formula 1

”მაკლარენები” ყველაზე სწრაფები არიან

Hungarian GP

24 ივლისი

ჯერჯერობით, ჰამილტონი ისევ ყველაზე სწრაფია

ჯერჯერობით, უნგრეთის დიდ პრიზზე ყველაზე სწრაფები ”მაკლარენის” პილოტები - ლუის ჰამილტონი და ჰეიკი კოვალაინენი არიან, რომლებმაც პარასკევის თავისუფალ პრაქტიკებზე საუკეთესო შედეგები აჩვენეს.

თუ პირველ სესიაზე საუკეთესო ფინელი პილოტი იყო, ვისაც კარიერაში პირველი და ჯერჯერობით, ერთადერთი გამარჯვება შარშან სწორედ ჰუნგარორინგზე აქვს მოპოვებული, მეორეზე მას ჰამილტონმა აჯობა. მაგრამ ნურც იმას დავივიწყებთ, რომ პარასკევს ნაჩვენები შედეგები ხშირად ბევრი არაფრის მთქმელია და გუნდების და მათი პილოტების რეალური შესაძლებლობები კვალიფიკაციაზე ვლინდება ხოლმე.

ამ სეზონში ”მაკლარენის” პილოტები კვარცხლბეკზე ერთხელაც არ ასულან და ისინი იმედოვნებენ, რომ უნგრული ეტაპის წინ, მანქანის აეროდინამიკაში შეტანილი ცვლილებები, მათ მოწინავეთა სამეულში დაბრუნების საშუალებას მისცემს.

უნგრეთის ეტაპს მოუთმენლად ელოდნენ ”ბრაუნში”, რომლის ბრიტანელმა პილოტმა, ჩემპიონატის გამოკვეთილმა ლიდერმა ჯენსონ ბატონმა წინა ორი ეტაპი წარუმატებლად ჩაატარა. მაგრამ ჯერჯრობით, ის კვლავ ჩრდილში იმყოფება. ყოველ შემთხვევაში, თავისუფალ პრაქტიკებზე მან მე-10 და მე-13 შედეგები აჩვენა.

”როგორც ჩანს, ბუდაპეშტში ამ დღეებში სიცხეები იქნება და ეს ჩვენთვის კარგი უნდა იყოს - საბურავების სასურველ კონდიციამდე გახურება აღარ გაგვიჭირდება. თანაც, მანქანას რამდენიმე ახალი დეტალი ექნება და ვიმედოვნებ, რომ წინსვლას შევძლებთ”, - ამბობს ბატონი.

ორივე სესიაზე მოწინავე სამეულში შესვლა შეძლო გერმანელმა ნიკო როსბერგმა, ვინც პირველ სესიაზე მეორე იყო, მეორეზე კი მესამე შედეგს დასჯერდა. ასევე სტაბილური იყო ავსტრალიელი მარკ უებერი, ვინც ორივე შემთხვევაში მეოთხე შედეგს დასჯერდა.

ყურადღების ცენტრში მოექცა ესპანელი ახალბედა ხაიმე ალგერსუარი, ვინც კვირას ფორმულა 1-ის ისტორიაში რბოლის ყველაზე ახალგაზრდა მონაწილე ოფიციალურად გახდება.

ბევრი ფიქრობს, რომ რბოლის დროს, ალგერსუარი ტრასაზე ყველაზე სახიფათო პილოტი იქნება, რადგან მას ფ1-ში ასპარეზობის არანაირი გამოცდილება არ აქვს. მაგრამ ესპანელი ამ ნაკლის თანდათან გამოსწორებას ცდილობს - პირველ სესიაზე თავიდან საკმაოდ ნელი იყო, მაგრამ სიჩქარე თანდათან გაზარდა და სესიის ბოლოს, შვეიცარიელ სებასტიან ბუემის 0.7 წამით ჩამორჩა. მეორე სესიის ბოლოსაც, მათ შორის სხვაობა თითქმის ამდენივე იყო.

პირველი თავისუფალი პრაქტიკის შედეგები

პილოტი, ქვეყანა და გუნდი დრო

1. ლუის ჰამილტონი (ბრიტანეთი, მაკლარენ-მერსედესი) 1:22.079

2. ჰეიკი კოვალაინენი (ფინეთი,მაკლარენ-მერსედესი) 1:22.126

3. ნიკო როსბერგი (გერმანია, უილიამს-ტოიოტა) 1:22.154

4. მარკ უებერი (ავსტრალია, რედ ბულ-რენო) 1:22.369

5. კაზუკი ნაკაძიმა (იაპონია, უილიამს-ტოიოტა) 1:22.426

6. სებასტიან ფეტელი (გერმანია, რედ ბულ-რენო) 1:22.550

7. რუბენს ბარიკელო (ბრაზილია, ბრაუნ-მერსედესი) 1:22.641

8. იარნო ტრული (იტალია, ტოიოტა) 1:22.663

9. ნიკ ჰაიდფელდი (გერმანია, BMW ზაუბერი) 1:22.690

10. ტიმო გლოკი (გერმანია, ტოიოტა) 1:22.751

11. კიმი რაიკონენი (ფინეთი, ფერარი) 1:22.763

12. ფერნანდო ალონსო (ესპანეთი, რენო) 1:22.793

13. ჯენსონ ბატონი (ბრიტანეთი, ბრაუნ-მერსედესი) 1:22.806

14. რობერტ კუბიცა (პოლონეთი, BMW ზაუბერი) 1:22.870

15. ნელსინიუ პიკე (ბრაზილია, რენო) 1:22.927

16. ადრიან სუტილი (გერმანია, ფორს ინდია-მერსედესი) 1:22.978

17. ჯანკარლო ფიზიკელა (იტალია, ფორს ინდია-მერსედესი) 1:23.029

18. ფელიპე მასა (ბრაზილია, ფერარი) 1:23.156

19. სებასტიან ბუემი (შვეიცარია, ტორო როსო-ფერარი) 1:23.176

20. ხაიმე ალგერსუარი (ესპანეთი,ტორო როსო-ფერარი) 1:23.942