”ლოტუსმა” თავისი ბოლიდი ლონდონში გაგვაცნო

Lotus launches 2010 car in London

13 თებერვალი

არნო ტრული (მარცხნივ) და ჰეიკი კოვალაინენი ”ლოტუს T127-ის” პრეზენტაციაზე

..............................................

ფორმულა 1-ის მსოფლიო ჩემპიონატის მონაწილე გუნდებს შორის, ”ლოტუსი” ჯერჯერობით ბოლოა, რომელმაც საზოგადოებას თავისი სარბოლი ავტომობილი - T127 წარუდგინა. პრეზენტაცია ლონდონში ჩატარდა.

ავტომობილის სახელწოდება მიგვანიშნებს, რომ ”ლოტუსი” ამავე სახელწოდების მქონე ლეგენდარული გუნდის შთამომავალია. ძველმა გუნდმა, რომელიც 60-იან წლებში ლეგენდარულმა ბრიტანელმა კონსტრუქტორმა კოლინ ჩეპმენმა ჩამოაყალიბა, ფორმულა 1 1994 წლის სეზონის ბოლოს დატოვა. დღეს კი ის მალაიზიელებმა აღადგინეს. ცნობისათვის, სპორტული ავტომობილების მწარმოებელი ინგლისური კომპანია ”ლოტუსი” დღეს მალაიზიურ საავტომობილო კომპანია ”პროტონის” მფლობელობაში შედის.

”რასაც ახლა განვიცდი, სიტყვებით იმის წარმოთქმა შეუძლებელია. ფ1-ის ლიცენზია რომ ავიღეთ, მაშინ ჰაინგჰემში მხოლოდ ხუთნი ვმუშაობდით, დღეს კი ეს ავტომობილი წარმოგიდგინეთ. ეს ნამდვილი საოცრებაა. კლაივმა (ჩეპმენმა) მითხრა, რომ ეს მომენტი იმ დღეს ჰგავს, როდესაც ”ლოტუსი” პირველ ნაბიჯებს დგამდაო. ეს მართლაც ისტორიული მომენტია”, - განაცხადა ”ლოტუსის” შეფმა, მალაიზიელმა ბიზნესმენმა ტონი ფერნანდესმა.

”თავიდანვე ვიცოდით, რომ დიდ საქმეს შევეჭიდეთ. ლეგენდა, რომლის დიდებაც ახლა ჩვენი მხრებით უნდა ვატაროთ, ისეთმა დიდმა მრბოლებმა შექმნეს, როგორებიც ჯიმ კლარკი, სტირლინგ მოსი, გრემ ჰილი და ნაიჯელ მენსელი არიან. დიდი გზა გვაქვს გასავლელი და იმავდროულად, დიდი პატივი გვერგო, რომ ამ გუნდის ლეგენდარული ისტორიის ნაწილი ვხდებით. ყველაფერს გავაკეთებთ იმისათვის, რომ ამ დიდი ისტორიის ღირსეული გამგრძელებლები გავხდეთ”, - დასძენს ფერნანდესი.

მანქანა პირვერლად ტრასაზე პრეზენტაციის წინა დღეებში, სილვერსტოუნზე გამოვიდა, მომავალ კვირაში კი ”ლოტუსი” მის ტესტირებას სხვა გუნდებთან ერთად, ესპანეთის სამხრეთში მდებარე ქალაქ ხერესის ”დელა ფრონტერაზე” დაიწყებს.

მომავალ სეზონში, ”ლოტუსის” მანქანებით ჩემპიონატში მონაწილეობას იტალიელი იარნო ტრული და ფინელი ჰეიკი კოვალაინენი მიიღებენ. გუნდის ტესტ და სათადარიგო პილოტი კი მალაიზიელი ფაირუზ ფაუზი იქნება.

”ლოტუსის” სარბოლი ავტომობილი T127 ცნობილი ინგლისელი ინჟინრის, მაიკ გასკოინის ხელმძღვანელობით შეიქმნა. გასკოინი ფორმულა 1-ში მომუშავე ერთ-ერთი ყველაზე გამოცდილი კონსტრუქტორია. თავის დროზე, ის ”მაკლარენში”, ”ზაუბერსა” და ”ტირელში” მუშაობდა, შემდეგ ”ჯორდანში”, ”რენოში”, ”ტოიოტასა” და ”ფორს ინდიაში” ტექნიკური დირექტორის პოსტებზე მუშაობდა. იაპონურ გუნდში მუშაობისას, მისი წლიური ხელფასი 8 მილიონ დოლარს შეადგენდა, რაც ფორმულა 1-ის ისტორიაში (ტექნიკური დირექტორებისთვის) სარეკორდო ანაზღაურება იყო.

”ჩვენი მთავარი ამოცანა ჩემპიონატის სტარტზე გამოსვლა იყო, რასაც მივაღწიეთ. ახლა მთავარია, პროფესიულ სტანდარტს მივაღწიოთ, შემდეგ კი უფრო სოლიდურ მიზნებსაც დავისახავთ. რა თქმა უნდა, სეზონის განმავლობაში, მანქანას აეროდინამიკური მილის დახმარებით დავხვეწავთ, რასაც გარკვეული დრო დასჭირდება”, - განაცხადა გასკოინმა.

FIA-მ ახალი რეგლამენტი დაამტკიცა

FIA to keep fuel weights secret

11 თებერვალი

როგორც მოსალოდნელი იყო, საერთაშორისო საავტომობილო ფედერაციამ ფორმულა 1-ის ტექნიკური რეგლამენტის ახალი ვერსია დაამტკიცა. რეგლამენტში რამდენიმე პუნქტია შეცვლილი, რომლებიც ქულათა სისტემას და რბოლების დროს საბურავების გამოყენების წესებს ეხება. ასევე შეცვლილია რამდენიმე უმნიშვნელო პუნქტი.

კერძოდ, რბოლების წინ აღარ გამოქვეყნდება მანქანების წონები, რაც გასულ სეზონში სავალდებულო იყო. რამდენადაც რბოლის დროს საწვავის შევსება აიკრძალა, წესით მანქანების წონებიც საინტერესო აღარ უნდა იყოს. არადა, წონის გამოქვეყნების შემთხვევაში, იმის დაახლოებით გამოთვლა მაინც შეიძლება, თუ რამდენად ეკონომიურად მოიხმარს საწვავს ამა თუ იმ კომპანიის მიერ შექმნილი ძრავი.

ასევე იკრძალება პიტ სტოპის დროს მანქანის ავტომატური დანადგარებით აწევა. ისევე როგორც 80-იან და 90-იან წლებში, საბურავების შეცვლისას, გუნდების პერსონალები ეგრეთ წოდებულ ხელის დომკრატებს გამოიყენებენ.

დამტკიცდა ქულების დარიცხვის ახალი სისტემა, რომლის მიხედვითაც, ქულებს ის პილოტები მიიღებენ, რომლებიც რბოლებს მოწინავე ათეულში დაამთავრებენ. გამარჯვებული 25 ქულას მიიღებს, მეორეადგილოსანი 18-ს და ასე შემდეგ (სისტემით25-18-15-12-10-8-6-4-2-1).

ცვლილებებია საბურავების წესებშიც. კერძოდ, ის პილოტები, რომლებიც კვალიფიკაციის მესამე სესიაზე იასპარეზებენ, რბოლას იმავე საბურავებით დაიწყებენ, რომლითაც საკვალიფიკაციო საუკეთესო დროს დააფიქსირებენ. თუ კვალიფიკაციის დროს ერთი ან რომელიმე საბურავი დაზიანდება, სრული კომპლექტის შეცვლის საკითხს სპეციალური ტექნიკური კომისია გადაწყვეტს.

