვალა ავტომობილის განათების სისტემა, რომელშიც ახლა მტავარ როლს LED-ელემენტები ასრულებს. ამის წყალობით, ღამით რბოლისას, განათება გაცილებით ეფექტურია.

”აუდი R15 TDI პლუსს” ინტენსიური ტესტები ჩაუტარდა, რომელთა განმავლობაშიც, მანქანამ 40 000 კილომეტრი გაიარა და ფაქტობრივად, ჩვენს პლანეტას ეკვატორულ სარტყელში, გარს შემოუარა (ვირტუალურად). გამოცდების დროს, მანქანამ გამძლეობაზე ორი სრულფასოვანი ტესტი ჩააბარა, რომელთა დროსაც, 30-30 საათი სარბოლ რეჟიმში იმუშავა. გარდა ამისა, მას აეროსნმიკური ტესტები ჩაუტარდა როგორც ტრასაზე, რბოლისას, ასევე სპეციალურ აეროდინამიკურ მილში. შემოწმება გაიარა ავტომობილის ძრავის გაგრილების სისტემამაც. ამისთვის, სპეციალურად დაბინძურებული გზის საფარი იქნა შერჩეული, რათა დადგენილიყო, რამდენად გამართულად მუშაობს რადიატორი და მისი ბადე, როდესაც ხანგრძლივი რბოლისას, მათი ზედაპირი მტვრით და ჭუჭყით იფარება. გარდა ამისა, ავტომობილმა ორ რბოლაშიც (საფრანგეთის ლე კასტელეში და ბელგიის სპა ფრანკორშანზე) მიიღო მონაწილეობა, რაც ასევე მისი ტესტირებისთვის იქნა გამოყენებული.

გერმანულ კომპანიაში იმედოვნებენ, რომ ესოდენ ძვირადღირებული სატესტო პროგრამა, მათ ლე მანზე კიდევ ერთი დიდი გამარჯვების მოპოვებაში დაეხმარება.

რაიკონენმა მოტოციკლისტს აჯობა

Kimi versus Taddy

6 ივნისი

ავსტრიის ერცბერგში ტრადიციული მოტო როდეო ჩატარდა, რომელშიც 1500-ზე მეტმა ავტო და მოტომრბოლმა მიიღო მონაწილეობა. მათ შორის ყველაზე საინტერესო კი ფორმულა 1-ში მსოფლიოს 2007 წლის ჩემპიონის, ფინელი კიმი რაიკონენისა და მოტო ტრაიალში მსოფლიოს სამგზის ჩემპიონის, პოლონელი ტედი ბლაზუსიაკის დუელი იყო.

ასპარეზობას 30 000-ზე მეტი მაყურებელი დაესწრო. რაიკონენმა როდეოზე მონაწილეობა თავისი ”სიტროენ C4 WRC-ით” იასპარეზა, რომლიტაც ამ სეზონში, რალის მსოფლიო ჩემპიონატზე გამოდის. ბლაზუსიაკმა კი თავისი ორბორბლიანი ”საბრძოლო ცხენით”, ავსტრიულ კომპანია KTM-ის საქროსო მოტოციკლით იასპარეზა. როდეოს ტრადიციისამებრ, დუელში წაგებულს, გამარჯვებულისთვის მანქანა უნდა გაერეცხა...

კიმი რაიკონენი და ტედი ბლაზუსიაკი (მარჯვნივ)

..........................................

როგორც მოსალოდნელი იყო, შეჯიბრმა დიდი ინტერესი გამოიწვია, მისი კულმინაცია კი ავტომრბოლისა და მოტომრბოლის გახდა. რბოლის 13-კილომეტრიანი დისტანცია, რომლის განმავლობაშიც, მის მონაწილეებს არაერთი უძნელესი მოსახვევის გავლა მოუხდათ, რაიკონენმა მეტოქეზე 25 წამით სწრაფად გაიარა.

