formula 1

ბატონი ”ბრაუნთან” მოლაპარაკებას აგრძელებს
Jenson Button
15 ნოემბერიამ დღეებში, ბრიტანულ პრესაში დიდი აჟიოტაჟი გამოიწვია მსოფლიოს ახალი ჩემპიონის, ჯენსონ ბატონის სტუმრობამ ”მაკლარენის” ფაბრიკაში. ბევრმა იჩქარა და უკვე იმაზე დაიწყო ლაპარაკი, რომ მერმის ბატონს ”მაკლარენში” ვიხილავთ. თუმცა, არსებობს საფუძველი იმისა, რომ ვივარაუდოთ - ჩემპიონი სხვა გუნდს იმისათვის სტუმრობს, რომ როს ბრაუნი ხელფასის გაზრდაზე დაიყოლიოს.
ეს ვარაუდი ლონდონურ გაზეთ ”ნიუს ოფ დი უორლდში” გამოქვეყნებულ სტატიაშიც გამოითქვა, რომელშიც ბატონის მენეჯერ რიჩარდ გოდარდის გამონათქვამებია მოყვანილი. გაზეთის ინფორმაციით, ჩემპიონს ”ბრაუნში” დარჩენა სურს, მაგრამ გუნდთან კონტრაქტის გაფორმებას არ ჩქარობს. მას სურს, რომ მერმის ხელფასის სახით 8 მილიონი გირვანქა სტერლინგი მიიღოს. ეს მის წლევანდელ ხელფასზე 5 მილიონით მეტია. გაზეთი ვარაუდობს, რომ ჩემპიონი 7 მილიონსაც დაყაბულდება და საცარაუდოდ, ”ბრაუნთან” ახალ კონტრაქტს ორ კვირაში გააფორმებს.
გოდარდი ამბობს, რომ მის პროტეჟესა და ”ბრაუნს” შორის ურთიერთობის გაციებაზე ლაპარაკიც არაა. უბრალოდ, მხარეებს შორის მოლაპარაკება ჯერაც არ დასრულებულა..
”ჯენსონი როს ბრაუნს დიდ პატივს სცემს და მის გუნდში დარჩენის სურვილი აქვს. მათ შორის მოლაპარაკება გრძელდება. ვფიქრობ, ორ კვირაში ყველაფერი მოგვარდება”, - ამბობს გოდარდი და იქვე დასძენს, რომ ბატონს სულაც არ ეშინია იმისა, რომ ”მაკლარენში” გადასვლის შემთხვევაში, მისი თანაგუნდელი ლუის ჰამილტონი იქნება. ამ გუნდში მისი ამასწინდელი ვიზიტი კი იმის გამო შედგა, რომ იქ გუნდის შეფმა მარტინ უიტმარშმა მიიწვია.
”ხშირი არაა დღეები, როდესაც ”ფერარიდან” და ”მაკლარენიდან” გირეკავენ და სტუმრად გიწვევენ. ესეც რომ არა, ჯენსონისთვის პრობლემა სულაც არ იქნება, თუ მისი თანაგუნდელი ჰამილტონი იქნება. მას შეუძლია ამ გამოწვევაზე დათანხმება, თუ ეცოდინება, რომ მანქანის მოდერნიზაცია მისი მოთხოვნების შესაბამისად ჩატარდება. უოკინგში ნანახით ჯენსონი აღფრთოვანებული დარჩა. ეს საიცარი ადგილია, მაგრამ ის თვლის, რომ მანქანა უბრალო ფარეხშიც შეიძლება დამზადდეს. მთავარია, რომ მისით რბოლების მოგება იყოს შესაძლებელი. მისთვის ახლა მთავარი სწორედ ესაა. მთავარი ფული არაა, თუმცა ისიც უნდა ვიცოდეთ, რომ ავტომრბოლის კარიერა დიდხანს არ გრძელდება”, - დასძენს გოდარდი.
მაგრამ სხვა გაზეთებში იბეჭდება პუბლიკაციები, რომელთა მიხედვითაც, დიდი შანსია იმისა, რომ ბატონი ”ბრაუნს” დატოვებს. კერძოდ, ”მირორის” ინფორმაციის მიხედვით, ”ბრაუნმა” ბატონს ახალი კონტრაქტი შესთავაზა, რომლის მიხედვითაც, ჩემპიონის ხელფასი 3.5 მილიონი გირვანქა სტერლინგი იქნება. იმავე ინფორმაციით, როს ბრაუნი ამაზე მეტი ხელფასის გაცემას არ აპირებს...