გუნდებს დამატებითი ტესტების უფლება მიეცემათ იმ შემთხვევისთვის, თუ მათ სეზონის მსვლელობისას პილოტის შეცვლა მოუწევთ. დამატებით ტესტებზე კი მხოლოდ ახალწვეულები მიიღებენ მონაწილეობას. ამასთან, ტესტები მხოლოდ იმ ტრასაზე იქნება დაშვებული, რომელზეც ჩემპიონატის რბოლა არ ტარდება. თუ ასეთ ტესტზე, შემცვლელი პილოტი ტრასაზე არ გამოვა, შესაბამის გუნდს, სეზონის შემდეგ, ერთი სატესტო დღე დააკლდება.

მცირე ცვლილებაა პუნქტში, რომელიც სეზონის განმავლობაში, ძრავების გამოყენებას განსაზღვრავს. სეზონზე ერთ პილოტს ისევ მხოლოდ 8 ძრავის გამოყენების უფლება აქვს. ყოველი ზედმეტი აგრეგატისთვის, მას რბოლის სასტარტო რიგში 10 ადგილის დათმობა მოუწევს. თუ ერთ რბოლაზე პილოტი ორჯერ გადააჭარბებს ლიმიტს, თითო გადაჭარბებაზე ის 10 ადგილს დაკარგავს.

კიდევ ერთი ცვლილება რბოლისწინა მოსათელ წრეს ეხება. თუ ასეთ წრეზე, რაიმე მიზეზით, პილოტი ადგილს დაკარგავს, მას მისი დაბრუნების უფლება მანამ აქვს, სანამ პიტლეინზე შესასვლელის ხაზს გადაკვეთავდეს.

FIA -მ ასევე დაამტკიცა სია მანქანის დეტალებისა, რომელთა ჰომოლოგირება სავალდებულოა. ამასთან, ამ დეტალების კონსტრუქციის შეცვლა არ შეიძლება, თუ ცვლილება საიმედოობის გაუმჯობესებასა და უსაფრთხოებასთან არაა დაკავშირებული.

სარბოლი უქმეებისას, თითოეულ პილოტს საბურავების 11 კომპლექტის გამოყენების უფლება ეძლევა (შარშან 14-ის გამოყენება შეიძლებოდა). ამასთან, პირველ პრაქტიკაზე თითოეულ პილოტს მხოლოდ ერთი, მყარი საბურავის კომპლექტის გამოყენების უფლება აქვს. მეორეზე მას ორი კომპლექტი - თითო მყარი და რბილი, ეძლევა. კვალიფიკაციასა და რბოლაზე კი მშრალი ამინდისთვის განკუთვნილი საბურავების 4 კომპლექტის გამოყენებაა დაშვებული.

”რედ ბულ რეისინგის” ახალი საბრძოლო ”ლიმუზინი” - RB6

Red Bull launch RB6 "limousine" (Reuters)

10 თებერვალი

ფორმულა 1-ის ერთ-ერთმა საუკეთესო გუნდმა ”რედ ბულ რეისინგმა” საზოგადოებას თავისი ახალი მანქანა - RB6 უჩვენა, რომლითაც მისი პილოტები, ავსტრალიელი მარკ უებერი და გერმანელი სებასტიან ფეტელი ჩემპიონობისთვის იბრძოლებენ.

ახალი ბოლიდის პრეზენტაცია ხერესში (სამხრეთ ესპანეთი), ავტოდრომ ”დე ლა ფრონტერაზე”, ოფიციალური წინასასეზონო ტესტების წინ შედგა, რომლის დროსაც, მისით აღფრთოვანებულმა უებერმა მანქანას ”ლიმუზინი” უწოდა.

გასულ სეზონში ”რედ ბულმა” კონსტრუქტორთა პირველობა მეორე ადგილზე დაასრულა, ფეტელმა კი პირად ჩათვლაში დაიკავა მეორე ადგილი. ავსტრიული საჯინიბოს მანქანა სეზონის მეორე ნახევარში საუკეთესო იყო და მისმა პილოტებმა ბოლო სამი რბოლის მოგება შეძლეს, თუმცა სეზონის დასაწყისში დაწინაურებული ”ბრაუნის” (ახლანდელი მერსედესის) და მისი ბრიტანელ პილოტ ჯენსონ ბატონის დაწევა ვერ შეძლეს.

ისევე როგორც სხვა გუნდების მანქანები, RB6-იც შარშანდელთან შედარებით დაგრძელებულია, რაც იმის გამო მოხდა, რომ ახალი სეზონიდან, რბოლების დროს საწვავის შევსება იკრძალება და აქედან გამომდინარე, მანქანებში ერთი რბოლის სამყოფი საწვავი სტარტზევე უნდა ესხას. საწვავის ავზის მოცულობის გაზრდამ კი მანქანების ბაზის დაგრძელება მოითხოვა.

RB6-ს შარშანდელი მანქანისგან უფრო მაღლა აწეული ცხვირი და ძრავის ხუფის ზედა ნაწილში არსებული აეროდინამიკური ელემენტი გამოარჩევს, რომელსაც ჟურნალისტებმა დამახასიათებელი მოყვანილობის გამო, ”ზვიგენის ფარფლი” შეარქვეს.

”ეს მანქანა ნამდვილი ლიმუზინია. შარშანდელ მანქანაზე მხოლოდ რამდენიმე აეროდინამიკური ელემენტი შევცვალეთ. ჩვენ ვნახეთ, რომ ბევრმა გუნდმა ჩვენი შარშანდელი მანქანის კოპირება გადაწყვიტა, რაც კიდევ ერთხელ მეტყველებს, რომ ედრიან ნიუი გენიოსია”, - განაცხადა უებერმა, ვინც ტესტების პირველ ორ დღეს გამოცდის ახალ მანქანას, შემდეგ ორ დღეს კი ადგილს ფეტელს დაუთმობს.

”რედ ბული” ძველ გუნდებს შორის ბოლოა, რომელმაც ტრასაზე ახალი მანქანა გამოიყვანა. დანარჩენებმა ეს უკვე მოასწრეს. ავსტრიულ გუნდამდე ბოლომ ეს წინა დღით ”ფორს ინდიამ” გააკეთა, რომელმაც თავისი ახალი ბოლიდის პრეზენტაცია სილვერსტოუნში (ინგლისი), ინტერნეტის მეშვეობით ჩაატარა.

ახალი გუნდებიდან თავისი სარბოლი მანქანა უკვე გვაჩვენა ”ვირჯინ რეისინგმა”, ”ლოტუსი” კი ამას ამ კვირაში გააკეთებს, თუმცა სილვერსტოუნზე პირველი ტესტები მანაც უკვე გაიარა. დარჩა ორი გუნდი, რომელთა მომავალიც ჯერ გაურკვეველია. ესენია ამერიკული U.S. F1 და ესპანური ”კამპოს მეტა”, რომლებიც შესაძლოა, სეზონის პირველ ეტაპზე, რომელსაც ბაჰრეინი უმასპინძლებს, გამოსვლა ვერც მოასწრონ.

”რედ ბულმა” პირველი ტესტები, რომლებიც ვალენსიაში ჩატარდა, გააცდინა, თუმცა გუნდის შეფი ქრისტიან ჰორნერი ამბობს, რომ ეს პრაგმატული მიზეზების გამო გაკეთდა, რათა ტესტებისთვის მანქანა სრულად მომზადებული ყოფილიყო.