”ამგვარ შეჯიბრში მონაწილეობა პირველად მივიღე და მისგან დიდი სიამოვნება მივიღე. დაძაბული ბრძოლა გვქონდა, თუმცა დისტანციის მიწურულს, მე უფრო სწრაფი ვიყავი. მე ის ფაქტორი დამეხმარა, რომ რალის სარბოლ ავტომობილს ქროსის მოტოციკლზე გაცილებით მეტი სიჩქარე აქვს, რთულ მოსახვევებს კი ჩვენ დაახლოებით ერთნაირად გავდიოდით. საერთოდ, მოტოციკლები ძალიან მომწონს და მიხარია, რომ ტედისთან ურთიერთობის საშუალება მომეცა”, - ფინიშის შემდეგ განაცხადა რაიკონენმა.

შეგახსენებთ, რომ ფინელმა პილოტმა გასული სეზონის შემდეგ, ”ფერარი” დატოვა და სხვა გუნდებთან წარმოებული უშედეგო მოლაპარაკებების შემდეგ, რალის მსოფლიო ჩემპიონატზე გადაინაცვლა, სადაც ჯერჯერობით, მხოლოდ რამდენიმე ქულის მოპოვება შეძლო.

კარგა ხანს, ფორმულა 1-ის პადოკში ლაპარაკობდნენ იმაზე, რომ მომავალ სეზონში, რაიკონენი ”რედ ბულში” ავსტრალიელ მარკ უებერს შეცვლიდა, თუმცა ბოლო ინფორმაციით, ენერგეტიკული სასმელების მწარმოებელი ავსტრიული კომპანიის (რედ ბულის) გუნდს უებერთან კონტრაქტის გაგრძელება სურს...

როსიმ ფეხი მოიტეხა და ორ თვეს გამოტოვებს

Rossi breaks shin, faces two months out

5 ივნისი

როსი ტრასის მედცენტრში საკაცით გადაჰყავთ

..............................

მსოფლიოს ცხრაგზის ჩემპიონმა წრიულ მოტორბოლებში, იტალიელმა ვალენტინო როსიმ ფეხი მოიტეხა და მინიმუმ, ორი თვე ვერ შეძლებს რბოლებში მონაწილეობას. საბედისწერო ინციდენტი მას მუჯელოს ავტოდრომზე, იტალიის დიდი პრიზის თავისუფალი ვარჯიშის დროს შეემთხვა.

პრაქტიკის დასრულებამდე 15 წუთით ადრე, ”იამაჰას” 31 წლის იტალიელი მრბოლი მესამე უსწრაფესი იყო. მაგრამ ერთ-ერთ მოსახვევში შესვლისას, მოტოციკლი ვერ დაიმორჩილა და დაეცა. როსის წამოდგომა გაუჭირდა და იქვე ჩაიკეცა. მას სასწრაფოდ აღმოუჩინეს პირველი დახმარება და ადგილობრივ სამედიცინო ცენტრში გადაიყვანეს, სადაც დადგინდა, რომ მოტომრბოლს მარჯვენა წვივის ორივე ძვლის მოტეხილობა აქვს. ამასთან, მცირე ძვალზე ღია მოტეხილობა დაფიქსირდა მოტეხილმა ძვალმა კი რბილი ქსოვილი დააზიანა.

როსის ავარია

..............................

პირველი გასინჯვის შემდეგ, როსი ქალაქ მუჯელოს ჰოსპიტალში გადაიყვანეს, სადაც ოპერაცია გაუკეთეს, რომლის დროსაც, მოტეხილი ძვლები დაფიქსირდა. ექიმებმა განაცხადეს, რომ მოტეხილობისა და რბილი ქსოვილის შესახორცებლად, დაახლოებით ორი თვე იქნება საჭირო. თუმცა ეს არ ნიშნავს, რომ როსი სარბოლ ტრასას ამ ვადაში დაუბრუნდება. შეხორცების შემდეგ, მას სარეაბილიტაციო კურსის გავლა მოუწევს, რის გამოც, შესაძლოა მან ამ სეზონში დაბრუნებაც კი ვერ შეძლოს.

