formula 1

სპას ერთი წრე ფეტელთან ერთად

Belgian GP

26 აგვისტო

სებასტიან ფეტელი ბელგიის შარშანდელ დიდ პრიზზე ასპარეზობისას

..............................

ფორმულა 1-ში ერთთვიანი საზაფხულო არდადეგები დასრულდა. დიდი პრიზების ქარავანი ამჯერად ბელგიის საკურორტო დაბა სპასთან დაბანაკდა, სადაც პილოტები მსოფლიო ჩემპიონატის მე-13 ეტაპზე, ბელგიის დიდ პრიზზე მიიღებენ მონაწილეობას. ტრადიციულად, ყოველ მომდევნო ტრასას, ”რედ ბულ რეისინგის” ავსტრალიელი პილოტი მარკ უებერი გვაცნობდა ხოლმე. მაგრამ ამჯერად მას გერმანელი თანაგუნდელი სებასტიან ფეტელი შეენაცვლება.

სებასტიან ფეტელი: ”სპა ფრანკორშანი ლეგენდარული ტრასაა თავისი ჩქაროსნული მოსახვევებით და არაპროგნოზირებადი ამინდით. ტრასის სიგრძე 7 კილომეტრია და მისი გავლა 44-ჯერ მოგვიწევს, რაც ჯამში დაახლოებით 308 კილომეტრი იქნება. სპაზე 5 სწორი მონაკვეთი, 3 ნელი მოსახვევი და გასწრებისთვის ორი იდეალური ადგილია. მაქსიმალური სიჩქარე კი 310 კმ/სთ-ს აღწევს.

ვიწყებთ წრეს და პირველ მოსახვევს ვუახლოვდებით, რომელიც ამ ტრასაზე ერთ-ერთი ყველაზე ნელია. აქედან გამოსვლისას, დიდი მნიშვნელობა აქვს, რომ დროულად დავიწყოთ აჩქარება. ასეც ვაკეთებთ, ავდივართ მე-7 საფეხურამდე და ცნობილ მოსახვევ ო რუჟს (წითელი წყალი) ვუახლოვდბით. აქ ცუდი მხედველობაა, თუმცა ყოველთვის სრული სიჩქარით გავდივართ. სამაგიეროდ, მისი გავლისას, ყოველთვის ძლიერი ემოციები გვეუფლება.

კემელის სწორი მონაკვეთის ბოლოში ვამუხრუჭებთ, მე-4 საფეხურზე გადავდივართ და მოსახვევების ძალიან სწრაფ ბმულს გავდივართ. ჯერ გასავლელი მარცხენა მოსახვევია, შემდეგ მარჯვენა და მის მერეც მარჯვენა, რომელსაც მე-5 საფეხურით გავდივართ. შემდეგ ვუახლოვდებით რივაჟს (მოსახვევია), რომლის წინაც ვამუხრუჭებთ. ეს ძალიან ფაქიზად უნდა გავაკეთოთ, რათა შიდა რადიუსზე მყოფი ბორბლების ბლოკირება არ გამოვიწვიოთ. აქედან გამოსვლისას, მანქანა ჭარბი მოხვევადობისკენ მიდრეკილებას ავლენს.

გავდივართ ამ მოსახვევსაც და ვუახლოვდებით პუიონს. ეს ჩემი საყვარელი მონაკვეთია. ეს ორმაგი მოსახვევი ძალიან სწრაფია. მისი გავლისას, სიჩქარე 270-280 კმ/სთ-ს აღწევს. შემდეგ, ერთი საფეხურით დაბლა ვრთავთ და სანამ აჩქარებას დავიწყებთ, ოდნავ ფეხს ვიღებთ პედლიდან.

შემდეგ შიკეინს მეოთხე საფეხურით გავდივართ. ჯერ მარჯვენა მოსახვევია, შემდეგ კი - მარცხენა. ამას ისევ ორმაგი მოსახვევი მოსდევს, რომლისთვისაც მე-3 საფეხურია საჭირო. აქედან გამოსვლისას, მაქსიმალურად ვიყენებ ბორდიურებს. ამას სწორი მონაკვეთი მოსდევს, რომელსაც სტარტ/ფინიშის მონაკვეთისკენ მივყავართ.

მოსახვევ ბლანშიმოს სრული სიჩქარით პრობლემის გარეშე გავივლით და ბოლო შიკეინს ვუახლოვდებით. ეს ადგილი ახლახანს გადააკეთეს, თუმცა ის ისევ საკმაოდ ეშმაკურია და ნელი. აქ დიდი სიფრთხილე და მოზომილი მოქმედებაა საჭირო, რათა ოპტიმალურად გამოვიყენოთ ბორდიურები. აქ მანქანა მოცურებისკენ მიდრეკილებას ავლენს და მოსახვევიდან გამოსვლისას, ძალიან ძნელია ასფალტთან უკანა ბორბლების ოპტიმალური ჩაჭიდულობის შენარჩუნება.

აქედან სტარტ/ფინიშის სწორზე გავალთ და ახალ წრეს დავიწყებთ...