”ჩვენ ჩავთვალეთ, რომ ფაბრიკაში დამატებითი მუშაობა და მანქანის სრულყოფა უფრო პროდუქტიული იქნებოდა. ახალი სეზონისთვის აგრესიული მიზნები დავისახეთ. მისთვის მზადების განმავლობაში, რამდენიმე კონცეპცია შევიმუშავეთ და მათგან საუკეთესო ავარჩიეთ. ვფიქრობ, ამ სეზონში გამარჯვებებისთვის ოთხი გუნდი - ”მაკლარენი”, ”ფერარი”, ”მერსედესი” და ჩვენ ვიბრძოლებთ”, - ამბობს ჰორნერი, ვინც გასული სეზონის შემდეგ, ”მერსედესის” ძრავებზე გადასვლას გეგმავდა, თუმცა ნიუის რჩევით, საბოლოო არჩევანი ”რენოზე” შეაჩერა, რომელიც ახლანდელ ფორმულა 1-ში ყველაზე ეკონომიურ ძრავებს აწარმოებს, რასაც დიდი მნიშვნელობა ექნება, რადგან ამ ძრავებით აღჭურვილი მანქანები სტარტზე შედარებით მსუბუქები გავლენ.

”ფორს ინდიას” ამბიციები გაეზარდა

Force India eyes more podiums in 2010

7 თებერვალი

ისევე როგორც ფორმულა 1-ის ახალწვეულმა ”ვირჯინ რეისინგმა”, ინგლისის სილვერსტოუნში ბაზირებულმა ინდურმა ”ფორს ინდიამაც” თავისი ახალი ბოლიდის - VJM03-ის პრეზენტაცია ვირტუალურ სამყაროში, ინტერნეტით ჩაატარა.

პრეზენტაციაზე, გუნდის შეფმა ვიჯეი მალიამ (მანქანის აბრევიატურა სწორედ მისი სახელისა და გვარის პირველი ასოების კომბინაციაა) განაცხადა, რომ ახალ სეზონში, მისი საჯინიბო შარშანდელი მიღწევების გაუმჯობესებას - მეტი ქულის მოპოვებას და კვარცხლბეკზე უფრო ხშირად ასვლას გეგმავს.

”ფორს ინდიასთვის” გასული სეზონი იმით იყო მნიშვნელოვანი, რომ გუნდმა პირველი პოულ პოზიცია მოიპოვა და პირველად დაიკავა ადგილი კვარცხლბეკზე. ახლა კი წინსვლის იმედი აქვს, რისი ერთ-ერთი საფუძველიც ”მერსედეს ბენცის” ძრავი და ის გარემოებაა, რომ შარშან გუნდი სეზონის განმავლობაში მაღალი ტემპით ვითარდებოდა.

”ჩვენი მიზანი წინსვლის გაგრძელებაა. გასული სეზონი ჩვენთვის გამორჩეული იყო. ამაზე სტატისტიკაც მეტყველებს: ერთი კვარცხლბეკი, ერთი პოული, ერთი უსწრაფესი წრე, 13 ფინიში მოწინავე ათეულში და 13 ქულა. თანაც, დიდი გამოცდილება დავაგროვეთ და თვისობრივადაც, აშკარად უკეთესი გუნდი გავხდით. ვიმედოვნებ, რომ წინსვლას ახალ სეზონშიც გავაგრძელებთ. ჯერჯერობით, მხოლოდ ერთი კვარცხლბეკით და ამდენივე პოულით ვამაყოფთ, თუმცა იმედი მაქვს, რომ მერმის ამ დროს უფრო მეტზე ლაპარაკს შევძლებ. რატომაც არა?” - ამბობს მალია.

გუნდის მთავარი ინჟინერი მარკ სმიტი დასძენს, რომ ახალი მანქანა შარშანდელის ევოლუციური ვარიანტია: ”VJM03 შარშანდელი მანქანის, მისი კონსტრუქციის ფილოსოფიის ევოლუციური ვერსიაა. VJM02 კარგი მანქანა იყო და ამიტომაც, ჩვენ მისი განვითარება გადავწყვიტეთ და არა ახალი მანქანის შექმნა. მთავარი ცვლილება ტექნიკურმა რეგლამენტმა გვიკარნახა. რბოლისას მანქანის საწვავით გაწყობის აკრძალვამ, საწვავის ავზების ორჯერ გაზრდა მოითხოვა, რასაც მანქანის საბაზო მონაცემების შეცვლა გამოიწვია. ჩვენ ორი ვარიანტიდან უნდა აგვერჩია, რა გზით წავსულიყავით - მანქანა ან ძალიან უნდა დაგვეგრძელებინა, ან გაგვეგანიერებინა, ან, როგორც ჩვენ მოვიქეცით, ორივე ერთდროულად უნდა გაგვეკეთებინა. შეიცვალა მექანიკური და აეროდინამიკური ნაწილი. რა თქმა უნდა, ვიზრუნეთ იმაზეც, რომ დიფუზორამდე ჰაერის მაქსიმალურად მოწესრიგებულმა ნაკადმა მიაღწიოს”, - ამბობს სმიტი და იმედოვნებს, რომ VJM03 სხვადასხვა ტიპის ტრასებს ადვილად მიესადაგება. ცნობისათვის, VJM02 არცთუ კარგი აეროდინამიკით ხასიათდებოდა, რის გამოც, იმ ტრასებზე იყო კონკურენტული, რომლებიც აეროდინამიკისადმი ნაკლებად მომთხოვნია.

”რედ ბული” რაიკონენის დაბრუნებას არ გამორიცხავს

Red Bull- Kimi Raikkonen

7 თებერვალი

”რედ ბულ რეისინგის” მრჩეველი ავტოსპორტის საკითხებში, წარსულში ფორმულა 1-ის პილოტი, ავსტრიელი ჰელმუტ მარკო არ გამორიცხავს, რომ 2011 წელს კიმი რაიკონენი შეიძლება ისევ ფორმულა 1-ს დაუბრუნდეს.

ფინელი პილოტი, რომელიც ფორმულა 1-ის მსოფლიო ჩემპიონი 2007 წელს გახდა, ამ სეზონში რალის მსოფლიო ჩემპიონატზე, ”სიტროენის” მეორე გუნ ”ჯუნიორში” იასპარეზებს, რომლის სპონსორიც ენერგეტიკული სასმელების მწარმოებელი ავსტრიული კომპანია ”რედ ბულია”. რა თქმა უნდა, ხელფასსაც მას ”რედ ბული” გადაუხდის, რომელთან ურთიერთობაც მას ჯერ კიდევ ”ფერარიში” ყოფნისას ჰქონდა.

დიდი ხანია, ფორმულა 1-ის კულუარებში დადის ხმები იმის შესახებ, რომ 2011 წელს კიმი ”რედ ბულ რეისინგში” ავსტრალიელ მარკ უებერს შეცვლის, რომელსაც გუნდთან კონტრაქტი ამ სეზონის ბოლოს უმთავრდება.

”კიმის ”რედ ბულთან” კონტრაქტი აქვს. ეს კომპანია ერთი დიდი ოჯახია, რომელსაც რამდენიმე ვარიანტი აქვს, ყველაფერი კი, პირველ რიგში, რაიკონენის სურვილზე და რალის რბოლებში მის შედეგებზე იქნება დამოკიდებული. და მე არ მიმაჩნია დაუჯერებლად, რომ ის ფორმულა 1-ს დაუბრუნდება”, - ამბობს მარკო.