”სრულიად მშვიდად ვარ. ექიმები თავის საქმეს გააკეთებენ და მერე ვნახოთ”, - განაცხადა როსიმ, ვინც იტალიური რბოლის წინ, ეგრეთ წოდებული მოჰიკანური (ინდიელთა ტომია ამერიკაში) ვარცხნილობით გააკვირვა თავისი მრავალრიცხოვანი ქომაგი.

აღსანიშნავია, რომ ტრავმის გამო, როსის მსოფლიო ჩემპიონატის რბოლების გამოტოვება პირველად მოუწევს. ამ ეტაპზე, დანამდვილებით შეიძლება იმის თქმა, რომ როსი ბრიტანეთის, ჰოლანდიის, კატალონიისა და აშშ-ის დიდ პრიზებს გამოტოვებს. ეს კი იმას ნიშნავს, რომ ის უკვე ვერ შეძლებს შარშან მოპოვებული მეცხრე ტიტულის (პირველი სამი 125, 250 და 500 კლასებში აქვს მოგებული) დაცვას.

მიმდინარე ჩემპიონატში, პირველი სამი ეტაპის შემდეგ, იტალიურ ეტაპამდე, როსი მეორე ადგილზე იმყოფებოდა და თავის ლიდერ თანაგუნდელს, ესპანელ ხორხე ლორენსოს 9 ქულით ჩამორჩებოდა.

სხვათა შორის, ამ სეზონში როსისთვის ეს პირველი ტრავმა არაა. უფრო ადრე, მან მხრის ტრავმა მიიღო, რომლის გამოც, რბოლებში თავის შესაძლებლობათა სრულად გამოვლენას ვერ ახერხებდა. როგორც ჩანს, სწორედ ეს იყო იმის მიზეზი, რომ როსის მდევრის როლში ყოფნა უწევდა.

”რედ ბულს” ფეტელთან კონტრაქტის გაგრძელება სურს

Red Bull looks to extend Vettel contract

4 ივნისი

ინგლისურ ჟურნალ ”ავტოსპორტის” ინფორმაციით, ”რედ ბულ რეისინგი” მოწადინებულია, რომ თავის გერმანელ პილოტ სებასტიან ფეტელს კონტრაქტი კიდევ სამი წლით, 2015 წლამდე გაუგრძელოს. ამგვარად, ავსტრიული კომპანიის გუნდი ფეტელით სხვა გუნდების, პირველ რიგში, ”ფერარის” დაინტერესებას აცხრობს.

ფეტელის და ”რედ ბულის” მიმდინარე კონტრაქტი 2012 წლის სეზონის ბოლოს მთავრდება. მაგრამ ამის მიუხედავად, გუნდის ხელმძღვანელობა ამ კონტრაქტის მაინც ვადაზე ადრე გაგრძელებას ცდილობს. და ამასთან დაკავშირებით, ფეტელთან მოლაპარაკება უკვე დაწყებული აქვს.

გუნდის ფეტელით დაინტერესება განსაკუთრებით მას შემდეგ გაძლიერდა, რაც ტექნიკურმა დირექტორმა ედრიან ნიუიმ განაცხადა, რომ ”რედ ბულში” დიდი ხნით დარჩენას აპირებს. თავისი განცხადება კი კონტრაქტის გაგრძელების სურვილის გამოთქმით გამოხატა.

ცნობისათვის, ნიუი თანამედროვე ფორმულა 1-ის ერთ-ერთი საუკეთესო (თუ საუკეთესო არა) ინჟინერია, რომლის წყალობითაც, ”რედ ბული” ახერხებს, რომ შედარებით სუსტი (რენოს) ძრავით, ორივე კლასიფიკაციაში პირველობისთვის იბრძოლოს. სხვათა შორის, ერთ დროს, ნიუი ”უილიამსსა” და ”მაკლარენშიც” მუშაობდა და მისი ხელმძღვანელობით შემუშავებული მანქანები ყოველთვის იძლეოდა გამარჯვებისთვის ბრძოლის საშუალებას. მაგრამ როგორც კი მიზანს მიაღწევდა, მოტივაციას კარგავდა და სხვა გუნდში გადადიოდა.

