ლოების კატალონიური ტრიუმფი
Rally of Spain
4 ოქტომბერი
ლოები სეზონში მეექვსე გამარჯვებას ზეიმობს
...................................................................................................
სებასტიან ლოებმა ესპანეთის რალი მოიგო და მსოფლიო ჩემპიონის მეექვსე ტიტულის მოპოვების რეალური შანსი შეინარჩუნა. კატალონიის ასფალტიან გზებზე ტრიუმფის შემდეგ, მას და ჩემპიონატის ლიდერს, ფინელ მიკო ჰირვონენს მხოლოდ ერთი ქულა აშორებთ და ჩემპიონის ვინაობა ბოლო ეტაპზე - ბრიტანეთის რალიზე გაირკვევა.
ჰირვონენი ესპანეთის რალიზე მხოლოდ მესამე ადგილს დასჯერდა. ლოების გარდა, მასზე წინ რბოლა ფრანგის ესპანელმა თანაგუნდელმა დანი სორდომაც დაასრულა. არადა, რბოლის წინ, ”ფორდმა” თავის ავტომობილს ინტენსიური ტესტები ჩაუტარა, რათა ჰირვონენს ”სიტროენელებთან” ტოლსწორად პაექრობის საშუალება ჰქონოდა.
თავიდან თითქოს, ამან სასურველი შედეგი გამოიღო - პირველი სპეცმონაკვეთის შემდეგ, ფინელმა პილოტმა მოწინავე სამეულში, სორდოსა და ლოებს შორის, მეორე ადგილი დაიკავა. მაგრამ მალე ფრანგული გუნდის ეკიპაჟებმა ფინელი ჩამოიტოვეს და ბოლომდე ახლოს აღარც მიუშვიათ.
პირველი ორი დღის შემდეგ, წინ სორდო იყო, მაგრამ შემდეგ მსოფლიოს ხუთგზის ჩემპიონმა თანაგუნდელი უკან ჩამოიტოვა და სეზონში მეექვსე გამარჯვებაც მოიპოვა.
ლოები და მისი ნავიგატორი დანიელ ელენა ასპარეზობისას
.................................................................................................................
”ძალიან ძნელი გამარჯვებაა, რადგან დანიელი დღეს ძალიან სწრაფი იყო. ჩვენ ბრძოლა გვინდოდა, მაგრამ მთავარი მაინც ფინიშამდე მიღწევა იყო და ამიტომ, დაძაბული პაექრობა არ გამოგვივიდა”, - განაცხადა ლოებმა.
”ჩემთვის ამ მეორე ადგილსაც დიდი ფასი აქვს, რადგან გუნდის ინტერესებისთვის ვირჯები, სებასტიანს კი გამარჯვება ჰაერივით სჭირდებოდა. ,ოკლედ, კმაყოფილი ვარ”, - განაცხადა სორდომ.
მიუხედავად იმისა, რომ ხუთქულიანი უპირატესობა ერთამდე შეუმცირეს, ნარბოლევს ოპტიმიზმი არც ჰირვონენს აკლდა და განაცხადა, რომ ბრიტანეთში ძალიან დაძაბული და საინტერესო პაექრობა ელის.
სხვათა შორის, მას მესამე ადგილის დაკარგვის რეალური საფრთხეც დაემუქრა, რადგან მსოფლიოს ყოფილმა ჩემპიონმა, ნორვეგიელმა პეტერ სოლბერგმა ძველი ”სიტროენ Xსარა” ახალ ”სიტროენ C4-ზე” გაცვალა და კარფგადაც იასპარეზა, თუმცა ფინელს მაინც 18 წამით ჩამორჩა.
ესპანეთის რალის შედეგები
1. სებასტიან ლოები (საფრანგეთი, სიტროენი) 3:22:14.700
2. დანიელ სორდო (ესპანეთი, სიტროენი) +12.000
3. მიკო ჰირვონენი (ფინეთი, ფორდი) 54.100
4. პეტერ სოლბერგი (ნორვეგია, სიტროენი) 1:12.400
5. სებასტიან ოჟირი (საფრანგეთი, სიტროენი) 1:41.600
6. იარი-მატი ლატვალა (ფინეთი, ფორდი) 2:49.800
7. მეტიუ უილსონი (ბრიტანეთი, ფორდი) 7:15.500
8. ფედერიკო ვილაგრა (არგენტინა, ფორდი) 8:28.100
9. ჰენინგ სოლბერგი (ნორვეგია, ფორდი) 9:07.600
10. დანი სნობეკი (საფრანგეთი, პეჟო) 10:56.000
პილოტების კლასიფიკაცია
1. მიკო ჰირვონენი (ფინეთი, ფორდი, 4) – 84; 2. სებასტიან ლოები (საფრანგეთი, სიტროენი, 6) – 83; 3. დანიელ სორდო (ესპანეთი, სიტროენი) – 58; 4. იარი-მატი ლატვალა (ფინეთი, ფორდი, 1) – 39; 5. პეტერ სოლბერგი (ნორვეგია, სიტროენი) – 30; 6. ჰენინგ სოლბერგი (ნორვეგია, ფორდი) – 29; 7. მეტიუ უილსონი (ბრიტანეთი, ფორდი) – 25
შენიშვნა: ფრჩხილებში მითითებულია გამარჯვებათა რაოდენობა
კონსტრუქტორთა პირველობა:
1. სიტროენ WRT – 151; 2. ფორდ WRT – 130; 3. ფორდ შტობარტი – 73; 4. სიტროენ ჯუნიორი – 42; 5. ფორდ მუნჩი’ს – 23
No comments:
Post a Comment