შეგახსენებთ, რომ გასული სეზონის შემდეგ, რაიკონენს ”ფერარის” დატოვებამ მოუწია, რისი მიზეზიც ის გარემოება გახდა, რომ იტალიურმა საჯინიბომ მის ადგილზე მსოფლიოს ორგზის ჩემპიონი, ესპანელი ფერნანდო ალონსო მიიწვია. ეს გადაწყვეტილება კი ”სკუდერიამ” ახალი ტიტულოვანი სპონსორის, ესპანურ საბანკო კონგლომერატ ”სანტანდერის” სურვილით მიიღო. ”სანტანდერი” ”მაკლარენის” სპონსორიცაა და მზად იყო, რაიკონენი ინგლისურ გუნდში გადაეყვანა, თუმცა ფინელმა თავის ყოფილ გუნდთან შეთანხმებას ვერ მიაღწია და რადგან, ტოპ გუნდებში ვაკანსიები აღარ რჩებოდა, მან ფ1-დან წასვლა ამჯობინა. მითუმეტეს, ამისათვის ის კონტრაქტის გაწყვეტის გამო, ”ფერარისგან” სოლიდურ (მრავალმილიონიან) კომპენსაციას მიიღებს. სხვათა შორის, ის ამ კომპენსაციას ვერ მიიღებდა, თუ ფორმულა 1-ის რომელიმე გუნდში გადავიდოდა. ახლა კი რალის ჩემპიონატზეც გამოვა და ამ კომპენსაციის გარდა, ”რედ ბულისგანაც” მიიღებს ხელფასს.

რაიკონენს რალის ასპარეზზე გამოსვლა დიდი ხანია, სურდა და ”ფერარისგან” წამოსვლა იმის საბაბი გახდა, რომ თავისი ძველი ოცნება განეხორციელებინა.

ფინელის პილოტის დებიუტი რალის მსოფლიო ჩემპიონატზე ამ კვირის ბოლოს შედგება, როდესაც ის და მისი ნავიგატორი კაი ლინდსტრიომი მსოფლიო ჩემპიონატის პირველ ეტაპზე, შვედეთის რალიზე იასპარეზებენ. სხვათა შორის, სადებიუტო რბოლის წინ, რაიკონენმა მსოფლიოს ექვსგზის ჩემპიონთან, ფრანგ სებასტიან ლოებთან ერთად ივარჯიშა. ვარჯიშის დროს, ფინელს დიდი ჩემპიონის ნავიგატორის სავარძელი ეკავა.

დი მონტეძემოლო ფრთხილობს

Di Montezemolo shares team's caution

6 თებერვალი

”ფერარის” პრეზიდენტი ლუკა დი მონტეძემოლო ზედმეტ ოპტიმიზმს არ ავლენს, როდესაც თავისი გუნდის შანსებზე ლაპარაკობს და ხაზს უსვამს, რომ ვალენსიური ტესტების შედეგებით ძნელია იმის თქმა, თუ რომელ გუნდს რა შანსი ექნება წლევანდელ ჩემპიონატში.

ვალენსიაში ყველაზე სწრაფები ფერნანდო ალონსო და ფელიპე მასა იყვნენ, თუმცა ამის მიუხედავად, სამდღიანი ვარჯიშების შემდეგ, ”სკუდერიას” ხელმძღვანელობა აცხადებს, რომ ჯერჯერობით, შორსმიმავალი დასკვნების გაკეთება ნაადრევია და შესაძლოა, სეზონის დაწყებამდე ბევრი რამ შეიცვალოს. იგივე აზრს დი მონტეძემოლოც იზიარებს.

”ძალიან კმაყოფილი ვარ იმით, რომ ჩვენი მანქანა პირველივე ვარჯიშებზე ყველაზე სწრაფი იყო. მაგრამ სეზონისწინა ტესტები იგივეა, რაც ფეხბურთი აგვისტოში. ჯერჯერობით, პირველი პოზიტიური მომენტი ისაა, რომ F10 სწრაფია. მაგრამ ეს ჯერ არაფერს ნიშნავს. არაერთი პრობლემა გადასაწყვეტი გვაქვს. მთავარია, რეალისტები ვიყოთ. ჩვენ არ ვიცით, რამდენი საწვავი ესხათ ჩვენს მეტოქეებს და რამდენად კონკურენტუნარიანები იქნებიან ისინი პირველ რბოლაში. ალონსოს და მასას შედეგები ჯერ მხოლოდ იმედის სიგნალს გვაძლევს, თუმცა უმჯობესი იქნება, თუ დასკვნების გაკეთებას არ ვიჩქარებთ”, - ”გაძეტა დელო სპორტთან” საუბრისას განაცხადა დი მონტეძემოლომ (სურათზე, ალონსოსა და მასას შორის).

მისი აზრით, მომავალ სეზონში, ”ფერარის” მინიმუმ სამი ძლიერი კონკურენტი ეყოლება: ”ვფიქრობ, ჩვენი მთავარი მეტოქეები ”მერსედესი”, ”რედ ბული” და ”მაკლარენი” იქნებიან. ”მერსედესს” საუკეთესო ძრავი აქვს, რომლის ყიდვაც ყველას სურს. ”რედ ბულს” გასული სეზონის ბოლოს დიდი უპირატესობა ჰქონდა, რომელსაც აუცილებლად განავითარებს. ”მაკლარენი” კი ყოველთვის ძლიერია”.

ჰორნერი: ფორმულა 1-მა შეიძლება კიდევ ერთი ავტომწარმოებელი დაკარგოს

F1 risks losing another manufacturer – Horner

6 თებერვალი

”რედ ბულ რეისინგის” შეფი ქრისტიან ჰორნერი თვლის, რომ ფორმულა 1 კიდევ ერთ ავტომწარმოებელს დაკარგავს, თუ ჩემპიონატის ხელმძღვანელობა არ ეცდება ძრავების გაყინვის რეგლამენტის დაცვას, რაც იმას გულისხმობს, რომ 2012 წლამდე ძრავების სრულყოფა იკრძალება.

ამ წესის მიუხედავად, გასული წლის დაწყებამდე, ”მერსედეს ბენცმა” საკუთარი ძრავის სრულყოფა შეძლო, რისი წყალობითაც, გერმანული კომპანიის აგრეგატები, ჩემპიონატში მონაწილეთაგან ყველაზე მძლავრია და შესაბამისად, მისით მოსარგებლე გუნდები, დიდი უპირატესობით სარგებლობენ.

თუმცა, ისიც ფაქტია, რომ ”რენოს” ძრავები, რომლებითაც ”რედ ბული” სარგებლობს, სხვა კომპანიების აგრეგატებთან შედარებით, საწვავის ეკონომიური ხარჯვით გამოირჩევა. ეს კი, იმ პირობებში, როცა ახალი სეზონიდან, რბოლისას პილოტებს საწვავის შევსება ეკრძალებათ, სერიოზული უპირატესობაა - ამ ძრავებით მოასპარეზე მანქანები სტარტზე შედარებით ნაკლები საწვავით გასვლას შეძლებენ, რაც სიმძლავრის დეფიციტს ნაწილობრივ (თუ სულ არა) გააბათილებს.

საერთაშორისო საავტომობილო ფედერაციას (FIA) ზოგიერთმა გუნდმა შესთავაზა, რომ შედარებით სუსტი ძრავების მწარმოებლებისთვის, აგრეგატების სრულყოფის საშუალება მიეცათ, რათა ისინი ლიდერებს დასწეოდნენ, მაგრამ FIA-მ რატომღაც მათ ძრავების დეფორსირება შესთავაზა, რასაც გუნდების დუმილი მოჰყვა.