ახლაც, მოსალოდნელი იყო, რომ ”რედ ბულის” ტოპ გუნდად გადაქცევის შემდეგ, ნიუი წასვლას (ფორმულა 1-დან საერთოდ წასვლას - ეს მას ნათქვამი აქვს) გადაწყვეტდა. მაგრამ ასე არ მოხდა.

”ჩვენს შორის გახსნილი ურთიერთობაა. მას მოსწონს, რასაც ჩვენთან აკეთებს. მას მოსწონს ”რედ ბულში” შექმნილი გარემო. ის საკმაოდ ახალგაზრდაა იმისათვის, რომ პენსიაზე იფიქროს. ჩემი აზრით, ჯერ მისი წასვლა ნაადრევია. მჯერა, რომ ედრიანი ჩვენთან ერთხანს კიდევ დარჩება”, - გამოცემა ”ავტოსპორტთან” საუბრისას განაცხადა ”რედ ბულ რეისინგის” შეფმა ქრისტიან ჰორნერმა.

სხვათა შორის, ავსტრალიელ მარკ უებერს ”რედ ბულტან” კონტრაქტი ამ სეზონის ბოლოს უმთავრდება და როგორც ჩანს, გუნდი ამ კონტრაქტს მხოლოდ ერთი სეზონით გააგრძელებს. მართალია, უებერს ფეტელთან თურქულ რბოლაში ინციდენტი შეემთხვა, თუმცა გუნდმა თავისი პილოტები უკვე შეარიგა და სავარაუდოდ ოზ პილოტთან კონტრაქტს ბრიტანულ დიდ პრიზამდე გააგრძელებს.

ფელიპე მასას ”მაკლარენი” იწვევდა

Felipe Massa

4 ივნისი

ბრაზილუირ პრესაში გავრცელდა ინფორმაცია, რომლის შესაბამისადაც, გასულ სეზონში, ბრაზილიელი ფელიპე მასას გადაბირებას ინგლისური ”მაკლარენი” ცდილობდა. საქმე კონტრაქტის გაფორმებამდეც კი მისულა, მაგრამ შემდეგ მასას უნგრეთის დიდი პრიზის კვალიფიკაციაზე მძიმე ინციდენტი შეემთხვა, რის გამოც, ის ჩემპიონატს სეზონის ბოლომდე გამოეთიშა. მოგვიანებით, გამოჯანმრთელებულ პილოტს ”ფერარიმ” კონტრაქტი ერთი წლით გაუგრძელა.

გამოცემა ”ეშპორტეშის” ინფორმაციით, ”მაკლარენმა” გასული სეზონის შუაშივე გადაწყვიტა, რომ ფინელი ჰეიკი კოვალაინენისთვის კონტრაქტი არ გაეგრძელებინა. მის საუკეთესო შემცვლელად სწორედ მასა მიიჩნიეს, რადგან ბრაზილიელი თავის ფინელ თანაგუნდელ კიმი რაიკონენის ფონზე თავის გამოჩენას ახერხებდა.

”მაკლარენსა” და მასას შორის მოლაპარაკებათა სერია გაიმართა, რომლის დროსაც, ბრაზილიელმა განაცხადა, რომ ”ფერარისთან” კონტრაქტის გაგრძელებაზე აწარმოებდა მოლაპარაკებას. თუმცა, ისიც დასძინა, რომ სხვა ვარიანტების განხილვაზეც თანახმა იყო.

მაგრამ უნგრული რბოლის კვალიფიკაციამ ყველაფერი თავდაყირა დააყენა. მომხდარის გამო, მასამ ”მაკლარენთან” მოლაპარაკება ვეღარ გააგრძელა, იტალიურმა საჯინიბომ კი მას კონტრაქტი ერთი წლით მაშინვე გაუგრძელა, როგორც კი ცნობილი გახდა, რომ ბრაზილიელი პილოტი სეზონის ბოლომდე შეძლებდა მწყობრში ჩადგომას.

