ფელიპე მასას ავარია
Hungarian GP
25 ივლისი
ამ ეტაპზე უკვე შეიძლება იმის თქმა, რომ მასა განსაცდელს გადაურჩა. მეორე საკვალიფიკაციო სექციის მიწურულს, მის მანქანას რუბენს ბარიკელოს ”ბრაუნიდან” მოწყვეტილი ნამსხვრევი მოხვდა, რომელიც მასას თავში მოხვდა. ავარიის ადგილზე დარჩენილი საბურავების სწორი ზოლი იმაზე მეტყველებდა, რომ მასა ამ დროს ინტენსიურად ამუხრუჭებდა (გონდაკარგული, ინსტიქტურად ამუხრუჭებდა და გაზსაც აწვებოდა). უმართავი მანქანა ძველი საბურავებისგან შექმნილ დამცავ ზღუდეს შეასკდა. ბრაზილიელი პილოტი სასწრაფოდ ადგილობრივ მედცენტრში გადაიყვანეს, საიდან გამოსული ცნობითაც, მას სერიოზული ტრავმა არ უნდა ჰქონდეს.
მედცენტრში მასა ბარიკელომ მოინახულა, რომელმაც სკაი სპორტს განუცხადა, რომ ფელიპეს გონება არ დაუკარგავს. მან ასევე თქვა, რომ ავარიამდე რამდენიმე წამით ადრე, მის ”ბრაუნს” უკანა საკიდარი დაუზიანდა და როგორც ჩანს, სწორედ მისმა ნამსხვრევმა გამოიწვია მასას ავარია. ”ის ძალიან აღგზნებულია. წარბზე ჭრილობა აქვს, მაგრამ ხელ-ფეხს ამოძრავებს და მთავარი ესაა. ახლა მისთვის მთავარი მოსვენებაა, რის შემდეგაც დაწვრილებითი გამოკვლევა ჩაუტარდება. მთავარია, რომ გონება არ დაუკარგავს”, - განაცხადა რუბინიომ.
კვალიფიკაცია კი ფერნანდო ალონსომ მოიგო, მომდევნო ადგილებზე ფეტელი, უებერი, ჰამილტონი, როსბერგი, კოვალაინენი, რაიკონენი, ბატონი და ნაკაძიმა გავიდნენ. გასაგები მიზეზის გამო, მასამ კვალიფიკაციის მესამე სექციაში მონაწილეობა ვერ მიიღო და მეათეზე დარჩა. ჯერჯერობით უცნობია, შეძლებს თუ არა ხვალ სტარტზე დადგომას.
ავტოდრომის მედცენტრში ბრაზილიელი პილოტი ”ფერარის” პრესცენტრის ხელმძღვანელმა ლუკა კოლაიანიმ მოინახულა, რომელმაც ჟურნალისტებს აუწყა, რომ ბრაზილიელი პილოტი გონებაზეა და ლაპარაკობს კიდეც. ამასთან, დაწვრილებითი გამოკვლევების ჩასატარებლად, ის ვერტმფრენით ბუდაპეშტის ჰოსპიტალში გადაიყვანეს.
No comments:
Post a Comment