ფორმულა 1-დან ”ჰონდას”, ”ტოიოტას” და ”ბეემვეს” წასვლის შემდეგ, დიდი პრიზების ცირკს ძრავების სულ ოთხი მწარმოებელი (ფერარი, მერსედესი, რენო და კოსუორტი) შემორჩა.

”საშინელება იქნება, თუ სეზონის ბოლოს, ძრავების კიდევ ერთ მწარმოებელს დავკარგავთ. ამის მიზეზი კი ის იქნება, რომ ყველას არ აქვს მოწინავეებთან კონკურენციის საშუალება. შასის რეგლამენტი იმდენად მკაცრია, რომ ძრავებს ჩვენს სპორტში კიდევ უფრო დიდი მნიშვნელობა ენიჭება”, - მიაჩნია ჰორნერს.

ლოებმა რაიკონენი გაასეირნა

Loeb-Raikkonen

6 თებერვალი

ერთ კვირაში რალის მსოფლიოს ჩემპიონატი აიღებს სტარტს. მისი მონაწილენი პირველი რბოლისთვის, რომელიც შვედეთში გაიმართება, მონდომებით ემზადებიან. მათ შორისაა ფორმულა 1-ის 2007 წლის მსოფლიო ჩემპიონი, ფინელი კიმი რაიკონენი (სურათზე).

ერთ-ერთი ვარჯიშის დროს, ტრასაზე ის თვით მსოფლიოს ექვსგზის ჩემპიონმა, ფრანგმა სებასტიან ლოებმა გაასეირნა. ამ გასეირნების დროს კი რაიკონენს დიდი ჩემპიონის ნავიგატორის სავარძელი ეკავა.

რა თქმა უნდა, ჟურნალისტები დაინტერესდნენ ამ უცნაური ვარჯიშით და ლოებს ჰკითხეს, მისი ხომ არ შეშინდა, რაზეც ფრანგმა ხუმრობით უპასუხა: ”რა თქმა უნდა, ის შეშინდა, რადგან მე ძალიან ნელა ვმოძრაობდი”.

რაიკონენი და ლოები ”სიტროენში” თანაგუნდელები არიან და ბუნებრივია, ფრანგი მრბოლის რჩევები და რალის ავტომობილის მართვის გამოცდილება, აისმენს დიდად წაადგება. ვარჯიშის შემდეგ, მათ ერთმანეთს შთაბეჭდილებები გაუზიარეს.

”როდესაც ისეთი დონის მრბოლს, როგორიც სებასტიან ლოებია, ნავიგატორის სავარძელში უზიხარ, ბევრის სწავლა შეიძლება”, - მიაჩნია რაიკონენის ნავიგატორ კაი ლინდსტრიომს.

ბატონი პროგნოზებს მომავლისთვის იტოვებს

Button reserves judgement on new McLaren

5 თებერვალი

ფორმულა 1-ის მსოფლიო ჩემპიონი, ბრიტანელი ჯენსონ ბატონი თავისი ახალი გუნდის, ”მაკლარენის” ახალი MP4-25-ის საჭეს პირველად ოთხშაბათს მიუჯდა და ვალენსიას გარეუბან კესტეში მდებარე, რიკარდო ტორმოს სახელობის ავტოდრომზე 82 წრის გავლის შემდეგ განაცხადა, რომ ჯერჯერობით ნაადრევია იმაზე ლაპარაკი, მისცემს თუ არა ეს მანქანა ტიტულის დასაცავად ბრძოლის საშუალებას.

ბატონმა თავის პირველ ვარჯიშზე მეხუთე დრო აჩვენა და განაცხადა, რომ ეს მისთვის საკმაოდ ძნელი დღე იყო, რადგან მანქანას თავიდანვე ვერ მოერგო და მთელი დღე იმას მოანდომა, რომ კოკპიტში თავი კომფორტულად ეგრძნო.

”კარგი იქნებოდა, ტრასაზე მეტი დრო გამეტარებინა, მაგრამ ამის საშუალება არ მომეცა. დიდი ხანი მოვუნდი, სანამ მანქანას მოვირგებდი და მასში თავს კომფორტულად ვიგრძნობდი. კოკპიტი ჩემთვის მეტისმეტად პატარა აღმოჩნდა. თავი ძალიან მაღლა მქონდა და საშინელ დისკომფორტს ვგრძნობდი. ვარჯიშის დროს ბევრი რამ შევცვალეთ და ახლა ყველაფერი რიგზეა, კომფორტიც ვიგრძენი და ტესტების ბოლოს, უფრო თავდაჯერებულიც ვიყავი”, - განაცხადა 30 წლის ბატონმა, ვინც ტესტებისთვის მზადებას შუადღის 1 საათამდე მოუნდა.

გასული სეზონის ტესტების შემდეგ, ბატონი დარწმუნებული იყო, რომ მისი მანქანა (ბრაუნი), რომელსაც მოგვიანებით ”მონსტრიც” კი უწოდა, ჩემპიონობისთვის ბრძოლის საშუალებას მისცემდა. მართლაც, მან სეზონის პირველი შვიდი რბოლიდან ექვსი მოიგო და ამან ტიტულის მოპოვების საშუალება მისცა. მაგრამ ამჯერად ის ასე თავდაჯერებული ვერ იყო:

”ახლა პროგნოზების გაკეთება ნაადრევია, რადგან ამ ტრასაზე ძნელია იმის მიხვედრა, თუ რამდენად კარგია მანქანა. ამ ტრასას ვერცერთ სხვას ვერ შევადარებ, რადგან მანქანას სრულიად განსხვავებული ბალანსი აქვს”, - დასძენს ბატონი, ვინც დღის უსწრაფეს პილოტს, ”ფერარის” ესპანელ ფერნანდო ალონსოს წრეზე საკმაოდ ბევრით ჩამორჩებოდა, თუმცა ეს გარემოება მას სრულებით არ აშინებს.

”შეგვიძლია ვთქვათ, რომ ”ფერარი” ძალიან სწრაფია, მაგრამ არ ვიცით, რამდენად სწრაფი. თუმცა, აშკარად კონკურენტუნარიანები იქნებიან, რადგან ასეთ დროები სხვა შემთხვევაში არ ექნებოდათ. არც ის ვიცით, რამდენი საწვავი ესხათ ავზებში, როდესაც ამ დროს აჩვენებდნენ. თუმცა, როდესაც ტრასაზე სავსე ავზებით იყვნენ და შედარებით უარესი დრო ჰქონდათ, მაინც კარგად გამოიყურებოდნენ. და მაინც, ჯერ ადრეა იმაზე ლაპარაკი, ვინაა სწრაფი და ვინ - არა. თანაც, პირველ რბოლამდე მანქანები საგრძნობლად შეიცვლება. ასე რომ, პროგნოზები ჯერ ნაადრევია”.

ცნობისათვის, ბატონთან ერთად, ვარჯიშზე მსოფლიოს შვიდგზის ჩემპიონი, გერმანელი მიხაელ შუმახერიც იყო, რომელმაც მესამე საუკეთესო დრო დააფიქსირა. ბატონი მოხარულია, რომ კვლავ დიდი ჩემპიონის წინააღმდეგ ასპარეზობა მოუწევს და რაც მთავარია, ძალიან საინტერესო სეზონის მოლოდინშია.