გავიდა ერთი წელი და როგორც ჩანს, ”ფერარიში” დარჩენა თავად მასას აღარ სურს. უფრო მეტიც, ის არ მალავს, რომ ”რედ ბულში” გადასვლა სურს. ავსტრიული კომპანიის გუნდს კი მასაზე მეტად, პოლონელი რობერტ კუბიცა აინტერესებს, თუმცა არც იმაზე იტყოდა უარს, რომ თავისთან ავსტრალიელი მარკ უებერი მიეწვია. სხვათა შორის, ახლახანს გავრცელდა ინფორმაცია იმის შესახებ, რომ ”რედ ბული” თავის გერმანელ პილოტ სებასტიან ფეტელთან კონტრაქტის ხუთი წლით გაგრძელებას აპირებს. უებერს კი გუნდთან კონტრაქტი მალე დაუმთავრდება. ”ფერარიშტან” კონტრაქტი მასასაც ეწურება. ასე რომ, გამორიცხული არაა, მასამ და უებერმა ადგილები გაცვალონ...

ფეტელი და უებერი შეარიგეს

Red Bull 'draws line' under Turkey crash

4 ივნისი

”რედ ბულ რეისინგის” ბაზაზე სპეციალური შეხვედრა გაიმართა, რომელზეც ერთმანეთს გუნდის პილოტები - ავსტრალიელი მარკ უებერი და გერმანელი სებასტიან ფეტელი, ასევე გუნდის ხელმძღვანელობა - შეფი კრისტიან ჰორნერი, ტექნიკური დირექტორი ედრიან ნიუი და მრჩეველი ჰელმუტ მარკო შეხვდნენ. რა თქმა უნდა, განხილვის მთავარი საკითხი, თურქეთის დიდი პრიზის რბოლის მე-4 წრეზე მომხდარი ავარია იყო, რომელმაც გუნდს გამარჯვების დუბლი (თეორიულად მაინც) დააკარგვინა.

”შეხვედრა დადებითი გამოდგა. მასზე თურქეთის დიდ პრიზზე მომხდარი ავარიის ყველა დეტალი განვიხილეთ. ამიერიდან მომხდარს აღარ დავუბრუნდებით და მთელი ჩვენი ყურადღება კანადური ეტაპისკენაა მიპყრობილი”, - ნათქვამია გუნდის მიერ გამოქვეყნებულ ოფიციალურ რელიზში. კომენტარები პილოტებმაც გააკეთეს.

”გუნდის გარჯის წყალობით, ინციდენტამდე რბოლა შესანიშნავად წარიმართა, თუმცა რაც შემდეგ მოხდა, იმას არავინ გაუხარებია. ამიტომ, ყველას ბოდიშს ვუხდი დაკარგული ლიდერობისთვის. მე და მარკი მრბოლები ვართ და ტრასაზე მხოლოდ გამარჯვებისთვის ვიბრძვით. ჩვენ პროფესიონალები ვართ. ამიტომ, მომხდარი არ აისახება ჩვენს ერთობლივ მუშაობაზე, რომლის მიზანიც წინსვლა და გამარჯვებაა. ჩვენ შესანიშნავი გუნდი გვყავს და ჩვენი სულისკვეთება მაღალია. წინ კი კანადური ეტაპი გველის”, - განაცხადა ფეტელმა.

”გუნდის გამო, გული მწყდება. ჩვენ გამარჯვების შესანიშნავი შანსი გავუშვით ხელიდან. მაგრამ ეს სპორტია და აქ მსგავსი ინციდენტები ხანდახან ხდება. თუმცა, მათი განმეორების დაშვებაც არ შეიძლება. მომხდარის გამო, ყველანი გულდაწყვეტილები ვართ. ახლა ჩემსა და სებზე ბევრი რამაა დამოკიდებული. მთავარი კი ისაა, რომ ერთობლივად ვიმუშაოთ და გუნდს წარმატებები მოვუპოვოთ. მომხდარზე ბევრი ვილაპარაკეთ და ამ თემას აღარ მივუბრუნდებით. ახლა მთავარია, რომ კანადისთვის სათანადოდ მოვემზადოთ”, - ამბობს უებერი.