formula 1

”რედ ბული” და ”ტორო როსო” დიდ გაცვლას ამზადებენ

11 აპრილი

ინტერნეტით გავრცელდა ცნობა იმის შესსახებ, რომ ”რედ ბულის” და ”ტორო როსოს” ხელმძღვანელობა შეხვედრას და ამ შეხვედრაზე თავიანთი გუნდების სამომავლო გეგმებზე საუბარს გეგმავს. ჯერჯერობით, ამ შეხვედრის ზუსტი თარიღი უცნობია. სავარაუდოდ, ის მაისის ბოლოს ან ივნისის დასაწყისში გაიმართება.

შეხვედრაზე ორი მთავარი საკითხი განიხილება. ერთი პილოტებს ეხება, მეორე კი - ძრავებს. პირველ შემთხვევაში, ავსტრალიელი მარკ უებერის მომავალია გადასაწყვეტი. მას ”რედ ბულტან” კონტრაქტი ამ სეზონის ბოლოს უმთავრდება და არაა გამორიცხული, რომ ”ტორო როსოში” გადასვლა შესთავაზონ. მის ადგილზე კი ორი პილოტის კანდიდატურა განიხილება. მათგან ერთი მსოფლიოს 2007 წლის ჩემპიონი, ფინელი კიმი რაიკონენია, რომელიც ამ სეზონს რალის მსოფლიო ჩემპიონატზე ატარებს. მეორეა გერმანელი ნიკ ჰაიდფელდი, რომელიც დღეს ”მერსედესის” ტესტ და სათადარიგო პილოტია.

რაიკონენის კანდიდატურას ”რედ ბულის” დამაარსებელი და შეფი - დიტრიხ მატეშიცი ემხრობა, ადამიანი, ვისაც ორივე გუნდი ეკუთვნის. მან იმდენი მოახერხა, რომ რალის მსოფლიო ჩემპიონატზე რაიკონენი სწორედ ”რედ ბულის” მეორე გუნდში მოხვდა. ამასთან, ავსტრიულ გუნდში ფინელი პილოტის შესაძლო გადასვლის შესახებ, ინტერნეტსა და პრესაში ცნობები პერიოდულად გაიელვებს ხოლმე.

რაც შეეხება ჰაიდფელდს, მისი გამოჩენა კანდიდატებს შორის ცოტა მოულოდნელია. მითუმეტეს, ის იმ გუნდში მუშაობს, რომელმაც ამ სეზონისთვის, ”რედ ბულს” ძრავების მიწოდებაზე უარი განუცხადა. მაგრამ არაა გამორიცხული, რომ ”მერსედესი” მაინც დათანხმდეს ”წითელი ხარებისთვის” ძრავების მიწოდებაზე და სანაცვლოდ, ფულის გარდა, ჰაიდფელდის დასაქმებაც მოითხოვოს. თუმცა, ამის მიუხედავადაც, ეს ვარიანტი საკმაოდ არარეალურად მოჩანს.

აქტუალურია ძრავების საკითხიც. როგორც ფ1-ის ექსპერტები აცხადებენ, იმის გამო, რომ ”რედ ბულის” მანქანები ”რენოს” ძრავებითაა აღჭურვილი და არა ”ფერარისა”, ისინი წრის გავლას საშუალოდ 0.3 წამით მეტს უნდებიან. დღეს ”რედ ბულის” მანქანა მეტოქეებს აეროდინამიკის ხარჯზე სჯობნის და ძრავის საკითხი იმდენად აქტუალური არაა, მაგრამ ის მაშინვე წინა პლანზე წამოიწევს, როგორც კი მდევრები დაწევას შეძლებენ, რაც სეზონის მეორე ნახევარშია მოსალოდნელი. მოკლედ, არაა გამორიცხული, რომ ორი გუნდის შეფების შეხვედრაზე ძრავების გაცვლაზე შეთანხმდნენ. ამ შემთხვევაში კი მერმისს ”რედ ბულის” ბოლიდები ”ფერარის” ძრავებით აღიჭურვება. სხვათა შორის, ორივე გუნდს, ძრავების მიმწოდებლებთან კონტრაქტები ამ სეზონის ბოლოს დაუმთავრდება.