როსის მოტო GP ურჩევნია

Bigger engines may keep me in MotoGP, says Rossi

5 თებერვალი

მსოფლიოს ცხრაგზის ჩემპიონი წრიულ მოტორბოლებში, იტალიელი ვალენტინო როსი აცხადებს, რომ თუ ტექნიკური რეგლამენტი მოტო GP-ის ჩემპიონატში უფრო მძლავრ ძრავებს დაუშვებს, მაშინ ის 2012 წლის შემდეგაც გააგრძელებს მსოფლიო ჩემპიონატში მონაწილეობას. მისი გუნდის, ”იამაჰას” მიერ გამოქვეყნებულ ინტერვიუში, მანვე დასძინა, რომ ეჭვი ეპარება, ოდესმე ფორმულა 1-ში გადავიდეს.

”თეორიულად, მე აქ თავს ბედნიერად ვგრძნობ, რადგან 1000 კუბიანი ძრავები 800-იანზე გაცილებით მძლავრი და უკეთესია. მძლავრი ბაიკების მართვა სიამოვნებას მანიჭებს. ვნახოთ, როგორ ტექნიკურ რეგლამენტს შემოიღებენ ასეთი ძრავებისთვის. ვნახოთ, ამ ძრავებით ბაიკები ისეთივე სწრაფები იქნება, როგორც 2006 წელს, თუ არა. ნებისმიერ შემთხვევაში, 1000 კუბიან ძრავებზე დაბრუნება მახარებს. არაა გამორიცხული, რომ ამის გამო, მოტო GP-ში უფრო დიდხანსაც დავრჩე”, - ამბობს როსი.

სამაგიეროდ, იტალიელს არ მოსწონს ახალი რეგლამენტი, რომელიც ძალაში ახალი სეზონიდან შევა და რომლის მიხედვითაც, გუნდებს თითო მანქანაზე, ერთ სეზონში 6 ძრავზე მეტის გამოყენება ეკრძალებათ. ეს კი იმის გამო ხდება, რომ შემცირდეს გუნდების ბიუჯეტები.

”ვფიქრობ, ეს ყველა გუნდისთვის ძნელად შესასრულებელი წესი იქნება, რადგან სეზონზე მხოლოდ ექვსი ძრავი ძალიან ცოტაა. ეს რიცხვი 8-მდე ან 10-მდე რომ გაიზარდოს, გაცილებით უკეთესი იქნება”, - დასძენს 30 წლის როსი, რომელმაც ცოტა ხნის წინ, ბარსელონაში, ”ფერარის” ფორმულა 1-ის მანქანის საჩვენებელ ტესტირებაში მიიღო მონაწილეობა და საკმაოდ კარგი შედეგები აჩვენა. ეს ”სკუდერიას” მანქანით მისი მე-6 ტესტი იყო.

როსის ”იამაჰასთან” კონტრაქტი ამ სეზონის ბოლოს უმთავრდება და ბევრი მოელის, რომ ის ამის შემდეგ, მოტორბოლებს რალიზე გაცვლის. თუმცა თავად ზუსტ პასუხს, რა თქმა უნდა არ იძლევა და ამბობს, რომ თავის სამომავლო გეგმებზე უფრო ნათელი წარმოდგენა ამ ახალი სეზონის შუაში ექნება.

”ახლახანს, ბარსელონაში ”ფერარისთან” ერთად ვივარჯიშე და ძალიან კმაყოფილი დავრჩი. ვისიამოვნე კიდეც და თან, კარგი შედეგებიც მქონდა, მაგრამ ვფიქრობ, ფორმულა 1-ის ჩემპიონატში ვერასდროს მნახავთ. ”იამაჰაში” თავს ძალიან კარგად ვგრძნობ და პირველ რიგში, რა თქმა უნდა, მათ დაველაპარაკები. შემდეგ კი ვნახოთ”, - ამბობს როსი.

”ვირჯინ რეისინგი” - პირველი ახალბედებს შორის

Virgin reveals its VR-01 F1 contender

4 თებერვალი

მარცხნიდან: ტიმო გლოკი, ლუკას დი გრასი და პორტუგალიელი ტესტ პილოტი ალვარო პარენტე

................................

ფორმულა 1-ის ახალი გუნდებიდან ”ვირჯინ რეისინგი” პირველია, რომელმაც თავისი პირველი ბოლიდის, VR-01-ის პრეზენტაცია ჩაატარა. ავტომობილს, რომელიც კომპანია ”უირტ რისერჩმა” კომპიუტერით დააპროექტა და აეროდინამიკური სრულყოფაც კომპიუტერული ტექნიკით ჩაუტარა, ვირტუალუ სამყაროში, ინტერნეტით ჩაუტარდა პრეზენტაცია.

პრეზენტაცია დილით უნდა გამართულიყო, მაგრამ ტექნიკური პრობლემების გამო, გუნდი იძულებული შეიქნა, პრეზენტაციის მასალები საკუთარ ვებ-გვერდზე გამოექვეყნებინა.

”შესანიშნავი მანქანაა! ნიკმა (უირტი, მანქანის მთავარი კონსტრუქტორი) და მისმა თანამშრომლებმა შესანიშნავად იმუშავეს და მათი გარჯის შედეგი ყურადღებას იმსახურებს. ამ პროექტში მონაწილეობა და მანქანის შექმნის პროცესზე დაკვირვება ძალიან საინტერესო იყო. ახლა ტსტების დროა და ძალიან გვაინტერესებს, რამდენად სწრაფი იქნება ეს მანქანა ტრასაზე. დღეს კი ჩვენ პირველი ნაბიჯი გადავდგით”, - განაცხადა გუნდის მეპატრონემ, ბრიტანელმა მილიარდერმა სერ რიჩარდ ბრენსონმა.

”ვირჯინ რეისინგმა” თავისი ფორმულა 1-ის პროექტი დეკემბერში წარადგინა და მაშინვე თავისი პილოტების ვინაობა დაასახელა - მისი მანქანების საჭეს გერმანელი ტიმო გლოკი და ბრაზილიელი ლუკას დი გრასი მიუჯდებიან. გუნდი პირველ ტესტებს სილვერსტოუნზე ჩაატარებს, რის შემდეგაც, ხერესს (სამხრეთ ესპანეთი) მიაშურებს და სხვა გუნდებთან ერთად, წინასასეზონო ტესტებს შეუდგება.

”ჩვენ სერიოზული სარბოლი გუნდი ვართ, რომელსაც სერიოზული ამბიციები გააჩნია. თუმცა სირბილს მანამ არ დავიწყებთ, სანამ სიარულს ვისწავლით. პირველ რიგში, ჩვენთვის მნიშვნელოვანი ის იქნება, რომ მანქანის საიმედოობას, ეფექტურობას და უსაფრთხოებას მივაღწიოთ. რაც მთავარია, ჩვენ ახალბედებს შორის საუკეთესოები უნდა გავხდეთ. შემდეგ კი მანქანის გაუმჯობესების დრო დადგება და ამისთვის ისევ კომპიუტერს გამოვიყენებთ”, - ამბობს უირტი.

”სიტროენი” ლოების შვიდ გამარჯვებას უმიზნებს

Citroen targets seven wins for Loeb

3 თებერვალი

”სიტროენის” რალის გუნდის შეფი ოლივიე ქესნელი იმედოვნებს, რომ მისი გუნდი წლევანდელ სეზონსაც დუბლით დაასრულებს - პილოტების ჩემპიონატსა და კონსტრუქტორთა თასს მოიგებს, მისი პირველი პილოტი სებასტიან ლოები კი მეშვიდე ტიტულს დაეუფლება. ამასთან, ის დასძენს, რომ სეზონის 13 რბოლიდან, ლოები შვიდის მოგებას მაინც შეძლებს.

