”რედ ბული” ვალენსიაში აეროდინამიკურ ჰაერსადინარს გამოიყენებს
Red Bull to use 'important' F-duct in Valencia
19 ივნისი
ფორმულა 1-ის მსოფლიო ჩემპიონატის მორიგ ეტაპზე, ევროპის დიდ პრიზზე, რომელსაც ესპანეთის ქალაქი ვალენსია უმასპინძლებს, ”რედ ბულ რეისინგი” თავისი მთავარი მეტოქის, ”მაკლარენის” გამოგონების - აეროდინამიკური ჰაერსადინარის (სურათზე მისი ელემენტი ჩანს) მისეულ ვერსიას პირველად გამოიყენებს.
ავსტრიული გუნდის გერმანელი პილოტი სებასტიან ფეტელი იმედოვნებს, რომ ეს აეროდინამიკური ელემენტი მას და მის გუნდს, გამარჯვებისთვის ბრძოლის მეტ შანსს მისცემს. ”რედ ბულმა” ეს ელემენტი პირველად თურქული დიდი პრიზის ვარჯიშებზე გამოსცადა, მაგრამ კვალიფიკაციასა და რბოლაში მისი გამოყენება ვერ გარისკა.
არადა, ისტანბულისა და მონრეალის რბოლებისას, სწორი მონაკვეთების გავლისას, აშკარად იგრძნობოდა ”მაკლარენის” უპირატესობა, რასაც მის მანქანებს სწორედ ჰაერსადინარი ანიჭებდა. ვალენსიაში, ქალაქის ტრასაზე, ამ ელემენტს ისეთი მნიშვნელობა არ ექნება, როგორიც თურქეთისა და კანადის ჩქაროსნული რბოლებისას ჰქონდა, თუმცა ”რედ ბულში” თვლიან, რომ მანქანაზე მისი დაყენება მაინც მნიშვნელოვანი იქნება.
”ვალენსიაში ჩვენს მანქანაზე მნიშვნელოვანი სიახლე -აეროდინამიკური ჰაერსადინარი გამოჩნდება. ჩვენი გუნდის ტექნიკური დეპარტამენტის შეფი ედრიან ნიუი კანადაში არ წამოვიდა, რათა ამ სისტემის საბოლოო დამუშავებისა და სრულყოფისთვის მიექცია ყურადღება”, - ამბობს ფეტელი.
No comments:
Post a Comment