formula 1

ალონსო პოულზე დაბრუნდა

Hungarian GP

25 ივლისი

მსოფლიოს ორგზის ჩემპიონის, ესპანელი ფერნანდო ალონსოს გამარჯვებით დასრულდა უნგრეთის დიდი პრიზის საკვალიფიკაციო რბოლა, რომელიც ბრაზილიელი ფელიპე მასას ავარიის გამო, ნახევარი საათის დაგვიანებით დასრულდა. მის ბოლო წამებზე, მწყობრიდან გამოვიდა ოფიციალური ქრონომეტრაჟი, რამაც მცირე გაუგებრობა გამოიწვია.

საქმე ისაა, რომ სანამ საინფორმაციო ეკრანები ჩაქვრებოდა, საუკეთესო შედეგი ალონსოს ჰქონდა, მაგრამ ტრასაზე კიდევ რამდენიმე პილოტი იყო დარჩენილი. თუმცა, კომპიუტერის გაუმართაობის გამო, მათი დროების დაფიქსირება ვეღარ მოხერხდა. ბერნი ეკლსტოუნთან პილოტების ხანმოკლე თათბირის შემდეგ გადაწყდა, რომ კვალიფიკაციის გამარჯვებულად ალონსო გამოცხადდებოდა.

”ჩვენ დახურულ პარკში ველოდით, თუ რა გადაწყვეტილებას მიიღებდნენ მსაჯები. საბოლოოდ, მე პოულზე აღმოვჩნდი. ამ შემთხვევას თუ არ გავითვალისწინებთ, მაინც იმის თქმა შემიძლია, რომ გუნდის მიერ შემუშავებული სიახლეები ეფექტურია და წინსვლის საშუალებას იძლევა. რა თქმა უნდა, ეს საკმარისი არაა და საჭიროა მანქანის დასახვეწად, სეზონის ბოლომდე ამ ტემპში მუშაობა. და მაინც, ახლა უკვე შეიძლება იმის თქმა, რომ საჭირო მიმართულებით ვვითარდებით. ხვალ საინტერესო რბოლა გველის. რა თქმა უნდა, მოგებას შევეცდები, მაგრამ ეს ძალიან ძნელი იქნება. უმჯობესია რეალისტებად დავრჩეთ და ვიტყვი, რომ ჩვენი მიზანი ქულების მაქსიმალურად შესაძლებელი რაოდენობის აღებაა”, - განაცხადა ალონსომ და დასძინა, რომ მისი წარმატება გარკვეულწილად, იმ ფაქტორმა განაპირობა, რომ ავზში მცირე რაოდენობით საწვავი ესხა.

მეორე და მესამე უსწრაფესი შედეგები ”რედ ბულის” პილოტებმა, სებასტიან ფეტელმა და მარკ უებერმა აჩვენეს. მხოლოდ მერვე შედეგი ჰქონდა ჩემპიონატის ლიდერ ჯენსონ ბატონს, ვისი ასეთი დროც, შესაძლოა, სავსე ავზის შედეგი იყოს. ეს კი იმას მოასწავებს, რომ ”ბრაუნის” პილოტი ტაქტიკურ ბრძოლას აპირებს.

მეოთხე პოზიციაზეა მსოფლიოს მოქმედი ჩემპიონი ლუის ჰამილტონი, ვინც პარასკევიდან მოყოლებული, ერთ-ერთი უსწრაფესია და როგორც ”რედ ბულის” პილოტები ფიქრობენ, სისტემა კერს-ის წყალობით, სტარტზევე დაწინაურების რეალური შანსი ექნება.

კვალიფიკაციის შედეგები

პილოტი, ქვეყანა, გუნდი დრო დრო დრო

1. ფერნანდო ალონსო (ესპანეთი, რენო) 1:21.313 1:20.826 1:21.569

2. სებასტიან ფეტელი (გერმანია, რედ ბულ-რენო) 1:21.178 1:20.604 1:21.607

3. მარკ უებერი (ავსტრალია, რედ ბულ-რენო) 1:20.964 1:20.358 1:21.741

4. ლუის ჰამილტონი (ბრიტანეთი, მაკლარენ-მერსედესი)1:20.842 1:20.465 1:21.839

5. ნიკო როსბერგი (გერმანია, უილიამს-ტოიოტა) 1:20.793 1:20.862 1:21.890

6. ჰეიკი კოვალაინენი (ფინეთი,მაკლარენ-მერსედესი) 1:21.659 1:20.807 1:22.095

7. კიმი რაიკონენი (ფინეთი, ფერარი) 1:21.500 1:20.647 1:22.468

8. ჯენსონ ბატონი (ბრიტანეთი, ბრაუნ-მერსედესი) 1:21.471 1:20.707 1:22.511

9. კაზუკი ნაკაძიმა (იაპონია, უილიამს-ტოიოტა) 1:21.407 1:20.570 1:22.835

10. ფელიპე მასა (ბრაზილია, ფერარი) 1:21.420 1:20.823 დროის გარეშე

11. სებასტიან ბუემი (შვეიცარია, ტორო როსო-ფერარი) 1:21.571 1:21.002

12. იარნო ტრული (იტალია, ტოიოტა) 1:21.416 1:21.082

13. რუბენს ბარიკელო (ბრაზილია, ბრაუნ-მერსედესი) 1:21.558 1:21.222

14. ტიმო გლოკი (გერმანია, ტოიოტა) 1:21.584 1:21.242

15. ნელსინიუ პიკე (ბრაზილია, რენო) 1:21.278 1:21.389

16. ნიკ ჰაიდფელდი (გერმანია, BMW ზაუბერი) 1:21.738

17. ჯანკარლო ფიზიკელა (იტალია, ფორს ინდია-მერსედესი) 1:21.807

18. ადრიან სუტილი (გერმანია, ფორს ინდია-მერსედესი) 1:21.868

19. რობერტ კუბიცა (პოლონეთი, BMW ზაუბერი) 1:21.901

20. ხაიმე ალგერსუარი (ესპანეთი,ტორო როსო-ფერარი) 1:22.359