”ამ სეზონისთვის არაფერი შეცვლილა. რა თქმა უნდა, ჩვენი მიზანი ტიტულებია. სებასტიანს კი მიზნად შვიდი გამარჯვება დავუსახეთ”, - განაცხადა ქესნელმა.

გასულ სეზონში, ლოებმა სწორედ 7 ეტაპის მოგება შეძლო. არადა, 2008 წელს მან ტიტული 11 გამარჯვებით მოიპოვა. თავად ლოებიც აცხადებს, რომ მისი მიზანი კვლავ უცვლელია და ამ სეზონში მეშვიდე ტიტულისთვის იბრძოლებს.

”რახან ისევ აქ ვარ, ეს იმას ნიშნავს, რომ გამარჯვებები ჯერაც არ მომბეზრებია. მომწონს, რასაც ვაკეთებ. მინდა, გავიმარჯვო და ამისათვის თავს არ დავზოგავ. შარშან, მიკო ჰირვონენთან ბრძოლამ დიდი სიამოვნება მომიტანა. რა თქმა უნდა, ტიტულის დათმობას არ ვაპირებ, მაგრამ მიკო ძალიან მოტივირებულია და ვფიქრობ, ამჯერად მისი დამარცხება კიდევ უფრო ძნელი იქნება”, - ამბობს ლოები, ვინც გასულ სეზონში ფინელ პილოტს ერთადერთი ქულით აჯობა.

თვის მხრივ, ჰირვონენი აცხადებს, რომ ახალ სეზონში ის ლოებს კიდევ უფრო ძლიერ წინააღმდეგობას გაუწევს: ”გასული სეზონის შემდეგ, გამარჯვებაზე კიდევ უფრო მოწყურებული ვარ და ეს საბრძოლველად განმაწყობს. ახლა ადვილია უკან გახედვა და იმაზე ლაპარაკი, თუ რა უნდა გვექნა, რომ ტიტული მოგვეპოვებინა. მაგრამ ეს უკვე წარსულში დარჩა და ვერაფერს შევცლით. სამაგიეროდ, ამ სეზონში უფრო ძლიერები ვიქნებით”.

ქესნელი კი დასძენს, რომ მართალია, ლოებს რბოლების ნახევარზე მეტში გამარჯვებას უგეგმავს, თუმცა არანაკლებ ძლიერ სურს, რომ გუნდის მეორე პილოტმა, ესპანელმა დანიელ სორდომ, თავის კარიერაში, მსოფლიო ჩემპიონატზე პირველი გამარჯვება მოიპოვოს.

ჰამილტონი მანქანით კმაყოფილია

Hamilton says new McLaren a big improvement on 2009

3 თებერვალი

ვალენსიაში ჩატარებული პირველი ტესტის შემდეგ, ლუის ჰამილტონმა განაცხადა, რომ შარშანდელი და ახალი მანქანები ისე განსხვავდება ერთმანეთისგან, როგორც დღე და ღამე.

მსოფლიოს 2008 წლის ჩემპიონმა, ახალი მანქანით, ვალენსიას რიკარდო ტორმოს სახელობის ტრასაზე 108 წრე გაიარა და მესამე უსწრაფესი დრო აჩვენა, თუმცა წინასასეზონო ტესტების დროს ნაჩვენებ შედეგს დიდი მნიშვნელობა არ აქვს. მთავარია, რომ მას MP4-25 მოეწონა. დღის უსწრაფესი შედეგები კი ”ფერარის” ბრაზილიელმა ფელიპე მასამ და ”ზაუბერის” იაპონელმა კამუი კობაიაშიმ აჩვენეს.

”როგორც იქნა, ღიმილის ხასიათზე დავდექი. ყველა პრობლემა, რომლებიც შარშანდელ მანქანასთან მქონდა, ახალმა დამავიწყა. თუმცა ჯერაც ბევრია სამუშაო და არსებობს მანქანის კიდევ უფრო გაუმჯობესების პოტენციალი”, - ამბობს ჰამილტონი.

შარშან, სეზონის წინ, ”მაკლარენმა” ახალი მანქანა პირველად პორტუგალიის პორტიმაუში გასინჯა და მაშინვე გამოვლინდა, რომ ის ისეთი ვერ იყო, როგორიც ჩემპიონობისთვის საბრძოლველად გამოდგებოდა. გუნდს ნახევარი სეზონი დასჭირდა იმისათვის, რომ კონკურენტუნარიანი გამხდარიყო და მართალია, ჰამილტონმა რამდენიმე რბოლის მოგება შეძლო, თუმცა სეზონის ბოლომდე, მანქანის სათანადოდ დახვეწა მაინც ვერ მოხერხდა.

”იმედია, მანქანას ყველა ის ვირუსი მოვაშორეთ, რომლებიც მას შარშან ჰქონდა. ახლა მისი დახვეწის დროა და მჯერა, რომ ისეთივე შედეგები გვექნება, როგორიც გასული სეზონის მიწურულს გვქონდა. დღევანდელმა ტესტებმა მაჩვენა, რომ ბევრი რამ გავაუმჯობესეტ”, - განაცხადა ჰამილტონმა, ვისაც სულ არ აღელვებს ის ფაქტი, რომ ვალენსიაში მასა მასზე ნახევარი წამით სწრაფი იყო.

”აშკარაა, რომ ”ფერარი” ძალიან სწრაფია, მაგრამ არავინ იცის, ავზებში რამდენი საწვავი უსხიათ. მთავარია, რომ ბოლოში არ ვართ, რაც სასიამოვნოდ განმაწყობს. ამასთან, მას არც ორი-სამი წამით ჩამოვრჩენილვარ. ამ ეტაპზე, ყველაზე ძლიერ იმ ფაქტმა გამახარა, რომ მანქანა საიმედო, გამძლეა. ტექნიკური პრობლემები პრაქტიკულად არ გვქონია და ამ ეტაპზე, ყველაზე მთავარი ესაა”, - აგრძელებს ჰამილტონი და დასძენს, რომ ყველაფრის მიუხედავად, ჯერ ნაადრევია იმაზე ლაპარაკი, თუ სხვებთან შედარებით, რამდენად კარგია ახალი მანქანა, თუმცა მთავარი ისაა, რომ ის ტრასაზე მანქანის მოქცევით კმაყოფილია.

დღეს ჰამილტონს ტრასაზე მისი ახალი თანაგუნდელი, მსოფლიოს მოქმედი ჩემპიონი ჯენსონ ბატონი შეენაცვლება, რომელთან ერთადაც, ტრასაზე მიხაელ შუმახერიც გამოვა. ჰამილტონს კი ხერესის ტესტებამდე, მსოფლიოს შვიდგზის ჩემპიონთან ერთად ტრასაზე ყოფნის საშუალება არ მიეცემა.

შუმახერმა ”მერსედესის” W01 პირველად ორშაბათს გასინჯა და მესამე უსწრაფესი შედეგი აჩვენა. ტესტების მეორე დღეს მან ფიზიკურ ვარჯიშს დაუთმო, დღეს კი კვლავ ტრასაზე იქნება.

გუნდებმა ახალი ბოლიდები ვალენსიასი გამოაგორეს

Mercedes rolls out new car at Valencia

1 თებერვალი

რუბენს ბარიკელო უილიამს FW32-ის საჭესთან

...............................................

