formula 1

ჯერჯერობით ყველაზე სწრაფი კოვალაინენია

Hungarian GP

24 ივლისი

უნგრეთის დიდი პრიზის პირველ თავისუფალ პრაქტიკაზე, ყველაზე სწრაფი ”მაკლარენის” ფინელი პილოტი ჰეიკი კოვალაინენი (სურათზე) იყო, ვისაც კარიერაში ერთადერთი გამარჯვება შარშან სწორედ ჰუნგარორინგზე აქვს მოპოვებული.

ზომიერი სიცხის (სესიის დროს, ჰაერის ტემპერატურა 26, ასფალტისა კი - 39 გრადუსი იყო ცელსიუსით) პირობებში, ”მაკლარენის” ორივე პილოტმა კარგი შედეგები აჩვენა, რაც იმის თქმის საბაბს იძლევა, რომ მანქანისთვის ჩატარებული მოდერნიზაცია (აეროდინამიკური) წარმატებულია. გუნდი იმედოვნებს, რომ უნგრეთში კვარცხლბეკს დაუბრუნდება. თუმცა, გამარჯვებაზე ჯერ მხოლოდ გადაკვრით თუ საუბრობენ.

კოვალაინენმა საუკეთესო შედეგი სესიის მიწურულს დააფიქსირა. მანამდე კი ყველაზე სწრაფი ”უილიამსის” გერმანელი პილოტი ნიკო როსბერგი იყო. სხვათა შორის, არაა გამორიცხული, რომ მომდევნო სეზონში, ”მაკლარენში” ფინელის მონოპოსტი სწორედ როსბერგმა დაიკავოს. თუმცა ამაზე ჯერ ლაპარაკი მაინც ნაადრევია, რადგან ”მაკლარენი” მოლაპარაკებას ამ ეტაპზე ორივე პილოტთან აწარმოებს.

მესამე შედეგი კი მსოფლიოს ჩემპიონ ლუის ჰამილტონს ჰქონდა. ”ამ ორი წლის განმავლობაში, მე და ჰეიკი კვარცხლბეკზე არაერთხელ ავსულვართ, მაგრამ თუ ამას ამ უქმეებზეც შევძლებთ, ეს გამარჯვების ტოლფასი იქნება”, - ამბობს.

ჯერჯერობით, ჩრდილში იმყოფება სებასტიან ფეტელი, ვინც სესიის ბოლოს საბურავების გადახურებას უჩიოდა. არადა, მისმა თანაგუნდელმა მარკ უებერმა, ვინც ”რედ ბულთან” კონტრაქტი გუშინ გააგრძელა, მეოთხე შედეგი დააფიქსირა. აქვე უნდა ითქვას, რომ პირველ სესიაზე პილოტების უმეტესობა უფრო ხისტ საბურავებს იყენებდა. ამიტომ, მეორე სესიაზე შედეგების მნიშვნელოვანი გაუმჯობესებაა მოსალოდნელი.

პირველი თავისუფალი პრაქტიკის შედეგები

პილოტი,ქვეყანა და გუნდი დრო

1. ჰეიკი კოვალაინენი (ფინეთი,მაკლარენ-მერსედესი) 1:22.278

2. ნიკო როსბერგი (გერმანია, უილიამს-ტოიოტა) 1:22.337

3. ლუის ჰამილტონი (ბრიტანეთი, მაკლარენ-მერსედესი) 1:22.554

4. მარკ უებერი (ავსტრალია, რედ ბულ-რენო) 1:22.615

5. კაზუკი ნაკაძიმა (იაპონია, უილიამს-ტოიოტა) 1:22.619

6. იარნო ტრული (იტალია, ტოიოტა) 1:22.705

7. კიმი რაიკონენი (ფინეთი, ფერარი) 1:22.796

8. ფელიპე მასა (ბრაზილია, ფერარი) 1:22.855

9. ფერნანდო ალონსო (ესპანეთი, რენო) 1:23.001

10. ჯენსონ ბატონი (ბრიტანეთი, ბრაუნ-მერსედესი) 1:23.130

11. რობერტ კუბიცა (პოლონეთი, BMW ზაუბერი) 1:23.146

12. ნიკ ჰაიდფელდი (გერმანია, BMW ზაუბერი) 1:23.154

13. რუბენს ბარიკელო (ბრაზილია, ბრაუნ-მერსედესი) 1:23.209

14. ტიმო გლოკი (გერმანია, ტოიოტა) 1:23.234

15. სებასტიან ფეტელი (გერმანია, რედ ბულ-რენო) 1:23.283

16. ჯანკარლო ფიზიკელა (იტალია, ფორს ინდია-მერსედესი) 1:23.484

17. ნელსინიუ პიკე (ბრაზილია, რენო) 1:23.678

18. ადრიან სუტილი (გერმანია, ფორს ინდია-მერსედესი) 1:23.845

19. სებასტიან ბუემი (შვეიცარია, ტორო როსო-ფერარი) 1:23.998

20. ხაიმე ალგერსუარი (ესპანეთი,ტორო როსო-ფერარი) 1:24.228