ვალენსიაში, რიკარდო ტორმოს სახელობის ავტოდრომზე, ფორმულა 1-ის გუნდებმა წინასასეზონო ტესტები დაიწყეს და რამდენიმე მათგანმა - ”მერსედეს GP-მ”, ”ტორო როსომ” და ”უილიამსმა”, თავისი სარბოლი ავტომობილი საზოგადოების წინაშე პირველად გამოაგორა. ამათგან, ”უილიამსმა” პრეზენტაციისგან თავის შეკავება არჩია, ”მერსედეს GP-მ” და ”ტორო როსომ” კი სახელდახელო წარდგენები ჩაატარეს.

როსბერგი პირველი მიუჯდა W01-ის საჭეს

................................................................

მერსედეს GP

გუნდმა ერთი კვირის წინ, თავისი მანქანის ფერები შარშანდელ მანქანაზე წარადგინა, ვალენსიაში კი საბრძოლო მანქანა - W01 გამოაგორა, რომლიც პირველმა ტრასაზე ნიკო როსბერგმა გაიყვანა.

ახალ მანქანას წინასგან მისი კეხიანი ცხვირი გამოარჩევს - როგორც ეტყობა, ასეთი მოყვანილობით, სხვა გუნდები ”რედ ბულის” მეტად წარმატებულ RB5-ს ბაძავენ, რომელიც ედრიან ნიუის მიერაა შექმნილი. ძრავის გარსაცმზე კი მცირე აეროდინამიკური ტორსია დამაგრებული, რომლის უკანა ნაწილიც წამახვილებულია. შედარებისთვის, ანალოგიური ელემენტი ”რენოს” გაცილებით დიდი აქვს, ”მაკლარენზე” კი ის უკანა ანტიფრთამდე გრძელდება.

ალგერსუარი და ბუემი STR5-ის წარდგენისას

..........................................................................

ტორო როსო

ამ გუნდმა ფორმულა 1-ში უკვე ოთხი სეზონი გაატარა, თუმცა საკუთარი კონსტრუქციის ავტომობილი პირველად შექმნა - აქამდე ის ნათესავი ”რედ ბულის” შასის იყენებდა. გუნდის შეფი ფრანც ტოსტი ამბობს, რომ ეს ავტომობილი მისმა გუნდმა მთლიანად საკუთარი ძალებით შექმნა, რისთვისაც თანამშრომელთა შტატის 80-ით გაზრდა გახდა საჭირო. ასევე მნიშვნელოვნად გაიზარდა საწარმოს ფართობი. ”ტორო როსომ” ”რედ ბულისგან” ბისტერში მდებარე აეროდინამიკური მილიც შეიძინა. ტოსტი ამბობს, რომ ”ტორო როსო” ახალ სეზონში, კონსტრუქტორთა პირველობაზე მოწინავე რვა გუნდს შორის მოხვედრას გეგმავს.

გუნდის ტექნიკური დირექტორი ჯორჯო ასკანელი ამბობს, რომ STR5-ის შექმნისას, კონსტრუირების კონსერვატიული მეთოდი გამოიყენეს და საფუძვლად შარშანდელი მოდელი აირჩიეს. ამასთან მნიშვნელოვნად შეიცვალა ავტომობილის უკანა ნაწილი, რომელიც ორმაგი დიფუზორის პარამეტრების შესაბამისად დაპროექტდა.

ასკანელის თქმით, გუნდისთვის ნამდვილი გამოწვევა გახდა ახალი შტატისთვის სამუშაო ადგილების ეფექტურად ორგანიზება, რასაც გუნდის მუშაობის პროცესში უდიდესი მნიშვნელობა აქვს.

”ტორო როსომ” პილოტების შემადგენლობა შეინარჩუნა - მისი მანქანების საჭეს შვეიცარელი სებასტიან ბუემი და ესპანელი ხაიმე ალგერსუარი მიუჯდებიან.

”რენო” ძველ ფერებში გამოეწყო

Renault goes back to past for new colors

1 თებერვალი

მარცხნიდან: ვიტალი პეტროვი და რობერტ კუბიცა R-30-ის პრეზენტაციაზე

...................................

”რენოს” ფორმულა 1-ის გუნდმა, თავისი ახალი ბოლიდის - R-30-ის პრეზენტაცია ვალენსიაში, რიკარდო ტორმოს სახელობის ავტოდრომზე ჩაატარა. მანქანა ფრანგული გუნდის ძველ, იმ ფერებშია გამოწყობილი, რომლითაც ის 1977-1985 წლებში ასპარეზობდა. პრეზენტაციაზე ”რენომ” თავისი მეორე პილოტის ვინაობაც დაასახელა - ესაა რუსი ვიტალი პეტროვი, რომელმაც შარშან, GP2-ის ჩემპიონატი მეორე ადგილზე დაასრულა.

”ძალიან გვინდოდა, რაღაც ისეთს დავბრუნებოდით, რაც წარსულთანაა დაკავშირებული. ამას ისტორიასთან დაბრუნებას დავარქმევდი”, - განაცხადა გუნდის მფლობელმა (გუნდი მხოლოდ ნაწილობრივ ეკუთვნის რენოს) ჟერარ ლოპესმა.

დღეს ჩვენ გუნდის ისტორიაში ახალ ფურცელს გადავშლით. დიდი გამოწვევის წინაშე ვდგავართ, რაც ჩვენგან დიდ გარჯას მოითხოვს. მიზანი მოწინავეებს შორის ყოფნაა და ჩვენ პოდიუმებისთვის ბრძოლას ვაპირებთ”, - ამბობს გუნდის შეფი ერიკ ბულიე, რომელმაც ამ პოსტზე დისკვალიფიცირებული ფლავიო ბრიატორე შეცვალა.

მაღალი ადგილებისთვის ბრძოლის იმედი აქვს გუნდის პოლონელ პილოტ რობერტ კუბიცას, რომელიც აქ ”ბეემვე ზაუბერიდან” გადმოვიდა: ”ვიმედოვნებ, ამ გუნდთან ერთად, მაღალი ადგილებისთვის ბრძოლის საშუალება მექნება. რა თქმა უნდა, დროა საჭირო იმისათვის, რომ ძირეულად განახლებული გუნდი კონკურენტუნარიანი გახდეს. არ ვიცი, ეს რამდენ ხანს გაგრძელდება. 100 პროცენტით დარწმუნებული ვერასდროს იქნები იმაში, რომ მიზანს მიაღწევ”, - ამბობს კუბიცა, ვისაც შარშან, ”ბეემვე ზაუბერის” არაკონკურენტუნარიანი მანქანით ასპარეზობა უწევდა.

რაც შეეხება პეტროვის მიწვევას, აშკარაა, რომ ამ სვლით, ”რენოს” რუსული კომპანიების სპონსორებად მიზიდვის იმედი აქვს. თავად პეტროვიც იმედოვნებს, რომ მისი სახელი ფორმულა 1-ში სპონსორებად რუსულ კომპანიებს მოიყვანს. უფრო მეტიც, ”რენომ” მესამე პილოტის მონოპოსტი ჩინელ ჰო-პინ ტუნს ჩააბარა, რაც ასევე პოტენციური სპონსორებისთვის გათვლილი სატყუარაა.

ლოპესი ამბობს, რომ გუნდის ბიუჯეტის 83 პროცენტი გარანტირებულია და რომ დარჩენილ თანხას სპონსორები მოიტანენ. ამასთან, დასძენს, რომ მანქანების შეფერილობა აუცილებლად შეიცვლება, თუ საჯინიბოს ტიტულოვანი სპონსორი გამოუჩნდება.